Read Ateso Esera 8 Bible Online

Esera 8 - Ateso bible

Esera 8

¹Lu kes ikapolok luka ikekia luka lukapapaakec, na da ŋes aur naka ŋul kaluauparos kaeoŋ anyoun koBabulon, kairum naka Aratasasata ekabaka.

² Kodwe luka Pinekas, Geresom: kodwe luka Itamar, Daniel: kodwe luka Daudi, Katus.

³ Kodwe luka Sekania; kodwe luka Paros, Sekaria: nepepe kaŋes aponi kimarakinitete kaur naka ikiliok akwatat ka akaisakany.

⁴Kodwe luka Pakat-moab, Eliekoenai okoku loka Serakia; nepepe kaŋes da ikiliok akwat aarei.

⁵Kodwe luka Sekania, okoku loka Yakasiel; nepepe kaŋes da ikiliok akwat auni.

⁶ Kodwe luka Adin, Ebed okoku loka Yonatan; nepepe kaŋes da ikiliok akaisakany.

⁷Kodwe luka Elam, Yesaia okoku loka Atalia; nepepe kaŋes da ikiliok akaisakanykaarei.

⁸Kodwe luka Sepatia, Sebadia okoku loka Mikael; nepepe kaŋes da ikiliok akaisakanykauni.

⁹Kodwe luka Yoab, Obadia okoku loka Yekiel; nepepe kaŋes da ikiliok akwat aarei ka itomon ka lukanykauni.

¹⁰Kodwe luka Selomit, okoku loka Yosipia; nepepe kaŋes da ikiliok akwatat ka akaisakanykape.

¹¹Kodwe luka Bebai, Sekaria okoku loka Bebai; nepepe kaŋes da ikiliok akaisaarei ka lukanykauni.

¹²Kodwe luka Asagad, Yokanan okoku loka Kakatan; nepepe kaŋes da ikiliok akwatat ka itomon.

¹³Kodwe luka Adonikam, lukawasia; lu kes ikecekiroria, Elipelet, Yeuel, ka Semaia, nepepe kakes da ikiliok akaisakanykape.

¹⁴Kodwe luka Bigibai, Utai ka Sabud; nepepe kakes da ikiliok akaisakanykaarei.

¹⁵ Katukonok kes toma ocor loelelei Akaba; kipou kedukuro adaun apaarasia auni: kaŋic ituŋa, ka isasedotin, komam edumuna ediopet kodwe luka Lebi.

¹⁶Kasodi anyaraun Elieser, ka Ariel, ka Semaia, ka Elunatan, ka Yarib, ka Elunatan, ka Natan, ka Sekaria, ka Mesulam, ituŋa lukapolok; ka Yoiarib, ka Elunatan, luaraas ikesisianakinak.

¹⁷Kejuka kes neejai Ido ekapolon loka aibois Kasipia; kalimok nuelimokinete Ido, ka ikeinacan Inetinim, kaibois Kasipia, tetere kiinunete sio ikejaanakinak luka etogo loka Edekewok.

¹⁸ Kanuka akan nakajokan naka Edekewok naajai kaoni, koinutu etuŋanan lokacoa, lokodwe luka Mali, okoku loka Lebi, okoku loka Isirael; ka Serebia, ka odweke ka iinacanake, itomon ka lukanykauni;

¹⁹ka Kasabia, ido nepepe kaŋes Yesaia lokodwe luka Merari, iinacanake ka odwekec, akaisaarei;

²⁰ luka Inetinim, luapotu Daudi ka ikapolok koinakis aijaanakin Ilebin, Inetinim akwat aarei ka akaisaarei: kolimoroi kere ikecekiroria.

²¹ Kasodi alimor ailuŋ kaŋina, kocor Akaba, tetere kitasonikin kakonyen nuka Edekewok, aimo kaneejai ŋesi erot loitenara, lowok, ka loka idwewok ludidik, ka loka iborowok kere.

²² Naarai keleicik ailip ekabaka erioŋet loka iserikalei ka ikebwanenok aigaŋakin korot kama ejaas lukasurup: naarai kipou kenerata kekabaka ebe, “Akan naka Edekekosi ejai kaŋul kere kaluemoete ŋes, kanuka ajokis; konye apedorike ka anyunyurake eluikini ŋul kere luinyeinete ŋes.”

²³ Kipou do kaluŋata, keŋaiŋaata Edekewok akirot ŋin: kiira ŋesi aiŋaiŋakosi.

²⁴Kasodi atiakun itomon ka luarei kokapolok luka isasedotin, Serebia, ka Kasabia, ka itomon koinacanakec kakes,

²⁵ ketemok kes epuesa, ka esabu, ka iboro, ŋes ainakinet kanuka etogo loka Edekewok naainak ekabaka ka ikekenerunak, ka ikapolokoke, ka Isirael kere luajaas nen:

²⁶Ketemok cut akanikec atalatan nuka epuesa akwat akanykape ka akaisakany, ka iboro luka epuesa atalatan akwatat; esabu da atalatan akwatat:

²⁷ka atiboi nuka esabu akaisaarei nuka idarikin elukumit; ka iboro iarei luka aisinit naejok naiputut, luka akais nuipu bala esabu.

²⁸ Kabala kes atiar, “Iraas yesi lukalaunak mama ejai EJAKAIT, iboro da eraas lukalaunak; epuesa ka esabu kes ainakinet naka akot mama ejai EJAKAIT, Edeke loka lukapapaakus.

²⁹ Kokwenyete, kidarete; aitodol naitemioto kes kakonyen nuka ijaka luka isasedotin ka Ilebin, ka ikapolok luka ikekia luka lukapapaa luka Isirael, koYerusalem, kotoma agolai nuka etogo loka EJAKAIT.”

³⁰Kesodete isasedotin ka Ilebin aijaun aitemis naka epuesa ka esabu, ka iboro, ayaŋaar Yerusalem togo loka Edekewok.

³¹ Kasodete kanyout kocor Akaba kapaaran nakitomonet kaarei naka elap losodit alosit Yerusalem: kojai akan naka Edekewok kaoni koyu kakan naka lukasurup ka ikaperunok korot.

³² Kapotu Yerusalem, kadautu da apaarasia auni kanen.

³³Kapaaran nakiwoŋonet aponi kitemoi epuesa ka esabu ka iboro kotogo loka Edekewok kakan naka Meremot okoku loka Uria esasedoti; nepepe kaŋes ajai Eleasar okoku loka Pinekas; nepepe kakes ajai Yosabad okoku loka Yesua, ka Noadia okoku loka Binui, Ilebin;

³⁴kere kwape ejaar ekecetiai ka akecelaŋir da: kiwadikai alaŋiru kere kapakio kaŋun.

³⁵ Koinakis idwe luka aijoreorio lukaboŋunok kaireŋeario ainakineta nuicweio mama ejai Edeke loka Isirael, imoŋin lutoba itomon ka luarei kanuka Isirael kere, imerekekin akaisakanykaoŋon ka lukanykape, imerekekin ludidik akaisakanykaarei ka lukanykaarei, ka ikorwa itomon ka luarei araut ainakinet naka adiakaret: koraunos ŋul kere ainakinet naicweio mama ejai EJAKAIT.

³⁶ Koinakis lukibukui luka ekabaka, ka ikayaitok lukokekwa juwai aicorakineta nuka ekabaka: kisigalikis ituŋa ka etogo loka Edeke.