Read Ateso Anyoun 13 Bible Online

Anyoun 13 - Ateso bible

Anyoun 13

¹Kotema EJAKAIT Musa atiar,

² “Kitalaikinai eoŋ ikiyaik kere luepukorete aliligeta kodwe luka Isirael, yenika ituŋanan ka yenika itiaŋ: erai yenikaŋ.”

³ Kotema Musa ituŋa atiar, “Kiitununete apaaran na, nailomuniata koMisiri, kotogo loka ebulesene; naarai abu EJAKAIT kitolom yes kagogoŋ naka akan kaibois kaŋin: sirikinyama imugatin luitubuunitoi.

⁴ Kapaaran kana inyounete kolap loka Abib.

⁵Kosodi nakitodolio EJAKAIT jo akwap naka Ekanaanit, ka Ekitit, ka Emorait, ka Ekibit, ka Eyebusit, naeyapoikinit lukapapaakus ainakin jo, akwap naeleleete akile ka esik, idarenenei aijaanakin na kolap kalo.

⁶ Konyamenenei imugatin lumam itubuunitoi apaarasia akanykaarei, apaaran nakikanyetekaarei da ŋes apaaran naka epucit loka EJAKAIT.

⁷Konyamenenei imugatin lumam itubuunitoi adaun apaarasia nukanykaarei; komam etakanete kamakon imugatin luitubuunitoi, karaida yenikitubuunet atakan kamakon, koikorunokon kere.

⁸ Ilimonokini okokukon kapaaran kaŋin, ebe, ‘Erai kanuka ŋun nuabu EJAKAIT keswamak naanyounio koMisiri.’

⁹ Eluor aanyunet kakanikon, aisiitunet da kokidiŋ kakonyekon, tetere ejaun ekisil loka EJAKAIT aitukukon: naarai abu EJAKAIT kitolom jo koMisiri kakan nakagogoŋ,

¹⁰ŋes ibusakinitor aricenen ekisil ŋol kapakike ŋolikaru.

¹¹ “Kosodi nakitodolio EJAKAIT jo akwap naka Ekanaanit, kwape kolo eyapoikinia jo ka lukapapaakon, kiinakini da.

¹² Igitakini EJAKAIT ŋin yenepukori aliliget, ka yenikiyai yenijaatar yenelomuni kotiaŋ; eraunos lukiliok luka EJAKAIT.

¹³ Ido imerekek ilakununia ŋinikiyal yenika asigiria; arai mam ipuda alakun, ibili do emurisiŋike: ilakununei ikiyaik kere luka ituŋa kodwekon.

¹⁴ Kosodi nakiŋisia okokukon jo kapaarasia nuepote ebe, ‘Inyo bo yen?’ ilimokini ŋes ebe, ‘Abu EJAKAIT kitolom oni koMisiri, kotogo loka ebulesene kagogoŋ naka akan.

¹⁵Kosodi naaneritor Parao aisiikin sio anyoun, abu EJAKAIT koar ikiyaik kere luka akwap nako Misiri, ikiyaik luka ituŋa, ka ikiyaik luka itiaŋ: kanuka ŋun ŋes ainakinia eoŋ EJAKAIT kere yenepukori aliliget, lueraas ikiliok; konye alakuni ikiyaik kere luka odweka.’

¹⁶ Eraun aanyunet kakanikon, ka nakoreet kokidiŋ kakonyekon: naarai abu EJAKAIT kitolom oni koMisiri kagogoŋ naka akan.”

¹⁷ Kosodi kedau Parao aisiikin ituŋa alosit, mam Edeke abu kitotor kes orot loka akwap naka Ipilisitian, karaida keapie; naarai abala Edeke ebe, “Diat ekuriakaros ituŋa arai keanyut ejie, kosodete aboŋor Misiri.”

¹⁸ Konye abu Edeke kitotor ituŋa erot loka amodiŋ ariri naka Aŋolol Nakareŋan: konyout idwe luka Isirael kakwap nako Misiri ekapito lujiis.

¹⁹ Koyanaaria Musa akojo nuka Yosep: naarai abu Yosep kisiyapoikinite cut idwe luka Isirael ebe, “Abeit kianyanari Edeke yes; iyanaariata akakojo anyoun kane.”

²⁰ Kosodete konyout koSukot, kidukuroto Etam, ariri naka amodiŋ.

²¹ Kiŋarenik EJAKAIT kes kepir loka edou paaran ainarenikinit korot: ido kepir loka akim kuare, acaikinit kes; tetere elosete paaran ka kuare.

²² Epir loka edou paaran, ka epir loka akim kuare, kojaenena kakonyen nuka ituŋa.