Read Ateso Anyoun 25 Bible Online

Anyoun 25 - Ateso bible

Anyoun 25

¹ Kotema EJAKAIT Musa atiar,

² “Kolimok idwe luka Isirael ebe, kainut eoŋ ainakinet: ijaunete ainakineteka ŋinituŋanan yenitokotori eketau ainakin.

³Na ŋes ainakinet naijaunete; esabu, epuesa, aisinit;

⁴Ka egoe lobululu, ka lomuge, ka Lokareŋan, ka ebaputa loejok, ka ajulo nuka akinei;

⁵Ka imukulen luka imerekekin Luitereŋitai, ka imukulen luka etakas,[13] ka akito nuka sita;

⁶Akinyet naka atala, ka lueuru maa luka akinyet nakinyonyoanakina, ka luka lukisupurununo;

⁷ Amor nuemelomeloto, ka amor nuipiripiranara, aibwaikin opod, [14] ka yenikatorob da.

⁸ Keswamakis eoŋ aiba is nakalaunan; tetere eboie kokidiŋikec.

⁹Nuketodianakini jo kere, epone loka ewema, ka epone loka iboroke kere, iswamaete yesi kwaŋin.

¹⁰ “Ido iswamaete kesi asaduku naka akito nuka sita: aojauke ikubitin[15] iarei ka atutubet, alalauke ekubit ediopet ka atutubet, amukururuke ekubit ediopet ka atutubet.

¹¹Ido iladaari ŋes kesabu loelai, iladaari kujuke kotomake da, isubakini ŋes atorosit naka esabu airimor.

¹²Itataikini ŋes igilun iwoŋon luka esabu, kibwaik kes toma akejeke aoŋon; ejaunete igilun iarei kosiepike ediopet, iarei da osiepike ece.

¹³Iswamauni adaketa nuka akito nuka sita, iladaari kes kesabu.

¹⁴Itolomikini adaketa toma ogilun lukosiepion luka asaduku, adakia ŋes.

¹⁵ Esalanakinete adaketa ogilun luka asaduku: mam elemanario.

¹⁶ Ibwaikini aitejenunet nakainakini jo toma asaduku.

¹⁷ Iswamauni da eicoloŋ-lokaitim loka esabu loelai: aojauke ikubitin iarei ka atutubet, alalauke da ekubit ediopet ka atutubet.

¹⁸Iswamauni da ikerubin iarei luka esabu; iswamauni kes kaswam naerukuk, kosaŋeta iarei luka eicoloŋ-lokaitim.

¹⁹Iswamakini da ekerubi ediopet osaŋe ediopet, ka ekerubi ece osaŋe ece: iswamakini kwaŋin eicoloŋ-lokaitim ka ikerubin osanetake iarei kobore idiopet.

²⁰ Igarararete ikerubin abebenokakec kuju, korapito eicoloŋ-lokaitim kakecebebenoka, kiteos da ireetakec; kosesenete ireeta luka ikerubin eicoloŋ-lokaitim.

²¹ Ido ibwaikini eicoloŋ-lokaitim kuju asaduku; ibwaikini aitejenunet nakainakini jo toma asaduku.

²² Nen kiriamunun kajo, enerakin kajo koicoloŋ-lokaitim, kokidiŋ kikerubin iarei luejaas kuju asaduku naka aitejenunet, akiro kere nukainakini kotoma aicorakineta mama ejaas idwe luka Isirael.

²³ “Iswamauni emesa da loka akito nuka sita: aojauke ikubitin iarei, alalauke ekubit ediopet, amukururuke da ekubit ediopet ka atutubet.

²⁴Iladaari ŋes kesabu loelai, isubakini atorosit naka esabu airimor.

²⁵Iswamakini ŋes atokitoit alalau naka akan airimor, iswamakini atorosit naka esabu airimor atokitoit.

²⁶Iswamakini ŋes igilun iwoŋon luka esabu, ibwaikini igilun agoria aoŋon nuejaas akejeke aoŋon.

²⁷Idunyakinos igilun katokitoit, araut aiboisio nuka adaketa adakia emesa.

²⁸Iswamauni adaketa nuka akito nuka sita, iladaari kes kesabu, adakia emesa.

²⁹ Iswamauni atubaake, ka akaaleike, ka amotiike, ka atanyake, abukununio; iswamauni kes kesabu loelai.

³⁰ Ibwaanakini tiritir imugatin luka aitodikin omesa kakonyeneka.

³¹ “Iswamauni epir loka atala kesabu loelai: kaswam naerukuk, ŋes iswamaunia epir loka atala, abwoeteke, ka akodeteke; akolinoke, ka akwesike, ka aturoke, koraas nuka ibore idiopet.

³² Elomunete da icogen ikanykape kowaitinike; icogen iuni kowai ediopet loka epir loka atala, icogen da iuni kowai loce loka epir loka atala.

³³Akolin auni nuiswamatai aputorit atur kocoget ediopet, akouke ka aturot; ka akolin auni nuiswamatai aputorit atur kocoget ece, akouke ka aturot: kwaŋin kotoma ocogen ikanykape luelomunito kopir loka atala.

³⁴Ejaunete akolin aoŋon kotoma opir loka atala nuiswamatai aputorit atur, ka akwesikec ka aturokec.

³⁵Ejaun da akou kwap kicogen iarei luka ibore idiopet, ka akou kwap kicogen iarei luka ibore idiopet, ka akou kwap kicogen iarei luka ibore idiopet, kwape ejaatar icogen ikanykape luelomunito kopir loka atala.

³⁶Akwesikec ka icogenekec koraas luka ibore idiopet: korai kere aswam naerukuk naka esabu loelai.

³⁷ Iswamauni atalaike akanykaarei: isipokinete da atalaike tetere ccaikinetc.

³⁸Eraunos aitudeŋetake ka asaninike nuka ekurwon, nuka esabu loelai.

³⁹Iswamauni iboro lu kere kalaniru naka atalata [16] naka esabu loelai.

⁴⁰ Koany ebe iswamauni ijo kes kwape ejaar akeceput, nakitodikinitai jo komoru.