Read Ateso Anyoun 12 Bible Online

Anyoun 12 - Ateso bible

Anyoun 12

¹ Kobala EJAKAIT Musa ka Aaron kakwap nako Misiri ebe,

² “Eraun elap lo logeet kolapio mama ijaas: eraun elap losodit loka ekaru mama ijaas.

³Kolimokis ekodet kere loka Isirael ebe, Kapaaran nakitomonet naka elap lo elemunete kesi ŋinituŋanan imerekek, kwape ejaatar itogoi luka lukapapakec, imerekek kaŋolitogo.

⁴Arai ikidioko lukotogo komam edaunete imerekek, komorata ka ekeidunyet loidunyatar eketogo; koyaata kwape ejaar etiai loka ituŋa; kwape enyamia ŋinituŋanan, kimarakinio omcrekek.

⁵ Sirienwalit imerekekikus, ikiliokit yenika ekaru ediopet: ilemunete kotoma amerekekin arai toma akinei.

⁶ Inadaete ŋes aitodol apaaran nakitomonet kaoŋon naka elap kaŋol. Atukot kere naka ekodet loka Isirael eari napeboŋ.

⁷Eyaŋaarete da aokot, kipikakis ategerio aarei nuka ekek ka acunet da, kotogoi luenyamiata.

⁸ Ido enyamete akiriŋ akuare ŋin, kopeet kakim, ka emugati lomam itubuunitoi; enyamete da kedia kaloedwar.

⁹Sirikinyamata eionit, karaida ipoitoi, nabarai apcot kakim; akekou ka akekeje ka iboro da luka akoik.

¹⁰ Sirikideut idiobore aitodol tupuruc; konye yenideun aitodol tupuruc kicweata kakim.

¹¹ Inyamete da kwanata; koenito akusiŋabes, kojaas amuk akejekus, ebela akanikus: kisunyito inyamete: erai ŋin aleleŋ naka EJAKAIT.

¹² Naarai akuare ŋin etori eoŋ akwap nako Misiri, adanyi da ikiyaik kere kakwap nako Misiri, ituŋanan ka itiaŋ da; ido etodoli ikatubesia kodekesio kere luko Misiri: Arai eoŋ EJAKAIT.

¹³ Koraas aokot aanyunet mama ijaas kotogoi luijaas; kaany eoŋ da aokot aleleni yes, kwabo mam ejaun atular amudiar yes, naadanyia akwap nako Misiri.

¹⁴ “Koraenena apaaran ŋin aisiitunet mamakus, kidarenenete ŋes korai epucit loka EJAKAIT: kotoma aturiokus kere, kidarenenete epucit kokisil lomam edaun.

¹⁵ Inyamenenete imugatin lumam itubuunitoi apaarasia akanykaarei; ageun kapaaran nasodit ilemarete yenikitubuunet kotogoikus: naarai ŋinituŋanan yenenyami imugatin luitubuunitoi ageun kapaaran nasodit aitodol apaaran nakikanyetekaarei, egelario ituŋanan ŋin koIsirael.

¹⁶Kapaaran nasodit ejaun atukonokin nakalaunan; mam iswamao adioswam kere kapaarasia kaŋun, dimarai luenyami ŋinituŋanan, ŋul bon iswamaete.

¹⁷ Idarenenete epucit loka imugatin lumam itubuunitoi; naarai kapaaran kaŋin ŋes etolomunia ajorekus kakwap nako Misiri: ŋes idareneniata apaaran ŋin anatar aturiokus, araun ekisil loka ikar kere.

¹⁸ Kolap losodit kapaaran nakitomonet kaoŋon naka elap eboŋ, inyamete imugatin lumam itubuunitoi, aitodol apaaran naka akaisaarei kanadiop naka elap eboŋ.

¹⁹ Apaarasia akanykaarei mam etakanuni yenikitubuunet kotogoikus; naarai ŋinituŋanan yenenyami yenikitubuunitoi, egelario ituŋanan ŋin kokodet loka Isirael, arai erai emoit, karaida iwuriat.

²⁰Sirikinyama yenikitubuunitoi; konyamete imugatin lumam itubuunitoi kotoma aiboisiokus kere.”

²¹ Kosodi Musa anyaraun imakio kere luka Isirael, kotema kes atiar, “Koloto kooma idwe luka amerekekin kwape ejaatar ikekiakus, koarata luka aleleŋio.

²²Kolemutu da itenun luka esop,[3] kidomakis toma aokot nuejaas abeseni; kobwatanakis aokot nuejaas abeseni acuneta ka ategerio aarei nuka ekek: sirikelomu idiotuŋanan kere kokek loka etogoke aitodol tupuruc.

²³ Naarai etubori EJAKAIT aidany Imisirian; aso naeanyunia aokot kacuneta ka ategerio aarei nuka ekek, cleleni EJAKAIT ekek, komam ecamakini ekamudiaran alomar otogoikus aidany yes.

