Read Ateso Anyoun 18 Bible Online

Anyoun 18 - Ateso bible

Anyoun 18

¹Kopup do Yetero, esasedoti loka Midian, ekamuran loka Musa, nukiswamakini Edeke Musa, ka Isirael iketuŋa, ebe, abu EJAKAIT kitonyou Isirael koMisiri.

² Abu Yetero, ekamuran loka Musa, koya Sipora aberu naka Musa, naabu kinyakarite.

³ Ka ikedwe iarei; ekiror loka ediopet ŋes Geresom; naarai abala ebe, “Arai epejonon kakwap namere nakaŋ.”

⁴Ekiror loka ece ŋes Elieser; [12] naarai abala ebe, “Edeke loka papaka ŋes arai ekeŋarakinanika, abu kayu eoŋ kokileŋ loka Parao.”

⁵Kobu Yetero, ekamuran loka Musa, ka odweke ka akeberu neejai Musa amodiŋ naedukurito, moru loka Edeke;

⁶Kotema ŋesi Musa atiar, “Abunit eoŋ Yetero ekamuranikon mamakon, ka akoniberu, ka odweke iarei kaŋes.”

⁷Koloma Musa airiamun kekamuranike, kisudede, konu; kiŋitanaros ebe, “Anyoika?” Kolomasi owema.

⁸Kolimenok Musa ekamuranike akiro nueswamakini EJAKAIT Parao ka Imisirian kanuka Isirael, aitaaritoi kere naadoikini kes korot, ido kwape keyuunia EJAKAIT kes.

⁹Kiyalamikin Yetero kanuka nukajokak kere nukesubakini EJAKAIT Isirael, naarai abu koyuu kes kakan naka Imisirian.

¹⁰Kotema Yetero atiar, “Kituritete EJAKAIT, lokiyuuni yes kakan naka Imisirian, kakan naka Parao da; loabu koyuu ituŋa kakan naka Imisirian.

¹¹ Ajen do kwana ebe epol EJAKAIT aitelekar idekesinei kere: eebo, kotoma akirot naiturotor kamakec.”

¹² Abu Yetero ekamuran loka Musa koinak ainakinet naicweio ka asuban mama ejai Edeke: kobu Aaron ka imakio kere luka Isirael, konyamata atap nepepe kekamuran loka Musa, kakonyen nuka Edeke.

¹³Kosodi kiwala akwap, kiboikin Musa atubokin ituŋa: kobwaata ituŋa kirimoritos Musa ageun tupuruc aitodol eboŋ.

¹⁴Keanyu ekamuran loka Musa kere nueswamanakini ŋesi ituŋa, kotema atiar, “Inyo bo yeniswamanakini ijo ituŋa? Kanukinyo iboio ijo bon, kobwoete da ituŋa kirimoritos jo ageun tupuruc aitodol eboŋ?”

¹⁵Koboŋok Musa ekamuranike ebe, “Naarai eponenenete ituŋa neajai aiŋit Edeke.

¹⁶ Keiaut kakirot, epote kamakaŋ; atubokini eoŋ akirot ituŋanan ka yeniceke, etejenikini kes aicorakineta nuka Edeke, ka ikekisila.”

¹⁷Kobala ekamuran loka Musa ebe, “Akirot naiswamai mam ejok.

¹⁸ Kilolonyi cut, ijo ka ituŋa lu luejaas kajo: naarai kilanirikinit ijo akirot; mam jo bon ipedori aswam.

¹⁹ Aso do kiira ekaporoto, ketetemik akiro, kojai Edeke kajo: kojai ijo kanuka ituŋa mama ejai Edeke, koyaŋa akiro mama ejai Edeke.

²⁰ Isisianakini ijo kes aicorakineta ka ikisila; itodikini kes erot loibusakinit kes aloseneneo, ka aswam naibusakinit kes aswam.

²¹ Ido kirereu kotuŋa kere ikiliok luibusakinito, lueyoŋito Edeke, ituŋa luka abeit, luelaito ameda namam edolit; kodakanak kes, koraut ikapolok luka ilukumin, ka ikapolok luka akwat, ka ikapolok luka akaisakany, ka ikapolok luka itomon.

²² Kotubokis kesi ituŋa apakio kere; kosodete kesi ainunun jo ŋinikirot naepol, konye ŋinikirot naedit etubenenete bonik: kwaŋin kibenenikini ijo, ibwokenenete kesi alaŋir nepepe kajo.

²³Arai kiswama ijo akirot ŋin, kiicorak Edeke jo kwaŋin, ipedori do ijo atitiŋikin, elosenenete ituŋa lu kere aiboisiokec inapakina.”

²⁴Kiira Musa eporoto loka ekamuranike, kiswama kere kwape abalar nesl.

²⁵ Koseu Musa ikiliok luibusakinito koIsirael kere, kituluo kes lukapolok kotuŋa, ikapolok luka ilukumin, ka ikapolok luka akwat, ka ikapolok luka akaisakany, ka ikapolok luka itomon.

²⁶ Ketubonokinete ituŋa apakio kere: koinanarete Musa akiro nuetioko, konye ŋinikirot naedit kotubenenete bonik.

²⁷ Kotwara Musa ekamuranike; kolot bukec.