Read Ateso Esita 3 Bible Online

Esita 3 - Ateso bible

Esita 3

¹ Akaulo kaŋun kodakak ekabaka Akasuero Kaman okoku loka Kamedata Egagait, kitopolo ŋes, kitodok ekeicoloŋ kuju aitelekar ikapolok kere luajaas kaŋes.

² Kokukumoto ikejaanakinak kere luajaas orute loka ekabaka, kisudedoto Kaman: naarai abu ekabaka kicorakinite kwaŋin kanuke. Konye mam abu Morudekai kokukumik ŋes karaida aisudedikin ŋes.

³Kosodete ikejaanakinak luka ekabaka luajaas orute loka ekabaka atemar Morudekai atiar, “Kanukinyo idiakaria aicorakinet naka ekabaka?”

⁴Kosodi kanen, naenerananatar kaŋes ŋinipaaran, komam ŋes epupuni kes, kolimokis Kaman, aanyun arai ca eketakinos akiro nuka Momdekai: naarai abu kolimokinite kes ebe erai ŋesi Eyudayat.

⁵ Keanyu Kaman ebe mam Morudekai ekukumit karaida mam abu kisudedikin ŋes, konyunyurikin Kaman noi.

⁶ Konye komwaŋ aikamun Morudekai bon; naarai aponi kitejenikinitete ŋes ateker naka Morudekai: kanuka ŋun komoote Kaman amudiar Iyudayan kere luajaas anatar ajakanut kere naka Akasuero, ŋes ateker naka Morudekai.

⁷ Kolap losodit, ŋes elap Nisan, kokaru lokitomonet kaarei loka ekabaka Akasuero, kilamilamata Pur, kes iroeta, kakonyen nuka Kaman ŋinipaaran, ka ŋolilap, kiton olap lokitomonet kaarei, ŋes elap Adar.

⁸ Kotema Kaman ekabaka Akasuero atiar, “Ejaas ituŋa luisiarakina aikaara toma atekerin kobukui kere luka ajakanutukon; kogelara ikisilakec kaŋul luka ateker ace; mam kes ericete ikisila luka ekabaka: kanuka ŋun mam ajokis ekabaka aeamakinit kes.

⁹Arai kitojok ekabaka, kiwadikai komudiarai: atacakini eoŋ atalatan alukumin atomon nuka epuesa akanin nuka ŋul kaluidarete akiro nuka ekabaka, ayaun toma aiŋadisia nuka ekabaka.”

¹⁰ Kolaca ekabaka ekegilut kakanike, koinak Kaman okoku loka Kamedata Egagait, lokasurup loka Iyudayan.

¹¹Kotema ekabaka Kaman atiar, “Kiinakinitai jo epuesa, ka ituŋa da, aiswamakin kes kwape itojokitor.”

¹² Kosodete konyaraunai ikewadikak luka ekabaka kolap losodit, kapaaran nakitomonet kauni, aponi kiwadikai kere kwape ajaatar nuecorakini Kaman lukibukui luka ekabaka, ka ikayaitok luka ŋolibuku, ka ikapolok luka atekerin kere; mama ejai ŋolibuku kwape ejaar eiwadikaeke, ka ŋiniteker kwape ejaar aŋajepeke; ewadikatai kokiror loka ekabaka Akasuero, kipucakinai da aanyunet kegilut loka ekabaka.

¹³ Kijukarai ibaluan kikakerak obukui kere luka ekabaka, amudiar, aiar, ka aidany Iyudayan kere, ludidik ka imoionai, idwe ludidik ka aŋor, kapaaran adiopet, ŋes apaaran nakitomonet kauni naka elap lokitomonet kaarei, ŋes elap Adar, ayaŋaar da lunatunakec araun imejan.

¹⁴ Aponi kokorai aikopunet naka aiwadikaet mama ejaas ibukui kere, tetere elimorio ekisil atekerin kere, tetere ekapanakinos apaaran ŋin.

¹⁵ Kiwonyas ikakerak kanuka aicorakinet naka ekabaka, kolimoroi da ekisil koSusa togo lokapolou: kiboikinos ekabaka ka Kaman aimat; konye kobuonokinos lukore loka Susa.