Read Ateso Nekemia 11 Bible Online

Nekemia 11 - Ateso bible

Nekemia 11

¹ Kiboienenete ikapolok luka ituŋa ko Yerusalem: kilamilamata eroet icetuŋa da, alemun idiopet kotomon aiboikin Yerusalem ere loka launan, ka kwi da ikanykaoŋon aiboikin oreria ice.

² Kosodete ituŋa ailipakin arereŋ ikiliok kere lueŋasikina aiboikin Yerusalem.

³ Lu kes eraas ijaka luka ebuku lueboienenete koYerusalem: konye koreria luka Yuda kojaenena ŋinituŋanan alupoke kotoma oreriakec, Isirael, isasedotin, Ilebin, Inetinim, ka idwe luka ikejaanakinak luka Solomon.

⁴ Kojaenenas koYerusalem ice kodwe luka Yuda, ka lukodwe luka Benyamin. Kodwe luka Yuda; Ataia okoku loka Usia, okoku loka Sekaria, okoku loka Amaria, okoku loka Sepatia, okoku loka Makalalel lokodwe luka Peres;

⁵ka Maaseia okoku loka Baruk, okoku loka Kol-kose, okoku loka Kasaia, okoku loka Adaia, okoku loka Yoiarib, okoku loka Sekaria, okoku loka Esilonit.

⁶Odwe luka Peres kere luajaenenas koYerusalem emwaasi ituŋa luetitiŋ akwat aoŋon ka akaisakanykape ka lukanykauni.

⁷Lu kes odwe luka Benyamin; Salu okoku loka Mesulam, okoku loka Yoed, okoku loka Pedaia, okoku loka Kolaia, okoku loka Maaseia, okoku loka Itiel, okoku loka Yesaia.

⁸Kotupite ŋes Gabai, Salai, akwat akanykaoŋon ka akaisaarei ka lukanykauni.

⁹Kerai Yoel okoku loka Sikiri ekaanyanaranikec: kiareikin Yuda okoku loka Kasenua ayait ere.

¹⁰ Lukosasedotin: Yedaia okoku loka Yoiarib, Yakin.

¹¹Seraia okoku loka Kilikia, okoku loka Mesulam, okoku loka Sadok, okoku loka Meraiot, okoku loka Akitub, ekayaiton loka etogo loka Edeke.

¹²Ikeceinacan lueswamaenenete aswam naka etogo, akwat akanykauni ka akaisaarei ka luarei: ka Adaia okoku loka Yerokam, okoku loka Pelalia, okoku loka Amisi, okoku loka Sekaria, okoku loka Pasur, okoku loka Malikiya,

¹³ka ikeinacan, ijaka luka ikekia luka lukapapaakec, akwat aarei ka akaisaoŋon ka luarei: ka Amasisai okoku loka Asarel, okoku loka Akasai, okoku loka Mesilemot, okoku loka Imer,

¹⁴ka ikeceinacan, ituŋa lukirigin luetitiŋ, akwatat ka akaisaarei ka lukanykauni: Sabidiel okoku loka Kagedolim ŋes ekaanyanaranikec.

¹⁵Lukolebin: Semaia okoku loka Kasub, okoku loka Asirikam, okoku loka Kasabia, okoku loka Buni;

¹⁶ ka Sabetai ka Yosabad lukojaka luka Ilebin, luaanyanarete aswamisio nukokiŋa nukotogo loka Edeke.

¹⁷ Ka Matania okoku loka Mika okoku loka Sabidi, okoku loka Asap, lokerai lokapolon aiŋarenikin aimal naelipenenata, ka Bakabukia, lokiareit koinacanake; ka Abuda okoku loka Samua, okoku loka Galal, okoku loka Yedutun.

¹⁸ Ilebin kere luajaas ore lokalaunan emwaasi akwat aarei ka akaisakanykauni ka luoŋon.

¹⁹ Bobo da ikagolok, Akub, ka Talumon, ka ikeceinacan, luedarete irutei, emwaasi akwatat ka akaisakanykaarei ka luarei.

²⁰Luasalakinete luka Isirael, luka isasedotin, Ilebin, ajaenenas koreria kere luka Yuda, ŋinituŋanan kairumeteke.

²¹ Konye kiboikinos Inetinim koOpel: kopolokinito Sika ka Gisipa Inetinim.

²²Ido ekaanyanaran loka Ilebin ko Yerusalem ŋes Usi okoku loka Bani, okoku loka Kasabia, okoku loka Matania, okoku loka Mika, lokodwe luka Asap, ikayook, loayait aswam naka etogo loka Edeke.

²³ Naarai abu ekabaka kicorakinite nukec, ka aicorakinet naicasit kanuka ikayook, kwape ejaar eipud loka ŋinipaaran.

²⁴ Kojai Petakia okoku loka Mesesabel, lokodwe luka Sera okoku loka Yuda, kakan naka ekabaka kanuka akiro kere nuka ituŋa.

²⁵ Lukoreria, ka imanikoriakec, kiboienenete ice kodwe luka Yuda koKiriat-araba, koreriake da, koDibon ka ireriake, koYekabeseel ka ireriake da.

²⁶KoYesua da, ka Molada, ka Bet-pelet;

²⁷koKasar-sual da, ka Beer-seba ka ireriake;

²⁸koSikilag, ka Mekona ka ireriake;

²⁹koEnrimon, ka Sora, ka Yaramut;

³⁰Sanoa, ka Adulam, ka ireriakec, Lakis ka imanikoriake, Aseka da ka ireriake. Kidukuroto anyoun koBeer-seba kiton aditot naka Kinom.

³¹Kiboienenete da idwe luka Benyamin anyoun koGeba ape, koMikimas ka Aiya, koBet-el ka ireriake;

³² koAnatot, ka Nob, ka Anania;

³³ka Kasor, ka Rama, ka Gitaim;

³⁴Kadid, Seboim, Nebalat;

³⁵ Lod, ka Ono, aditot naka ikeswamak luepiriaka.

³⁶ LukoLebin, kimorikikinos irioŋeta ice koYuda ka Benyamin.