Read Ateso Anyoun 20 Bible Online

Anyoun 20 - Ateso bible

Anyoun 20

¹ Kiner Edeke akiro nu kere, kobala ebe,

² “Arai Eoŋ EJAKAIT Ekonideke, loketolomuni jo kakwap nako Misiri, kotogo loka ebulesene.

³ “Sirijaenena kicedekesio nabarai eoŋ.

⁴ “Sirikisub adioput naegerer, karaida asima naka ibore kere yenejai kuju toma akui, karaida yenejai kwap toma alup, karaida yenejai toma akipi nuejaas kwap kalup.

⁵ Sirikikukonokin kes, karaida aijaanakin kes: naarai Eoŋ EJAKAIT Ekonideke arai Edeke lokekolo, edopet kodwe numam adolit nuka lukapapaakec, kiton atur nakiwuniet ka nakiwoŋonet naka ŋul kalukalaito eoŋ;

⁶ Ido etimi ilukumin luka ituŋa lukaminas eoŋ koricito akaicorakineta.

⁷ “Sirilimit atai ekiror loka EJAKAIT Ekonideke; naarai mam EJAKAIT isikai aitetelekaar akirot, ŋin yenelimit atai ekekiror.

⁸ “Kiitunite aitalaunit apaaran nakasabato.

⁹ Kitaaritoi kapaarasia akanykape, kiswama akoniswamisio kere.

¹⁰ Konye do apaaran nakikanyetekaarei ŋes asabato naka EJAKAIT Ekonideke: apaaran ŋin sirikiswama adioswam kere, ijo, ka okokukon, ka akokukon, ka ekonikejaanakinan, ka akonikejaanakinan, ka ikonibaren, ka imoitikon da yenejai orekon;

¹¹ Naarai kapaarasia akanykape ŋes asubia EJAKAIT akuj ka akwap, ka aŋolol, ka luejaas tomakec kere, kiyeŋu kapaaran nakikanyetekaarei: tape isirereŋi EJAKAIT apaaran nakasabato, kitalau da.

¹² “Koyoŋitenenei papakon ka totokon: tetere akonipaarasia iyatakinos kotoma akwap nakiinakini EJAKAIT Ekonideke.

¹³ “Siriarenenei.

¹⁴ “Siridote.

¹⁵ “Sirikokoenenei.

¹⁶ “Sirisabanakinenei ikoniidunyet.

¹⁷ “Siriŋobelenenei etogo loka iidunyetekon, siriŋobelenenei aberu naka eidunyetekon, karaida ekekejaanakinan, karaida akekejaanakinan, karaida ekemoŋ, karaida ekesigiria, karaida ibore kere yenerai yenika ekoniidunyet.”

¹⁸ Koanyut ituŋa kere eires, ka eimilia, ka eporoto loka arupepe, ka eroŋat da epuriei: keanyut ituŋa, komaranata, kobwaata kama elwana.

¹⁹ Kotemasi Musa atiar, “Kiner ijo kasio, ŋes kipupunio: konye kinyek Edeke einer kasio, kenyeis atwakare.”

²⁰ Kotema Musa ituŋa atiar, “Sirikikuriakaros: naarai abu Edeke aigimor yes, tetere iyonete ŋes, kinyeis adiakanar.”

²¹Kobwaata ituŋa kama elwana, kikunyak Musa neejai amuton nairiono cucucuc neajai Edeke.

²²Kotema EJAKAIT Musa atiar, “Ilimokini idwe luka Isirael ebe, ‘Ipotu yesi ikulepek koanyut eoŋ enera kayes kotoma akuj.

²³Sirisubenenete idekesio ice kajai eoŋ: idekesio luka epuesa, karaida idekesio luka esabu, sirisubenenete kes.

²⁴ Kosubakinai eoŋ etem loka alupot, koinakis asuban kanen, ainakinetakon nuicweio, ainakinetakon da nuka ainapakin, akonimerekekin, ka ikonimonin da: ŋiniibois naiitununere ekakiror abuni mamakon, kesirereŋi eoŋ jo.

²⁵ Ido arai kiiswamak etem loka amoru, sirikiduk kamoru nuikec: naarai arai kidak ecuumakon aikeo, itisiliani ŋes.

²⁶Siridokanari otemuka kadoketa, kinyek amujalalakon atakanun.’