Read Ateso Nekemia 9 Bible Online

Nekemia 9 - Ateso bible

Nekemia 9

¹ Kapaaran naka akaisaarei ka nuoŋon naka elap kalo ajaas idwe luka Isirael etukonokina kanuka ailuŋ, konapitos ipukoi, kojukitos da alup.

² Kotiakar aur naka Isirael komo kere, kobwaata kolimonosi aronisiokec ka numam adolit nuka lukapapaakec.

³ Kobwaata kaiboisiokec, kosiomata kotoma oitabo loka ikisila luka EJAKAIT Ekecedeke kodaut atutubet nakiwoŋonet naka apaaran; atutubet ace nakiwoŋonet kolimosi, komaata EJAKAIT Ekecedeke.

⁴Kosodete kobwaata Yesua, ka Bani, ka Kadumiel, ka Sebania, ka Buni, ka Serebia, ka Bani, ka Kenani, kadoketa nuka Ilebin, komonyakis EJAKAIT Ekecedeke keporoto loepol.

⁵ Kosodete Ilebin, Yesua, ka Kadumiel, ka Bani, ka Kasabaneia, ka Serebia, ka Kodia, ka Sebania, ka Petakia, kotemasi atiar, “Kobwaata, kimalata EJAKAIT Ekusideke, ameun ikar luŋo kiton ikar kere: kituritete ekonikiror loka aibuses, loitopolooritai aitelekarite aimal ka aiturit kere.

⁶ “Ijo EJAKAIT, ijo bon ba, ibu kosub akuj, akui naka akuj, ka ajorekec kere, akwap ka iboro kere luejaas toma, aŋololin da ka luejaas tomakec kere, ijo idari kes kere; kimai jo ajore kere naka akuj.

⁷ Irai ijo EJAKAIT Edeke, loabu koseu Aburam ka alemun ŋes kour loka Ikaludean, kosodi amaikin ŋes ekiror Aburaam;

⁸ ibu kodum eketau erai lomunot kakonyenekon, kosodi kitutuk kaŋes aitutuket ainakin akwap naka Ekanaanit, ka Ekitit, ka Emorait, ka Eperisit, ka Eyebusit, ka Egirugasit, ainakin aurike, ido ibu ijo kitodolik akonikiro; naarai irai ijo loidolit.

⁹“Ido ibu koany aiticanitoi naka lukapapaakosi koMisiri, kosodi apupun aimonyokec kariri naka Aŋolol Nakareŋan;

¹⁰ kitodu da aanyuneta ka nukaumokin kama ejai Parao, ka ikekejaanakinak kere, ka ituŋa kere luka akwapuke; naarai ibu kojen eiturikec kamakec; kodumunia ekiror, kwape ejaar lolo.

¹¹Ido ibu kotiak aŋolol kakonyenekec, kitoroto kidiŋ kaŋolol kakwap naeonit; ŋul da luebwapitos kes ibu kocakak ataro, kwape ecakarere amoru toma akipi nuegogoŋ.

¹² Ido bobo ibu kiŋarenikinite kes kopir loka edou paaran; kopir da loka akim kuare; acaikinite kes korot lotikitoroto.

¹³ Ido ibu kodoku komoru Sinai, kinere kakes ijai toma akuj, kosodi ainakin kes itubesia luetenito, ka ikisila lukabeit, apucuneta ka aicorakineta nuejok.

¹⁴ Kitejenu kes asabatokon nakalaunan, kicorak kes aicorakineta, ka apucuneta, ka ekisil, kama ka Musa ekonikejaanakinan.

¹⁵ Koinak da inyamat luapote kokuju kanuka eteneikec, kitolomik kes akipi kotoma atiida kanuka akurekec, kicorak kolomasi airum akwap naibu korio akonikan ainakin kes.

¹⁶ “Konye kes ka lukapapaakos kiswamata keitur, kitininikata imurisiŋakec, komam epupunete aicorakinetakon,

¹⁷ koŋeroto arimar, mam da apotu kiitutu nnkaumokinikon nuibu kosub kotomakec; konye kitininikata imurisiŋakec, kibwaikis ekayaiton kipaliikis aboŋor obulesenekec, konye irai ijo Edeke loitemonokino aision, lokasianut, loileleba aitim, loiyapi anyunyurtkin, loepol aitim, mam ibu kojal kes.

¹⁸Eebo, kedautu kesi asubun itaok yenicalara, kobalas ebe, ‘Yen ŋes Edekekon lokitolomuni koMisiri,’ ido kiswamatos nukitunyunyurikinete noi;

¹⁹ konye ijo kanuka aitimikon nakiponesio luipu mam ibu kojalak kes kamodiŋ: mam epir loka edou anyoununei kamakec paaran, aiŋarenikinite kes korot; karaida epir loka akim kuare, acaikinite kes, aitodikinitor erot lotikitoroto.

²⁰ Ido ibu koinak ekonimoyo lokajokan aituutoonor kes, mam ibu kimik emanukon aitukekec, ibu koinak kes akipi kanuka akurekec.

