Read Ateso Esita 6 Bible Online

Esita 6 - Ateso bible

Esita 6

¹ Kakuare kaŋin abu kikoler ekabaka; kicorak ayaun eitabo loka aisiitonokin, kosiomai kakonyen nuka ekabaka.

²Aponi kodumunai iwadi katai ebe alimo Morudekai nuka Bigitana ka Teres, iarei kobwacin luka ekabaka, kaŋul kaluedarenenete ekek, luapotu kotamito aikamun ekabaka Akasuero.

³ Kotema ekabaka atiar, “Aibuses anyoin ka apolou aponi kiswamaldnai Morudekai kanuka ŋun?” Kosodete ikejaanakinak luka ekabaka luijaanakinete ŋes atemar ebe, “Mam ibore aponi kiswamakinai ŋes,”

⁴ Kotema ekabaka atiar, “Iŋai bo ejai alaro?” Alomunit do Kaman alaro nakokiŋa naka etogo loka ekabaka, ainerun ka ekabaka aikajakin Morudekai akito nuabu kosipokinite ŋes.

⁵Kotemasi ikejaanakinak luka ekabaka ŋes atiar, “Koany, ebwoi Kaman kalaro.” Kotema ekabaka atiar, “Kolom bo.”

⁶Kolom do Kaman. Kotema ekabaka ŋes atiar, “Ikwaikinio bo ai etuŋanan loisiyalamikinit ekabaka ainakin aibuses?” Kobala do Kaman kotauke ebe, “Iŋai bo ti loisiyalamikinit ekabaka ainakin aibuses adepar ca eoŋ?”

⁷Kotema Kaman ekabaka atiar, “Etuŋanan loisiyalamikinit ekabaka ainakin aibuses,

⁸ koomai anapito nuka ekabakane, nulem enapenenei ekabaka, ka ebalasit loibwanenenei ekabaka, konapakinai da aboko naka ekabakane;

⁹ kijaikinai anapito ka ebalasit akan naka ediopet kokapolok luka ekabaka loitelekarit aibuses, kitanapai ŋun etuŋanan loisiyalamikinit ekabaka ainakin aibuses, kisibwanen ŋes ebalasit aitor orot loka ere, kolimo kakonyeneke ebe, ‘Ikwaikinio nen etuŋanan loisiyalamikinit ekabaka ainakin aibuses.’ ”

¹⁰ Kosodi ekabaka atemar Kaman atiar, “Kiwonya kolem anapito ka ebalasit, kwape ibalar, kiswamak Morudekai Eyudayat, loiboie korute loka ekabaka, kwape ibalar: kinye akurwokin adiokirot kaŋun kere nuibala.”

¹¹Kosodi Kaman ayaŋaar anapito ka ebalasit, kitanapik Morudekai, kisibwanen aitor orot loka ere, kolimo kakonyeneke ebe, “Ikwaikinio nen etuŋanan loisiyalamikinit ekabaka ainakin aibuses.”

¹² Koboŋo Morudekai orute loka ekabaka. Konye kiwonya Kaman alosit oreke, ekadakinit kimukorite da akekou.

¹³Kitatamik Kaman Seres akeberu ka ikepapero kere nuadoikinito ŋes kere, Kosodete iketuŋa lukacoa ka Seres akeberu atemar ŋes atiar, “Morudekai loigeu ijo aibiror kakonyeneke, arai erai loka aur naka lyudayan, mam ipikori ijo ŋes, konye abeit ibirori kakonyeneke.”

¹⁴Eriŋa kesi inerasi kaŋes, kopotu ibwacin luka ekabaka, kisunyasi ayaare Kaman opucit loepoit Esita.