Read Ateso Anyoun 11 Bible Online

Anyoun 11 - Ateso bible

Anyoun 11

¹ Kotema EJAKAIT Musa atiar, “Ejukakini Parao ka Misiri adiopetular bobo; akauloke kisiikini yes alosit; nakisiikinia yes alosit, kireŋeari cut yes kere.

² Aso do kinere kaki nuka ituŋa ebe, ‘Kilip ŋolituŋanan eidunyeteke, ka ŋiniberu da aidunyeteke iboro luka epuesa, ka iboro luka esabu.’ ”

³ Koinak EJAKAIT ituŋa aminunio kakonyen nuka Imisirian. Bobo da kitopolooroi Musa kakwap nako Misiri, kakonyen nuka ikejaanakinak luka Parao, kakonyen da nuka ituŋa.

⁴ Kotema Musa atiar, “Inera EJAKAIT kwanata ebe, Alomari kidiŋ naka Misiri kidiŋebai:

⁵ Etwakete ikiyaik kere luko Misiri, ageun ka ekiyai loka Parao loiboie kajakanutuke, kiton ekiyai loka abulesit naejai kau kairieis; ka ikiyaik kere luka ibaren.

⁶ Ejaun aimony naepol anatar akwap kere nako Misiri, namam apeŋo ejauna naeriakatatar, mam da ejaun bobo naeriakakinotor.

⁷ Konye mam ekiŋok ipeni akeŋajep aluikin idwe luka Isirael, aluikin ituŋanan arai itiaŋ: tetere ijenunete kwape etiakitor EJAKAIT Imisirian ka Isirael.

⁸Ido epote ikejaanakinakakon lu kere mamaka, ekukumete kaneajai, kobalas ebe, ‘Konyou ijo, ka ituŋa kere lukitupito jo’: akaulo kaŋun alomari.” Koloma kaneajai Parao kanyunyura naepol.

⁹Kotema EJAKAIT Musa atiar, “Mam Parao kiirari jo; tetere etupui nukaumokinika kakwap nako Misiri.”

¹⁰ Kiswamata Musa ka Aaron nukaumokini ŋun kere kakonyen nuka Parao: kitogogoŋ EJAKAIT etau loka Parao, mam abu kisiik idwe luka Isirael alosit anyoun kakwapuke.