Read Ateso 2 Aisiltonokin 8 Bible Online

2 Aisiltonokin 8 - Ateso bible

2 Aisiltonokin 8

¹ Kosodi kanen, ketuboros ikar akaisaarei luadukio Solomon etogo loka EJAKAIT, ka etogoke da elopet,

²ireria luabu Kuram koinak Solomon, koduk Solomon kes, kisiboik idwe luka Isirael ŋina.

³ Kolot Solomon Kamat-soba, kipiko ŋes.

⁴ Kodukok Tadumor amodiŋ, ka ireria kere lukainad luadukokini Kamat.

⁵Koduk da Bet-koron Ioimukurur, ka Bet-koron loijesara, ireria luabwaitai, lukejaas arwatatin, ka ikirigin, ka atiketa;

⁶ ka Baalat, ka ireria kere lukainad lukejaas ka Solomon, ka ireria kere luka agalinike, ka ireria luka ikebwanenokoke, ka kere luakoto Solomon aiduk aisiyalamikinor kotoma Yerusalem, ka Lebanon, ka akwap kere naka airumuke.

⁷ Ituŋa kere da luedeunos luka Ikitin, ka Imorain, ka Iperisin, ka Ikibin, ka Iyebusin, lumam keraas luka Isirael;

⁸luka idwekec luedeunos kakes kakwap, lumam idwe luka Isirael emudiara, kolemununei Solomon ikitubusiana kamakec, kiton lolo.

⁹ Konye mam abu Solomon kitubulesene idwe luka Isirael kanuka akeswam; konye keraas kesi ikajiok, ka ikapolok luka ikapolokoke, ka ikapolokitok luka agalinike ka ikebwanenokoke.

¹⁰ Lu kes ikapolok lukapolok luka ekabaka Solomon, kes akwat aarei ka akaisakany, luayaitos ituŋa.

¹¹ Kitonyou Solomon akoku naka Parao kore loka Daudi mama ejai etogo loabu ŋesi kodukok ŋes: naarai abala ebe, “Mam akaberu iboikini togo loka Daudi ekabaka loka Isirael, naarai eraas aiboisio nukalaunak, nuadolokinit asaduku naka EJAKAIT.”

¹²Kosodi Solomon ainakin ainakineta nuicweio mama ejai EJAKAIT kotem loka EJAKAIT, loaduki kiŋaren kaneelomarere,

¹³ kwape kibusakinitor nuka ŋinipaaran, koinanakini kwape ajaar aicorakinet naka Musa, ka nukasabaton, ka napilamununei elap, kopucin lueseunitai, irwan auni ŋolikaru, kopucit loka emugati lomam itubuunitoi, kopucit loka asabaton, kopucit da loka iswamin.

¹⁴ Kitemok, kwape ajaar aicorakinet naka Daudi papake, abeanakin naka isasedotin kaijaanakinikec, ka Ilebin kaswamukec, aiturit, ka aijaanakin isasedotin kwape epudar aswam naka ŋinipaaran: ikagolok da kabeanakinikec korutei kere: naarai abu Daudi etuŋanan loka Edeke kicorak kwaŋin.

¹⁵Mam apotu konyout kaicorakinet naka ekabaka mama ejaas isasedotin ka Ilebin kadiokirot kere, ka nuka iboro luka akais nuipu da.

¹⁶Kitemokinoi aswam kere naka Solomon kiton apaaran naka apetetait naka etogo loka EJAKAIT, kiton da neadaunia. Kwaŋin kitodoloi etogo loka EJAKAIT.

¹⁷ Kosodi Solomon alosit Esion-geber, ka Elot, kariri naka aŋolol kakwap naka Edom.

¹⁸ Kijukak Kuram ŋes kakanin nuka ibulesinike ameerin ka ibulesin luajenete aŋolol; kouparos kaibulesin luka Solomon alosit Opir, koomata kaŋina atalatan akwat aoŋon ka akaisakany nuka esabu, koyaut mama ejai ekabaka Solomon.