Read Ateso Esera 5 Bible Online

Esera 5 - Ateso bible

Esera 5

¹ Kosodete inabin, Kagai enabi, ka Sekaria okoku loka Ido, kodwarakis Iyudayan luajaas koYuda ka Yerusalem: kokiror loka Edeke loka Isirael ŋes adwarakiniata kes.

² Kosodi Serubabel okoku loka Sealutiel ka Yesua okoku loka Yosadak anyoun, kogeutu aiduk etogo loka Edeke loejai Yerusalem; kojaas da nepepe kakes inabin luka Edeke kiŋarakinito.

³ Kapaarasia kaŋun kobu Tatenai ekayaiton loka ekekwa juwai, ka Setarbosenai ka lukaupakec mama ejaas, kotemasi kes atiar, “Iŋai bo kiinakini yes ekisil aiduk etogo lo, ka adaun da arwatat na?”

⁴Kasodete aboŋokin kes kwanata ebe, “Lukaŋai bo ikiroria luka ituŋa luedukete etogo lo?”

⁵ Konye itei akoŋu naka Edekekec imakio luka lyudayan, komam itanaŋio aswamukec, aitodol neitodolikinere akiro neejai Dario, kosodi adumun aboŋokinet kobalua kanuka akiro kaŋun.

⁶ Aikopunet naka ebalua loejukakinete Tatenai ekayaiton loka ekekwa juwai, ka Setar-bosenai, ka lukaupake Iparasakain luajaas okekwa juwai, mama ejai Dario ekabaka:

⁷kijukasi ebalua loewadikatai kwanata ebe: “Mama ejai ekabaka Dario ainapakin kere.

⁸Kojenu ekabaka ebe kipou kapotu obuku loka Yuda, togo loka Edeke lokapolon loedukitai kamor nuepolok, ido ibwaikinitai akito toma arwatatin, aswam na da elosi iyatanakin kakukuranut ka arereŋ kotoma akaninikec.

⁹Kasodete aiŋit imakio ŋul katemasi kes atiar, ‘Iŋai bo kiinakini yes ekisil aiduk etogo lo, ka adaun da arwatat na?’

¹⁰Keŋitata da ikiroriakec, aitejenun jo, tetere kiwadikai ikiroria luka ituŋa lueyaitos kes.

¹¹ Kosodete kesi aboŋokin ebe, ‘Kirai isio ikejaanakinak luka Edeke loka akuj ka akwap, kiduki da etogo lokedukitoi apeŋo ikar kwi luipu, loabu ekabaka lokapolon loka Isirael kodaunite aiduk.

¹² Konye kokau kitunyunyurikis lukapapaakosi Edeke loka akuj, kijaik kes akan naka Nebukadanesar ekabaka loko Babulon Ekaludayat, loabu komudia etogo lo, koŋata da ituŋa Babulon.

¹³ Konye kokaru losodit loka Kuro ekabaka loko Babulon, abu ekabaka Kuro kibwaik ekisil aiduk etogo lo loka Edeke.

¹⁴ Iboro da luka esabu ka luka epuesa luka etogo loka Edeke, luabu Nebukadanesar koŋat koyekalu loajai Yerusalem koyaŋa oyekalu loka Babulon, kolem ekabaka Kuro ŋul koyekalu loka Babulon, aponi koinakinai etuŋanan ekekiror Sesebasar, loetaraunit ekayaiton.

¹⁵Kotema ŋes atiar, “Koyaŋa iboro lu, kolot kibwaik toma oyekalu loejai Yerusalem, kodukoi etogo loka Edeke kaiboisike.”

¹⁶ Kosodi Sesebasar abunore, kibwaik apeteta nuka etogo loka Edeke loejai Yerusalem: netikolo ageunere kapaarasia kaŋun kiton kwana eriŋa ca edukio, konye mam edauna.’

¹⁷ Aso do arai itojokit ekabaka, komoai toma aiŋadis naka ekabaka naejai Babulon arai ikote nen, ebe kibwaik Kuro ekabaka ekisil aiduk etogo lo loka Edeke Yerusalem, kijuka ekabaka nuitojokit ŋesi kakiro kaŋun,”