²¹ Eebo, ibu kitanenenei kes ikar akaisaoŋon kamodiŋ, komamei ibore yenepudasi; mam ikecenapen amojoŋenenete, mam akecekejen abuununete.

²²Ido ibu koinak kes ajakanuto ka atekerin, nuibu kokorak kwape ejaatar akorakinetakec: kosodete airum akwap naka Sikon, akwap naka ekabaka loka Kesibon, ka akwap naka Og ekabaka loka Basan.

²³ Ido ibu kitupuu ikecedwe kwape aacer nukokuju, kitolomik da kes akwap, naibu kolimok lukapapaakec ebe elomarete airum.

²⁴Aso kolomasi idwe kirumata akwap, ibu kipiko lueboiete kakwap, Ikanaanin, kakonyenekec, kijaik akaninikec, ka ikabakanakec, ka atekerin nuka akwap, kiswamakis kes kwape kekotototor.

²⁵ Kirumata ireria luabwaitai, ka akwap napusuk, kirumata itogoi luileleba iboro kere lukajokak, amototin nuabokok, imanikoria luka emusabibu ka luka iseitunin, ka ikito luipu noi luka araito; aso konyamata, kimonikinos, kotumata, kisiyalamanakinete ajokisikon naepol.

²⁶ “Konye komam erimarito, kipalionokinete jo, kocakasi ikonikisila kaukec, koarata inabinokon luetejenanakinete neejaas kesi aibelokin kes bobo neijai ijo, kiswamaenenete nukitunyunyurikinete noi.

²⁷Ŋes ibu kijaikinia kes akan naka lukasurupokec, luesiyaloŋoŋoete kes: aso kapak naka icanikec naamonyenenata neijai, kopupununei ijai toma akuj; kwape ejaar akoniitim nakiponesio luipu koinak kes iketajarak luetajarenenete kes kakan naka lukasurupokec.

²⁸Konye nakedaununiata aiyeŋun, kiswamata bobo aronis kakonyenekon; ŋes ibu kinyeinia kes akan naka lukasurupokec ayaite koyata kes: konye nakeboŋununioto, komonyakis jo, kopupununei ijai toma akui; koyuununei kes irwanipu kwape ejaar akoniitim.

²⁹ Kitejenikin mama ejaas kesi, kosodi kinyaku bobo okisilakon: konye kiswamatos keitur, komam epupunete aicorakinetakon, konye kodiakanarete itubesiakon, (lutikiswama ituŋanan, tetere ejari kotomakec,) kolemununete kokeperinikec, kitininikata imurisiŋakec, koŋeroto apupun.

³⁰ Konye kotitiŋonokini kes ikar luipu, kitejenikin mama ejaas kesi komoyokon kotoma onabinokon: konye koŋeroto aitoikin akit: ŋes ibu kokorakinia kes akan naka ituŋa luka akwapin.

³¹ Konye kanuka aitimikon naka iponesio luipu mam ibu kodau kes cut, karaida aijal kes; naarai irai ijo Edeke lokasianut ido loketimon.

³² “Aso do wu Edekekosi, Edeke lokapolon, lokapedor, lokaŋosibib, loiricit aitutuket ka aitim, aitaaritoi kere nakidolokinit sio, ka ikosikabakan, ka ikosikapolok, ka isasedotinikosi, ka inabinokosi, ka ikonituŋa kere, agear apak naka ikabakan luka Asuria kiton lolo kinyek asubite bala edit kakonyenekon.

³³ Konye irai ijo lokadoliton kakere nukidolokinete sio; naarai ibu kiswamaenenei nukabeit, konye sio kipou keswamaenenete nueroko:

³⁴karaida ikabakanakosi, ka ikapolokokosi, ka isasedotinikosi, karaida lukapapaakosi mam apotu koricenenete ikonikisila, kwabo mam eiranarete aicorakinetakon, ka aitejenunetakon, nuitejenanakini ijo kes.

³⁵Naarai mam apotu kijaanakis jo kotoma ajakanutukec, ido kotoma ajokisikon naepol naibu koinak, ido kakwap naepol napusuk naibu koinak kakonyenekec mam apotu kibelokinos anyoun kaswamisiokec nueroko.

³⁶ Koany, kirai lolo ibulesin, akwap da naibu koinak lukapapaakosi anyamenen araitokeŋ ka aiokisiken, koany, kirai isio ibulesin kotomake.

³⁷ Ido einakini ameda naepol ikabakan luibu ijo kibwaik ayait sio kanuka adiakanaretakosi: ido ejaas kes kapedor kawatekosi, ka ibarenekosi, kwape itojokitotor kesi, kianyu isio ican luipu.”

³⁸Karaida kejaas ŋun kwaŋin konye kitutukinit aitutuket nakabeit, kiwadika da; ipucakinete da ikosikapolok, ka Ilebinikosi, ka isasedotinikosi aanyunetakec.