Read Ateso 2 Aisiltonokin 36 Bible Online

2 Aisiltonokin 36 - Ateso bible

2 Aisiltonokin 36

¹ Kosodete ituŋa luka akwap ayaŋaar Yekoakas okoku loka Yosia, kitaraut ŋes ekabaka koYerusalem aibois naka papake.

²Kerai Yoakas loka ikar akaisaarei ka luuni egeuni airum: kirumak ilapio iuni koYerusalem.

³Kireŋea ekabaka loko Misiri ŋes karaut ekabaka koYerusalem, kotubok akwap esolo loka atalatan akwatat nuka epuesa, ka atalata naka esabu.

⁴ Kitarau ekabaka loko Misiri Eliakim onaceke ekabaka loka Yuda ka Yerusalem, kilocok ekekiror komaik Yekoiakim. Koyaŋa Neko Yoakas onaceke, kodakarai Misiri.

⁵ Kerai Yekoiakim loka ikar akaisaarei ka lukany egeuni airum; kirumak ikar itomon ka lodiopet koYerusalem: kiswama nueroko kakonyen nuka EJAKAIT Ekedeke.

⁶ Kobu Nebukadanesar ekabaka loko Babulon asurokin ŋes, koen ŋes kasua, adakar ŋes Babulon.

⁷ Kodaka Nebukadanesar da lukoboro luka etogo loka EJAKAIT Babulon, kibwaik kes oyekaluke koBabulon.

⁸ Aswamisio ace nuka Yekoiakim, ka italesio luabu kiswama luadumunio kamakeŋ, koany, iwadikatai oitabo leka ikabakan luka Isirael ka Yuda; kirum Yekoiakin okokuke aiboisike.

⁹ Kerai Yekoiakin loka ikar ikanykauni egeuni airum; kirumak ilapio iuni ka apaarasia atomon koYerusalem: kiswama nueroko kakonyen nuka EJAKAIT.

¹⁰ Kedol ekaru, kijuka ekabaka Nebukadanesar koyau ŋes Babulon, nepepe kiboro luejok luka etogo loka EJAKAIT, kitarau Sedekia onaceke ekabaka loka Yuda ka Yerusalem.

¹¹ Kerai Sedekia loka ikar akaisaarei ka lodiopet egeuni airum; kirumak ikar itomon ka lodiopet ko Yerusalem.

¹²Kiswama nueroko kakonyen nuka EJAKAIT Ekedeke; mam abu kitasonikin kakonyen nuka Yeremia enabi, lokinera nuapote kaituk naka EJAKAIT.

¹³ Kipaliik ŋesi ekabaka Nebukadanesar, lokisiyapoikinit ŋes alimit Edeke: konye kitininik emurisiŋike, kitogogoŋ eketau kinyek aibelokin mama ejai EJAKAIT, Edeke loka Isirael.

¹⁴Ido kibucasi noi ijaka kere luka isasedotin, ka ituŋa, atupakin italesio kere luka ikapirin; komunaut etogo leka Edeke loabu kitalaunite ko Yerusalem.

¹⁵ Kijukanak kes EJAKAIT, Edeke loka lukapapaakec kokiyakiake, anyoun tupuruc ijukanari; naarai etimit ŋesi iketuŋa, ka aiboisike.

¹⁶ Konye kisekeloto ikiyakia luka Edeke, komwaŋito akekiro, kokienatar inabinoke, aitodol neadakunor anyunyura naka EJAKAIT asurokin iketuŋa, aitodol neamameunor aŋaleun.

¹⁷ Kanuka ŋun koyau mamakec ekabaka loka Ikaludean, loaari ikatumunakakec kekileŋ kotogo loka aiboisikec nakalaunan, mam apotu kitimoto esapat karaida apese, ekimat ka emojoŋ loitabi; koinak kes kere akanike.

¹⁸ Iboro da kere luka etogo loka Edeke, lukapolok ka ludidik, ka iboro luka akais nuipu luka etogo leka EJAKAIT, ka iboro luka akais nuipu luka ekabaka, ka luka ikapolokoke; ŋul kere koyau Babulon.

¹⁹ Kicweata etogo loka Edeke, kotiyatiyata arwatat naka Yerusalem, kicweata itogoi lukapolok kere kakim, komudias iborokec kere lukajokak.

²⁰ Ŋul da luakuete ekileŋ koyaŋa Babulon; koraut ikebulesin ka luka odweke kiton airum naka ajakanut naka Perusia.

²¹ Aitodol akirot naka EJAKAIT kaituk naka Yeremia, aitodol nealakaror akwap kasabatonoke; naarai kapak naeswapitor, koricite asabatoke, aitodol ikar akaisakanykaarei.

²² Kokaru losodit loka Kuro ekabaka loko Perusia, tetere itodolikinio akirot naka EJAKAIT kaituk naka Yeremia, kisidik EJAKAIT etau loka Kuro ekabaka loko Perusia, kolimo anatar ajakanutuke kere, kiwadika da ebe,

²³ “Inera kwanata Kuro ekabaka loko Perusia ebe, ‘Kainaki eoŋ EJAKAIT, Edeke loka akuj, ajakanuto kere nuka akwapin; kecoraki da adukokin ŋes etogo Yerusalem, loejai toma Yuda. Ŋin yenejai kayes kotuŋake kere, kojai EJAKAIT Ekedeke kaŋes, kolot.’ ”