Read Ateso 2 Aisiltonokin 5 Bible Online

2 Aisiltonokin 5 - Ateso bible

2 Aisiltonokin 5

¹ Kwaŋin kodaun aswam naeswamakini Solomon etogo loka EJAKAIT. Kitoloma Solomon iboro luabu Daudi papake kotiaku; epuesa ka esabu, ka iboro kere, kibwaik kes aiŋadisia nuka etogo loka Edeke.

² Kosodi Solomon atukokin imakio luka Isirael, ka ikapolok kere luka atekerin, ikapolok luka ikekia luka lukapapaa luka idwe luka Isirael, Yerusalem, ayaun asaduku naka aitutuket naka EJAKAIT, anyoun kore loka Daudi, ŋes Sion.

³ Kotukonokinos ituŋa kere luka Isirael mama ejai ekabaka kopucit, lokejai kolap lokikanyetekaarei.

⁴ Kopotu imakio kere luka Isirael, kodakut Ilebin asaduku.

⁵Koyaut asaduku, ka ewema loka airiamunun, ka iboro kere lukalaunak lukejaas owema; kes iboro luapotu isasedotin Ilebin koyaut.

⁶Kejai ekabaka Solomon ka ekodet kere loka Isirael, luatukonokinos mama ejai ŋesi, koiŋaren kasaduku, einanakinete imerekekin ka imoŋin, lumam epedorio alimun karaida aimarun kanuka aipues.

⁷Kitolomasi isasedotin asaduku naka aitutuket naka EJAKAIT aiboisike, neinerenenere akirot, aibois nakalaunan noi, kwap kabebenoka nuka ikerubin.

⁸Naarai kigararas ikerubin abebenokakec kuju aibois naka asaduku, korapias ikerubin asaduku ka adaketake.

⁹ Kewojak adaketa tetere etakani esaŋekec kasaduku koiŋaren kaneinerenenere akirot; konye mam ketakanete kokiŋa: ejai nepenen, kiton lolo.

¹⁰ Amamei ibore kotoma asaduku dimarai amor aarei nuabu Musa kibwaik koKoreb, nakitutukio EJAKAIT aitutuket kaidwe luka Isirael, nakelomuniata koMisiri.

¹¹Kosodi kanen, kedaut isasedotin alomun kaibois nakalaunan, (naarai apotu isasedotin kere lukejaas nen kitalaunos, komam ericito abeanakinikec;

¹² bobo da kobwaata Ilebin lukeraas ikayook kowai lokokide loka etem, kes kere, Asap, ka Keman, ka Yedutun, ka odwekec ka iinacanakec, konapito ebaputa loejok, kojaas kaisinin nueruosi ka isabulin ka adeudeun; ido isasedotin akwatat ka akaisaarei nepepe kakes kokusete arupepen:)

¹³ Kosodi do kanen, keraut ikakutak arupepen ka ikayook bala ediopet, aisiirario eporoto ediopet aiturit ka aimal EJAKAIT; kitonyoutu kesi iporotoikec nepepe karupepen ka aisinin nueruosi ka lueruosi kere, kituritos EJAKAIT ebe, “Naarai ejok ŋesi: naarai ejaenena akeitim ikar kere”: kosodi do kilelebun edou togo, ŋes etogo loka EJAKAIT.

¹⁴ Mam isasedotin apotu kopedosi aibwo aijaanakin kanuka edou: naarai kilelebun aibuses naka EJAKAIT togo loka Edeke.