Read Ateso Anyoun 16 Bible Online

Anyoun 16 - Ateso bible

Anyoun 16

¹ Konyout koElim elosete, kodol ekodet kere loka idwe luka Isirael amodiŋ naka Sin, naejai kidiŋ Elim ka Sinai, kapaaran nakitomonet kakany naka elap lokiareit kedaut anyoun kakwap nako Misiri.

² Kirurumak ekodet kere loka idwe luka Isirael Musa ka Aaron komodin.

³ Kobalas idwe luka Isirael kes ebe, “Ti gwai kiitwakiki akwap nako Misiri kanuka akan naka EJAKAIT, nakiboio kama ejaas amoti nuka akiriŋ, nakinyamia atap kemonikinos; naarai kibuaut isio amodiŋ na, aiar ekodet lo kere keteŋai.”

⁴ Kosodi kotema EJAKAIT Musa atiar, “Koany, etetepikini yes atap naebuni kokuju; elomarete da ituŋa ŋinipaaran atukonokin adutakinet naka apaaran, kasodi ketem kes arai elosenenete kokisilaka, arai mam.

⁵ Kosodi kanen, kedolu apaaran nakikanyetekape, itemonokinete kesi lueyaunete, koraut do irwan atipet adepar lulem etukonokinete ŋinipaaran.”

⁶ Apotu Musa ka Aaron kotemasi idwe luka Isirael kere atiar, “Nat eboŋ, ŋes ijenuniata ebe abu EJAKAIT kitolom yes kakwap nako Misiri.

⁷ Ido tupuruc ŋes ianyuniata yesi aibuses naka EJAKAIT; naarai eira airurumakus mama ejai EJAKAIT: lukaŋai bo isio, luirurumakinito?”

⁸ Kotema Musa atiar, “Ejaun na, nakiinak EJAKAIT yes akiriŋ ainyam eboŋ, tupuruc da aimonikin atap; naarai eira EJAKAIT airurumakus nairurumakis ŋes: ido lukaŋai bo isio? Mam kirurumakinito sio, dimarai EJAKAIT.”

⁹Kobala Musa Aaron ebe, “Kolimok ekodet kere loka idwe luka Isirael atiar, ‘Kikunyutu akonyen nuka EJAKAIT: naarai eira ŋesi akusiirurum.’ ”

¹⁰ Kosodi kanen, napineras Aaron ka ekodet kere loka idwe luka Isirael, kosesenata modiŋ, ido koany, kotakan kodou aibuses naka EJAKAIT.

¹¹Kotema EJAKAIT Musa atiar,

¹² “Eira eoŋ airurum naka idwe luka Isirael: kolimok kes ebe, ‘Eboŋ inyamete akiriŋ, tupuruc da imonikinos atap; ijenunete do ebe arai Eoŋ EJAKAIT Ekusideke.’ ”

¹³ Kosodi kanen napeboŋ, kodooto alurueik, korapaasi iswamin: ido tupuruc kiriamarito akopyo iswamin.

¹⁴ Keokoto akopyo, koany, kuju kamodiŋ kojau ibore yenedit kilunurur, kodit kwape kakako kokwap.

¹⁵ Keanyut idwe luka Isirael, kotemanaros atiar, “Inyo bo ŋin?” naarai mam kejenete kwape kejaar. Kobala Musa kes ebe, “Ŋin ŋes atap nakiinakinit EJAKAIT yes ainyam.

¹⁶ Ŋin ŋes akirot naicorakinit EJAKAIT ebe, ‘Kotukonok ŋinituŋanan kayesi kwape enyamia; ŋinituŋanan omer [5] ediopet, kwape ejaar etiai loka ituŋakus, iyaete, ŋinituŋanan einari lukowemake.’ ”

¹⁷Kiswamata idwe luka Isirael kwaŋin, kotukonokis ice epol, ice edit.

¹⁸ Kosodete kitemoto kotoma omer, yeniketukonokin loepol mam edeuni, yeniketukonokin loedit, mam epuda bobo; atukonokinete ŋinituŋanan kwape anyamia.

¹⁹Kotema Musa kes atiar, “Kinyek ituŋanan aiteperor.”

²⁰Mam apotu kopuput Musa; konye ice kakesi kiteperosi, kouri ikur, kobosiar; konyunyurik Musa kes.

²¹Kotukonokis ŋinitupuruc, ŋinituŋanan kwape enyamia: ido kemwaniar akoloŋ, kocalar.

²²Kosodi kedol apaaran nakikanyetekape kotukonokis inyamat irwan aarei, ŋinituŋanan ikomerin [6] iarei; koporu lukapolok kere luka ekodet alimokin Musa.

²³ Kotema kes atiar, “Ŋin ŋes naabu EJAKAIT kobala ebe, ‘Erai moi aibworar naicorakinitai, nakasabato nakalaunan kaneejai EJAKAIT: kopeoto luikotos aipe, kipooto da luikotos aipoore; luideunos kere kiteperosi kinadakis aitodol moi.’ ”

²⁴ Kiteperosi kwape kicorakinia kes Musa: mam ebosa, komameunos da ikur kotomakec.

²⁵ Kotema Musa atiar, “Konyama lu lolo; naarai lolo ŋes apaaran naka asabato kaneejai EJAKAIT: mam lolo idumunete komagoro.

²⁶ Kotukonokinete kotoma apaarasia akanykape; konye apaaran nakikanyetekaarei ŋes apaaran naka asabato: kapaaran kaŋin mam ejaunun.”

²⁷Kosodete kapaaran nakikanyetekaarei apotu ice kakesi koloto atukonokin, komam edumunete.

²⁸ Kotema EJAKAIT Musa atiar, “Itodolete yesi ai aigir apupun akaicorakineta ka ikakisila da?

²⁹Koanyutu, naarai kiinak EJAKAIT yes aiyeŋunet, ŋes kiinakinia yes kapaaran nakikanyetekape inyamat luka apaarasia aarei; kiboikin ŋinituŋanan kayesi aiboisike, kinyek ituŋanan anyounun kaiboisike kapaaran nakikanyetekaarei.”

³⁰Kiyenununete ituŋa kapaaran nakikanyetekaarei.

³¹ Ekek loka Isirael komaik ekirorike Emanu: kosubite bala ecokit loka ejad,[7] loekwaŋ; ajijimuke da kosubite bala imugatin luka esik.

³²Kobala Musa ebe, “Ŋin ŋes akirot naabu EJAKAIT kicorak, ebe, ‘Kinadakisi omer Ioilcleba kanuka aturiokus kere; tetere eanyunete kesi inyamat luabu eoŋ ketanyam yes kamodiŋ, naketolomunia kakwap nako Misiri.’ ”

³³ Kotema Musa Aaron atiar, “Kolem atido, kipiik tomake omer loileleba emanu, kibwaik kakonyen nuka EJAKAIT, kinadakis aturiokus.”

³⁴ Kwape kicorakinia EJAKAIT Musa, kwaŋin kibwaik Aaron akonyen nuka Aitejenunet, araun nakinada.

³⁵ Konyamata idwe luka Isirael emanu ikar akaisaoŋon, kiton neadolioto akwap naeboioto ituŋa; konyamata emanu kiton neadolioto oikoruno luka akwap nako Kanaan.

³⁶Ido omer ŋes idiopet kotomon yenika epa. [8]