Read Ateso Esita 2 Bible Online

Esita 2 - Ateso bible

Esita 2

¹ Akaulo kaŋun, nakiyamakinor anyunyura naka ekabaka Akasuero, kiitu Basiti, ka nueswama ŋesi, ka naaponi kisilakinai mamakeŋ.

² Kosodete ikejaanakinak luka ekabaka luijaanakinete ŋes atemari ŋes atiar, “Mere komoikinai ekabaka abekon nukatumunak nuitemelelas:

³koseu ekabaka ijaka kobukui kere luka ajakanutuke, kotukonokis abekon kere nukatumunak nuitemelelas Susa togo lokapolou, togo loka aŋor, toma akan naka Kegai ebwacit loka ekabaka, ekedaran aŋor; kijaikinai iborokec luka aitesegaario:

⁴apese da naitojokit ekabaka koraun akabaka aibois naka Basiti.” Kitalaka akirot ŋin ekabaka; kiswama kwaŋin.

⁵Kojai Eyudayat toma Susa togo lokapolou, ekekiror Morudekai, okoku loka Yair, okoku loka Simei, okoku loka Kis, Ebenyamenit:

⁶ lokeyanaario ko Yerusalem nepepe ka luejoreunitai ka Yekonia ekabaka loka Yuda, loabu Nebukadanesar ekabaka loko Babulon koyaŋa.

⁷Kitanu ŋesi Kadasa, ŋes Esita, akoku naka papake lodidi: naarai amamei ŋin papa karaida toto, etemelel apese ajok asesen noi; ketwana papake ka totoke, koyaŋa Morudekai ŋes araun akokuke.

⁸Kosodi kanen, kepupun aicorakinet naka ekabaka, ka ekekisil, kotukokinitete apesur nuipu Susa togo lokapolou, akan naka Kegai, koyaŋaarai Esita togo loka ekabaka, kotoma akan naka Kegai, ekedaran loka aŋor.

⁹Kisiyalamik ŋes apese, kodum asianut kamakeŋ; kisunya ŋesi ainakin ŋin iboroke luka aitesegaario, ka akorakinetake, ka apesur akanykaarei nuibusakinit ainakinio kotogo loka ekabaka: abu kiloco ŋes ka apesuruke kitolomik kes aibois naitelekarit ajokis kotogo loka aŋor.

¹⁰ Mam abu Esita kitejenu atekerike ka ikeinacan: naarai abu Morudekai kieorite ŋes ebe sirikitejenu.

¹¹Kitorenenei Morudekai nolikolonit kiŋaren kalaro naka etogo loka aŋor, ajenun kwape ejaar Esita, ka nuedoikinete ŋes.

¹²Kedol abeikin naka ŋinipese alomar mama ejai ekabaka Akasuero, kedaun ŋes aiswamakinio kwape ejaar ekisil loka aŋor, ilapio itomon ka luarei, (naarai kedoloto kwaŋin apaarasia nuka aitesegaariokec, kes ilapio ikanykape akinyet naka luesaete, ka ilapio ikanykape aures namaa, ka iboro luka aiteseg aŋor,)

¹³ŋes do ebunio apese mama ejai ekabaka, koinakinai ŋes nuekoto kere alosit kaŋes enyouni kotogo loka aŋor alomar togo loka ekabaka.

¹⁴Elosi ŋesi eboŋ, kobonun tupuruc toma togo lokiareit loka aŋor, akan naka Saasagas, ebwacit loka ekabaka, loidari abusian: mam bobo ŋin alomanar mama ejai ekabaka, dimikito isiyalamikinit ekabaka, enyaraunitai ekirorike.

¹⁵ Kosodi nakedolio abeikin naka Esita, akoku naka Abikail papa lodidi loka Morudekai, loabu koya ŋes araun akokuke, alomar mama ejai ekabaka, mam abu kipuda ibore dimarai luaseiki ŋes Kegai ebwacit loka ekabaka, ekedaran loka aŋor. Kominunai Esita kakonyen nuka ŋul kere luasesenete ŋes.

¹⁶ Aponi Esita koyaŋaarai mama ejai ekabaka Akasuero toma togoke loka akabakane olap lokitomonet, ŋes elap Tebet, okaru lokikanyetekaarei loka airumuke.

¹⁷ Komina ekabaka Esita aitelekarit aŋor kere, kodum ŋes asianut ka aminunio kakonyeneke aitelekarit abekon kere; kibwaik ŋesi aboko naka akabakane akouke kitarau ŋes akabaka aibois naka Basiti.

¹⁸ Kosodi ekabaka aipoikin ikapolokoke ka ikejaanakinakake epucit loepol, ŋes epucit loka Esita; koinak ibukui aitimio, kokor ainakineta, kwape ajaar aikor naka ekabaka.

¹⁹ Naatukokinotor abekon irwan nakiareit, abu Morudekai kiboikin orute loka ekabaka.

²⁰Mam ber Esita etejenunit ikeinacan ka aketeker; kwape ecorakinia Morudekai; naarai kiswama Esita aicorakinet naka Morudekai, kwape eswamaenena eroko ŋesi esai ŋes.

²¹Apaarasia kaŋun iboie Morudekai korute loka ekabaka, konyunyurikinos ibwacin iarei luka ekabaka, Bigitan ka Teres, kaŋul luidarete ekek, komoata aikamun ekabaka Akasuero.

²² Kojenu Morudekai, kitejenu ŋesi Esita akabaka; kolimok Esita ekabaka ŋun kokiror loka Morudekai.

²³ Kedautu aiŋic akiro ŋun, apotu kotakanut ebe ikote nen, aponi kes kere iarei kikajakinai okitoi: aponi kiwadikai da oitabo loka aisiitonokin kakonyen nuka ekabaka.