Read Ateso Anyoun 2 Bible Online

Anyoun 2 - Ateso bible

Anyoun 2

¹ Kosodi kolot etuŋanan lokokek loka Lebi komany akoku naka Lebi.

² Kopotuu aberu, kouru ikoku yenitelepat: konye keanyu ebe ejokuna, kibwa ber ŋes ilapio iuni.

³Kosodi keanyu ebe mam epedori aibwait bobo, koyaŋa eijaŋ loka aladoi, kinyonyo erit ka emina, kibwaik ikoku toma, kibwaik okido ariri naka ecor.

⁴ Kobwoi kinacike kaneelwana, ajenun nuedoikinete ŋes.

⁵ Kolot akoku naka Parao ailoŋ ocor; koloto apesuruke ariri naka ecor; koany eijaŋ kokido, kijukak akebulesit alemun.

⁶Kopuko, koany ikoku; ido koany, komony ikoku. Kitim, kobala ebe, “Yen ŋes idiopet kodwe luka Iburanian.”

⁷Kosodi kinacike kotema akoku naka Parao ebe, “Alosi ca kanyarak jo aketanakan kaŋor nuka Iburanian kitanakik ikoku?”

⁸Kotema akoku naka Parao atiar, “Kolot.” Kolot apese konyarau toto naka ikoku alopet.

⁹Kotema akoku naka Parao atiar, “Koyaŋa ikoku yen kitanakik, eoŋ da kainakini jo eropitikon.” Koyaŋa aberu ikoku, kitanak.

¹⁰ Kopoloor ikoku, koinu akoku naka Parao, koluor ikekoku. Komaik ekekiror Musa, kobala ebe, “Naarai alemuni kakipi.”

¹¹ Kosodi kapaarasia kaŋun, kedau Musa apoloor, kolot mama ejaas ikeinacan, koany abwokonikec: koany Emisiriat eseni Eburaniat, ediopet koinacanake.

¹²Koŋoleŋol epuwai ka epuwai, koany ebe emamei icliotuŋanan, kosen Emisiriat, konukak asiŋe.

¹³Kosodi kolot kapaaran nakiareit, ido koany, ajios ituŋa iarei luka Iburanian: kotema ŋesi je loasubit erono ebe, “Kanukinyo isenio yenicekon?”

¹⁴Kobala ebe, “Iŋai bo kitarauni jo ekosikapolon ekatubonikosi da? Ikoto kereka aiar eoŋ da kwape iaria Emisiriat?” Koyoŋ Musa, kobala ebe, “Abeit ajenun akirot ŋin.”

¹⁵ Kosodi kiira Parao akiro ŋun, kokoto aiar Musa. Konye koker Musa kakonyen nuka Parao, kiboikin akwap naka Midian: kiboikin eiduny katan.

¹⁶ Ajaas esasedoti loka Midian adweke akanykaarei; kopotu aiwok akipi, kilelebata atuba, kiruata amerekekin nuka papakec.

¹⁷Kopotu ikecokok kireŋeasi: konye konyou Musa kiŋarak, kiru esipanikec.

¹⁸ Kepotu mama ejai papakec Reuel, kobala ebe, “Ipotu ca yesi lolo atipet?”

¹⁹Kobalas ebe, “Emisiriat ŋes kiyuuni sio kakanin nuka ikecokok, bobo da abu kowokok sio akipi, kiru esipan.”

²⁰ Kotema adweke ebe, “Ejai bai? Kanukinyo kinyeiniata etuŋanan uŋol? Konyarautu konyam inyamat.”

²¹Kiyu Musa aiboi ketuŋanan kaŋol: kokorak Musa akokuke Sipora.

²² Kouru ikoku yenitelepat, komaik ekekiror Geresom: naarai kobala ebe, “Arai epejonon kakwap naka imo.”

²³ Kosodi kapaarasia kaŋun nuipu, kotwana ekabaka loka Misiri: kidinyas idwe luka Isirael kanuka ebulesenekec, komonyata, kodol aimonyokec neejai Edeke kanuka ebulesenekec.

²⁴ Kopup Edeke eidinyakec, kiitu Edeke aitutuketeke naetutukit kAburaam, ka Isaak, ka Yakob.

²⁵ Koany Edeke idwe luka Isirael, kojen Edeke nukec.