Read Ateso 2 Aisiltonokin 4 Bible Online

2 Aisiltonokin 4 - Ateso bible

2 Aisiltonokin 4

¹ Bobo da abu, kiswamau etem loka aisinit, aojauke, ikuitin akaisaarei, alalauke ikubitin akaisaarei, ka amukururuke ikubitin rtomon.

² Abu kiswamau da aŋolol naecalara ikubitin itomon anyoun koreret kiton oreret, kolukuna, amukururuke ikubitin ikany; kolukunite aitemis naka ikubitin akaisauni.

³ Kwapuke kejaas luesubito bala imoŋin, luerimorete ŋes, kokubitin itomon, airimor aŋolol. Kejaas imoŋin okokoron iarei, kocala kere nepepe kotatai.

⁴Kidokokinai omoŋin itomon ka luarei, kosesenete iuni ari naka agolitomei, kosesenete iuni ari nakoto, kosesenete iuni ari naka eŋalakimak, kosesenete iuni ari nakokide: kidokokinai aŋolol kujukec, kojaas iwosikec kere toma.

⁵ Aburesuke alalau naka akan; kiswamai erereteke bala ereret loka atido, bala aturot naka apecel: abu kigau akaalakanya alukumin auni.

⁶ Abu kiswamau da akalayan atomon, kibwaik akany kakan nakoteten, ka akany da nakokediany, ailosenena; apotu kilosenenata iboro lukeraas luka ainakinet naicweio kotomakec: konye kerai aŋolol neelonenenata isasedotin.

⁷ Abu kiswamau ipirin itomon lukatalai luka esabu kwape ajaar aicorakinetekec; kosipok kes oyekalu ikany kakan nakoteten, ikany da kokediany.

⁸ Kiswamau da imesan itomon, kibwaik kes oyekalu, ikany kakan nakoteten, ikany da kokediany. Kiswamau da atanyia akwatat nuka esabu.

⁹ Bobo da abu kiswamau alaro naka isasedotin, ka alaro nakapolon, ka ikirigin luka alaro, kiladaa ikiriginikec kaisinit.

¹⁰ Kosipok aŋolol kowai lokoteten loka etogo, kokide ari naka eŋalakimak.

¹¹ Kiswamau Kuram amoti, ka iŋitia, ka atanyia. Kodau do Kuram aswam naabu kiswamak Solomon ekabaka kotogo loka Edeke.

¹² Ipirin iarei, ka atiboi, ka akwes aarei nukejaas kuju opirin; ka iboyan iarei arapia atiboi aarei nukejaas kuju opirin;

¹³ ka akamamagan akwat aoŋon nuka iboyan iarei; ikokoron iarei luka akamamagan kaŋoliboi, arapia atiboi aarei nukejaas kuju opirin.

¹⁴ Abu kiswamau da aicegeria, kiswamau akalayan nuka aicegeria;

¹⁵aŋolol adiopet, ka imoŋin itomon ka luarei kwapuke,

¹⁶ amoti da, ka iŋitia, ka igolun luka akiriŋ, ka iboroke kere, kiswamak Kuram papake Solomon ekabaka, luka etogo loka EJAKAIT luka aisinit naepwatat.

¹⁷ Kotata ekabaka kes kApuuton naka Yorodan, kolupe loejai kidiŋ Sukot ka Sereda.

¹⁸ Kwaŋin kiswama Solomon iboro ŋul kere luipu noi: naarai mam kepedorit adumun alaŋir naka aisinin.

¹⁹ Kiswama Solomon iboro kere luajaas togo loka Edeke, etem da loka esabu, ka imesan luka imugatin lukaitodikin;

²⁰ ka ipirin lukatalai ka atalaikec, tetere enokete kwape ajaar aicorakinet koiŋaren kaneinerenenere akirot, luka esabu loelai.

²¹ Ka aturo, ka atalai, ka arideta, nuka esabu, eebo, esabu loejok cut;

²² ka aitudeŋeta, ka atanyia, ka akaalei, ka atuba nuigaete ekurwon, nuka esabu loelai: neelomarere togo, ikiriginike lukotoma luka aibois nakalaunan noi, ka ikirigin luka etogo, kes luka eyekalu, keraas luka esabu.