Read Ateso Esita 8 Bible Online

Esita 8 - Ateso bible

Esita 8

¹ Kapaaran kaŋin abu ekabaka Akasuero koinak Esita akabaka etogo loka Kaman lokasurup loka Iyudayan. Kobu Morudekai kakonyen nuka ekabaka, naarai abu Esita akabaka kolimok kwape ejaar kamake.

² Kolacu ekabaka egilutuke loalemun kama ka Kaman, koinak Morudekai. Kibwaik Esita Morudekai ayait etogo loka Kaman.

³Kinera bobo Esita kakonyen nuka ekabaka, kibirokin akejeneke, kiŋaiŋa ŋes emonyi akiyo alemar aronis naka Kaman Egagait, aibil da eboteteke mama ejaas Iyudayan.

⁴ Kosodi ekabaka arior esas loka esabu mama ejai Esita, Konyou do Esita, kobwo kakonyen nuka ekabaka.

⁵Kotema atiar, “Arai kitojok ekabaka, arai da kadum asianut kakonyeneke, arai kesub akirot bala edolit kakonyen nuka ekabaka, eoŋ da esiyalamik akonyeneke, kiwadikai ailoc ibaluan luenerunitor Kaman okoku loka Kamedata Egagait, luewadika amudiar Iyudayari luejaas obukui kere luka ekabaka:

⁶ naarai ekoni apedor ai atitiŋikin asesen aronis naebunokini ituŋaka? Ekoni apedor ai da atitiŋikin asesen amudiar naka lukatekerika?”

⁷ Kosodi ekabaka Akasuero atemar Esita akabaka ka Morudekai Eyudayat atiar, “Koany, ainak Esita etogo loka Kaman, aponi kikajakinai ŋes akito, naarai abu kibwaik akanike oYudayan.

⁸ Kiwadikakis yesi lyudayan, kwape itojokitotor yesi, kokiror loka ekabaka, kipucakis da aanyunet kegilut loka ekabaka: naarai aiwadikaet naiwadikatai okiror loka ekabaka, ido naipucakinitai aanyunet kegilut loka ekabaka, emamei ituŋanan yenepedori ailocokin.”

⁹ Kosodi kapak kaŋin aponi konyaraunai ikewadikak luka ekabaka kolap lokiwuniet, ŋes elap Siban, kapaaranike naka akaisaarei ka nuuni; aponi kiwadikai kere nuabu Morudekai kicorak Iyudayan, ka ibukui, ka ikayaitok, ka ikapolok luka ibukui luejaas anyoun kolndia kiton Etiopia, ibukui akwatat ka akaisaarei ka lukanykaarei, mama ejai ŋolibuku kwape ajaar eiwadikaeke, ka ŋiniteker kwape ajaar aŋajepeke, ka Iyudayan kwape ajaar eiwadikaekec, ido kwape ajaar auaiepekec.

¹⁰ Kiwadik kokiror loka ekabaka Akasuero, kipucak aanyunet kegilut loka ekabaka, kijuka ibaluan koyaŋaasi ikakerak luebwanenito ibalasin, luebwanenito ibalasin luetiroko luetwasamatai aijaanakinia ekabaka, luaurio kosipanloka ekabaka.

¹¹ Kocamak ekabaka Iyudayan luajaas kaŋolire atukonokin, abwoikin aijarakec, amudiar, aiar, ka aidany, apedor kere naka ituŋa ka ebuku kaluekotosi asurokin kes, ka ikecedwe ludidik ka aŋorokec, ayaŋaar da lunatunakec araun imejan,

¹² kapaaran adiopet kobukui kere luka ekabaka Akasuero, ŋes nakitomonet kauni naka elap lokitomonet kaarei, ŋes elap Adar.

¹³ Aponi kokorai aikopunet naka aiwadikaet mama ejaas atekerin kere, tetere elimoro ekisil kanolibuku, kokapakina da Iyudayan kebu apaaran ŋin ainyaŋ lukasurupokec.

¹⁴Kolomasi do ikakerak ibwanenito ibalasin luetiroko luetwasamatai aijaanakinia ekabaka, kobubuakinai kisuburikinai kaicorakinet naka ekabaka; kolimoroi da ekisil koSusa togo lokapolou.

¹⁵ Koloma Morudekai kakonyen nuka ekabaka enapit anapito nuka ekabakane nuka lobululu ka lokakwaŋan, ka aboko naepol naka esabu, ka egoe loka ebaputa loejok ka lomuge; kibwoŋ ere loka Susa kiyalama da.

¹⁶ Ajaas Iyudayan kaica ka aiyalama, ka ailel ka aibuses.

¹⁷ Kanolibuku da, ka ŋolire, kama edolokini aicorakinet naka ekabaka ka ekekisil, ajaas Iyudayan kaiyalama ka ailel, epucit ka apaaran naejok da. Koluoros luipu luka atekerin nuka akwap Iyudayan; naarai kodoikinite kes akurian Iyudayan.