²⁴Ido idarenenete akirot ŋin araun ekisil mamakon kodwekon da, ikar kere.

²⁵Kosodete kidoloto akwap nakiinakini EJAKAIT, kwape kolo kisumunio, idarenenete aijaanakin ŋin.

²⁶ Kosodi nakiŋisiata idwekus ebe, ‘Aijaanakinikus na, apolouke inyo?’

²⁷Itemanarete ebe, ‘Ŋes asubanit naka aleleŋ naka EJAKAIT, loalelenikini idwe luka Isirael koMisiri, naadanyia Imisirian koyuu ikaliawok.’ ” Kituluroto ituŋa akecekwes, komaata.

²⁸Koloto idwe luka Isirael kiswamata kwaŋin; kwape ecorakinia EJAKAIT Musa ka Aaron, kiswamata kwaŋin.

²⁹ Kosodi kidiŋebai, kodany EJAKAIT ikiyaik kere luka akwap nako Misiri, ageun ka ekiyai loka Parao, loeboie koicoloŋoke loka ajakanut, kiton ikiyai loka loaenitai kaidaris; ka ikiyaik kere luka ibaren.

³⁰ Konyou Parao kuare, ŋes ka ikekejaanakinak kere ka Imisirian kere; kojau aimony naepol akwap nako Misiri; naarai amamei etogo lomam atwanitor ituŋanan.

³¹ Konyarau ŋesi Musa ka Aaron kuare, kobala ebe, “Konyoutu, koloto kotuŋaka, yes ka idwe luka Isirael; koloto kijaanakis EJAKAIT, kwape ibalatar.

³² Koyaata isipaninikus luka amerekekin ka luka aituk, kwape ibalatar, koloto; kilipakis eoŋ da arereŋ.”

³³ Kisuburikisi Imisirian ituŋa, aitonyoun kes kakwap atipet; naarai kobalas ebe, “Wuu kitwaka!”

³⁴Koyaata ituŋa atapiokec koroko kitubuuno, koenanakina amoti nukinyonis ogoenekec kokeperinikec.

³⁵ Kiswamata idwe luka Isirael kwape ajaar akirot naka Musa; kilipata kesi Imisirian iboro luka epuesa, ka iboro luka esabu, ka igoen.

³⁶ Koinak EJAKAIT ituŋa aminunio kakonyen nuka Imisirian, koinanakinai luelipito. Koŋatata Imisirian.

³⁷ Koloto idwe luka Isirael anyoun koRameses adolore Sukot, ikiliok kwaka ilukumin akwat akanykape lualosete kakeje, komam imarakinitai idwe.

³⁸Ido koupar erioŋet luka imo kakes; ka isipanin luka amerekekin ka luka aituk, ibaren luipu noi.

³⁹ Kopeoto imugatin lumam itubuunitoi luka atap naayaunete kakwap nako Misiri, naarai mam etubuunitoi; naarai aponi kireijeunai koMisiri kisuouriknitete, kwabo mam epoito idisinyamat kere.

⁴⁰ Apotu idwe luka Isirael kiboioto koMisiri adaun ikar akwat aoŋon ka akaisauni.

⁴¹ Kosodi ketuboros ikar akwat aoŋon ka akaisauni, konyou ajore kere naka EJAKAIT kapaaran kaya koMisiri.

⁴²Ŋes akuare naibusakinit aidario noi kama ejai EJAKAIT kanuka aitolomun kes kakwap nako Misiri: ŋin ŋes akuare ya naka EJAKAIT naibusakinit idwe luka Isirael aricenen noi anatar aturiokec kere.

⁴³ Kotema EJAKAIT Musa ka Aaron atiar, “Lo ŋes ekisil loka aleleŋ: mam imoit kere enyamenenei:

⁴⁴ Konye nolibulesit loegwelitai kapesan, kedau akepio, ŋes konyet enyamia.

⁴⁵ Mam emoit ka ekejaanakinan loiwotei enyamenenete.

⁴⁶ Togo ediopet enyamenenere; sirikiyaŋaasi akiriŋike kiŋa ketogo; karaida aibil akoitike.

⁴⁷Erici ekodet kere loka Isirael,

⁴⁸ido arai iboienenei emoit kajo, kokoto aidar aleleŋ kama ejai EJAKAIT, kokepenenete ikiliokoke kere, ŋes konyet ikunyakinia aidar; eraun bala iwuriat akwap: konye lomam ekepep kere mam enyamenenei.

⁴⁹ Eraun ekisil ediopet mama ejai iwuriat ka emoit loiboie kayes.”

⁵⁰Kiswamata kwaŋin idwe luka Isirael kere; kwape ecorakinia EJAKAIT Musa ka Aaron, kiswamata kwaŋin.

⁵¹ Kosodi kapaaran kaya kitolom EJAKAIT idwe luka Isirael kakwap nako Misiri kajorekec.