Read Ateso Esera 4 Bible Online

Esera 4 - Ateso bible

Esera 4

¹Kepuputu da lukasurupo luka Yuda ka Benyamin ebe adukoto idwe luejoreoritai eyekalu loka EJAKAIT, Edeke loka Isirael;

² kikunyakis kesi neejai Serubabel, ka ikapolok luka ikekia luka lukapapakec, kobalas ebe, “Mere kadukoto nepepe kayes: naarai kimoot isio Ekusideke, kwape kayesi; kiinakini isio ŋes asuban ageun kapaarasia nuka Esar-kadon ekabaka loka Asuria lokitodokuni sio nee.”

³ Konye Serubabel, ka Yesua ka ice kere luka ikapolok luka ikekia luka lukapapa luka Isirael, kotemasi kes atiar, “Mam kipuda yes aimorikikin kasio kotoma aiduk etogo loka Ekosideke; konye sio kiduki bonik etogo loka EJAKAIT, Edeke loka Isirael, kwape abu Kuro ekabaka loko Perusia kicorakinia.”

⁴ Kosodete ituŋa luka akwap kitakalanyanata akanin nuka ituŋa luka Yuda, kisiyaloŋoŋoto kes kotoma aiduk,

⁵koropata ikapetak akiro aluikin kes, aitikokin akeceinerun, apaarasia kere nuka Kuro ekabaka loko Perusia, aitodol naerumia Dario ekabaka loko Perusia.

⁶Kairum naka Akasuero, ageunet naka airumuke, kiwadikata aosan lukiboiete ko Yuda ka Yerusalem.

⁷Kapaarasia nuka Aratasasata apotu Bisilam, ka Mituredat, ka Tabeel, ka lukaupake ice kere, kiwadikata mama ejai Aratasasata ekabaka loko Perusia; ewadikatai ebalua keiwadikae loka Suria, kaŋajep naka Isurian.

⁸ Kiwadikata Rekum lokebuku, ka Simisai ekewadikan ebalua mama ejai Aratasasata ekabaka asurokin Yerusalem kopone kalo:

⁹ Kosodete kiwadikata Rekum lokebuku, ka Simisai ekewadikan, ka iukaupakec ice kere; Idinaitin, Iparasatakain, Itarapelin, Ipasian, Irakebain, Ibabulonin, Isusanikin, Idekain, Ilamein,

¹⁰ ka atekerin ace kere nukitwobotuni Osunapar lokapolon lokaibuses, kibwaik ore loka Samaria, ka akwap ace da okekwa juwai, ka ace da.

¹¹Ikopuna nu kobalua lokijukakinete kesi: “Aratasasata ekabaka: Ikonikejaanakinak, ituŋa luka okekwa juwai, ka ace da.

¹² Kojen ekabaka ebe adolut Iyudayan luanyounete kamakon mamakosi Yerusalem; edukete ere lokepali lokaronon da, adaut arwatatin, eteteut da apeteta.

¹³ Aso kojen ekabaka ebe, arai keduki ere lo, kodaunai da arwatatin, mam kes elemete esolo loka ituŋa, ka esolo loka iboro, ka esolo loka ikalotok da, kosodi kokau etwakiarete ikabakan.

¹⁴Aso do naarai kinyami abalaŋ naka etogo loka ekabaka, mam ibus sio aanyun aitisilio naka ekabaka, kanuka ŋun kijukakinit aitejenikin ekabaka;

¹⁵ koŋicai oitabo loka aisiitonokin loka lukapapakon: kwaŋin idumuni koitabo loka aisiitonokin ijenuni kwape eraar ere lo ere lokepali, loitisili ikabakan ka ibukui, ebe da apotu kipaliikis apeŋo kotomake: kanuka ŋun da amudiarere ere lo.

¹⁶Kitejenunit ekabaka ebe, arai keduki ere lo, kodaunai da arwatatin, kanuka ŋun mam ijaun ijo kewai okekwa juwai.”

¹⁷Kosodi ekabaka aijukar aboŋokin mama ejai Rekum lokebuku, ka Simisai ekewadikan, ka lukaupakec ice kere lukiboiete ko Samaria, kakwap ace nakokekwa juwai ebe, “Kinapakinos, ka ace da.

¹⁸Aponi kasomakin eoŋ kaitebeikin ebalua lokijukakinete yesi sio.

¹⁹Kebwaik ekisil, komoata, apotu kodumutu ebe ere ŋol ageun apeŋo ebilanakini ikabakan ebotet aipaliikin ka amwaŋit da inerununoo kotomake.

²⁰ Ido ajaenenas ikabakan lukagogoŋ luapolokinete Yerusalem, luayaitos akwap kere okekwa juwai; atacanakinio kes esolo loka ituŋa, esolo loka iboro, ka esolo loka ikalotok da.

²¹Aso do kibwaikisi ekisil, kitanaŋata ituŋa lu aswam, kinyek ere ŋol adukio, aitodol naebwaikinia eoŋ ekisil.

²²Kocoito kinyeis aijalakin kaŋun: kanukinyo tikepolooror aronis aitwataniar ikabakan?”

²³ Kosodi kesomi aikopunet naka ebalua loka ekabaka Aratasasata kakonyen nuka Rekum, ka Simisai ekewadikan ka lukaupakec, kisunyas atipet alosit Yerusalem mama ejaas Iyudayan, kitanaŋata aswamukec kagogoŋ ka apedor.

²⁴ Kosodi aswam nakotogo loka Edeke loejai Yerusalem aitananio; aponi kitanaŋai aitodol okaru lokiareit loka airum naka Dario ekabaka loko Perusia.