Read Ateso Nekemia 4 Bible Online

Nekemia 4 - Ateso bible

Nekemia 4

¹ Konye kepupu Sanabalat kwape kidukio isio arwatat, konyunyurikin, kisiop noi, kisekel Iyudayan.

²Kiner kakonyen nuka iinacanake ka ajore naka Samaria, kobala ebe, “Iswamaete inyo Iyudayan lu lukalanyak? Ekotosi kereka abwaun bobo? Ekotosi ainakin asuban? Ekotosi adaun kapaaran adiopet? Ekotosi aisikwarun amor katukon nuka aapoŋor, naarai icweitai?”

³ Kosodi Tobia Emonait loedunyas kaŋes kotema atiar, “Kaŋin da yenedukito kesi, arai kicaka ekue, ebilibilei arwatatakec nakamor.”

⁴ Kiira ijo, wu Edekekosi; naarai kimeni: kinyakak amorositikec akwesikec, kokorak aŋatario kakwap nakaijoreorio:

⁵ sirikirapak numam adolitekec, aronisikec da kinyek amwatario kakonyenekon: naarai kitunyunyurikis jo kakonyen nuka ikadukok.

⁶Kasodete kadukoto arwatat; arwatat kere kimorikikin nepepe aitodol atutubet naka amukururuke: naarai apotu ituŋa kibwaikis itauon aswam.

⁷Konye kepuput Sanabalat, ka Tobia, ka Iarabun, ka Imonain, ka Isudodain, ebe iyatanakin aswam naka aiteteun arwatatin nuka Yerusalem, ageun da ainwok arorwaitin, konyunyurikinos noi;

⁸ kinerutu kere nepepe aponare aitiji Yerusalem, aisiyaloŋoŋ lukotoma.

⁹ Konye kipou kelipata mama ejai Edekekosi, aibwaikin da ikekwenyanarak paaran ka kuare da kanukec.

¹⁰Kotema Yuda atiar, “Eŋoŋar agogoŋ naka ikebwokak abwokon, ipu aapoŋor; tape mam kipedori aiduk arwatat.”

¹¹Kotemasi lukasurupokosi atiar, “Mam ejenunete, karaida aanyun, aitodol nekilomaria kidiŋikec, kasodete aiar, ketanaŋata aswamukec.”

¹²Kosodi kanen, kepotu Iyudayan luaraas iidunyetakec, kolimokis kesi sio aatenak atomon kaiboisio kere ebe, “Ibusakinit koboŋut mamakosi.”

¹³Ŋes kebwaikinia ituŋa toma atutubeta nuijesakina kapak naajai kau karwatat, kaiboisio nuelapat, kebwaik do ituŋa kwape ajaatar ikekiakec, kojaas da kikileŋakec, ka akwarasikec, ka akabwaikec da.

¹⁴ Kasodi kasesen, kanyou, katema isotia, ka ikayaitok, ka ituŋa ice atiar, “Sirikiyoŋa kes: kiitunitos EJAKAIT, loepol lokaŋosibib, kojiosi kanuka iinacanakus, ka idwekus, lusap ka lupesur, ka aŋorokus ka itogoikus da.”

¹⁵ Kosodi kanen, kepuputu lukasurupokosi ebe ajenun kamakosi, ido etapalau Edeke akeceinerun, kasodete isio kere aboŋor mama ejai arwatat, ŋinituŋanan toma aswamuke.

¹⁶Kosodi kanen, agear kapak kaŋin, eswamaenenete atutubet naka ikakejaanakinak aswam, kitiŋito atutubet kakesi akwaras, ka ibukui, ka akabwai, ka ikootin luka asua; kojaananas ikayaitok kau kekek kere loka Yuda.

¹⁷ Ŋul luadukenenete arwatat, ka ŋul luebwokenenete abwokon kigugunatos, kiswamai ŋinituŋanan aswam kadiopekan, kitiŋite nace da yenijiisike.

¹⁸Ikadukok da, koenikinite ŋinituŋanan ekileŋike aŋabeteke, kodukenenei kwaŋin. Ŋol da loakusenenei arupepe kijaenena keoŋ.

¹⁹Kalimoki isotia, ka ikayaitok, ka ituŋa ice ebe, “Epol aswam, elal da, kiderakina oni karwatat, elwanikina ŋinituŋanan ka yenice:

²⁰ kotoma ŋiniibois naiirariata eporoto loka arupepe, kokerununete ayuun sio; kijiikini Edeke oni.”

²¹Kasodete keswamaenenete aswam: kitiŋenenete atutubetekec akwaras ageun ecilakide kiton neetakanuniata aacer.

²²Ido toma apak kaŋin kalimok ituŋa ebe, “Koperenenei ŋinituŋanan ka ekekejaanakinan toma Yerusalem, koraananas ikedarakakosi kuare, ido kitaaritos paaran.”

²³Kanuka ŋun mam kilacununei inapenekosi, karaida eoŋ karaida ikainacan, karaida ikakejaanakinak, karaida ituŋa lukedarak lukatupito eoŋ, kolosenenei ŋinituŋanan atan itiŋit yenijiisike.