Read Ateso Anyoun 26 Bible Online

Anyoun 26 - Ateso bible

Anyoun 26

¹ “Bobo da iswamauni ewema kaigalisio atomon; nuka ebaputa loecipitai kiusio lueriim ka lobululu, ka lomuge, ka lokareŋan, nepepe kikerubin aswam naka ekeswaman loepiriana ŋes iswamaunia kes.

²Aojau naka ninigalisit korai ikubitin akaisaarei ka lukanykauni, alalau naka ŋiniigalisit ikubitin iwoŋon: aigalisio kere koraas nuka aitemis adiopet.

³ Iropikini aigalisio akany; iropikini da aigalisio ace akany.

⁴ Iswamakini da akodeta nubululu oreret loka aigalisit nakawasia kotoma kanueropikinitai: iswamakini da kwaŋin oreret loka aigalisit nakawasia kotoma kanuce nueropikinitai.

⁵Iswamakini akodeta akaisakany toma aigalisit adiopet, iswamakini da akodeta akaisakany oreret loka aigalisit nakiareit naeropikinitai; kiteosi da akedeta ŋun.

⁶Iswamauni aruceta akaisakany nuka esabu, imorikikini aigalisio ŋun karuceta kaŋun: koraun ediopewema.

⁷ “Iswamauni aigalisio nuka ajulo nuka akinei araun ewema kokuju owema: iswamauni aigalisio atomon ka nadiopet.

⁸Aojau naka ŋiniigalisit korai ikubitin akaisauni, alalau da naka ŋiniigalisit korai ikubitin iwoŋon: aigalisio ŋun atomon ka nadiopet koraas kere nuka aitemis adiopet.

⁹Iropikini aigalisio akany kowaikec bonik, ka aigalisio akanykape kowaikec, ikudokini aigalisit nakikanyetekape koiŋaren kewema.

¹⁰Iswamauni akodeta akaisakany koreret loka aigalisit nakawasia kaŋun kanueropikinitai, ka akodeta akaisakany koreret loka aigalisit nakawasia kanuce kanueropikinitai.

¹¹Iswamauni aruceta akaisakany nuka aisinit, ibwaikini aruceta ŋun toma akodeta, imorikikini ewema nepepe, tetere eraun ediopet.

¹²Ka atutubet ŋin naesalakini naekudokina naka aigalisio nuka ewema, atutubet ŋin naka aigalisit naesalakini ijeko kokau kewema.

¹³Ekubit ediopet owai ediopet, ka ekubit ediopet owai loce, loesali kaojau naka aigalisio nuka ewema ijeko kosiepion luka ewema, owai lo kowai je da, arapit.

¹⁴ “Iswamauni eimukoret loka ewema kimukulen luka imerekekin Luitereŋitai, kokujuke da eimukoret loka imukulen luka etakas.

¹⁵“Iswamauni abaoi nuka ewema nuka akito nuka sita, nuesipos.

¹⁶Aojau naka ŋinibao ikubitin itomon, alalau da naka ŋinibao ekubit ediopet ka atutubet.

¹⁷Ejaun ŋinibao karucetake aarei, nuerucokinito adiopet mama ejai nace: iswamauni kwaŋin abaoi kere nuka ewema.

¹⁸Iswamauni abaoi nuka ewema, abaoi akaisaarei kowai loka eŋalakimak kari naka eŋalakimak.

¹⁹ Iswamauni aigaŋeta akaisaoŋon nuka epuesa kwap kabaoi ŋun akaisaarei; aigaŋeta aarei kwap kabao adiopet neelomarete arucetake aarei ka aigaŋeta aarei kwap kabao ace neelomarete arucetake aarei.

²⁰Kowai lokiareit loka ewema kari naka agolitomei, abaoi akaisaarei;

²¹Aigaŋetakec nuka epuesa akaisaoŋon; aigaŋeta aarei kwap kabao adiopet, ka aigaŋeta aarei kwap kabao nace.

²²Iswamauni da abaoi akanykape kowai lokokau loka ewema ari nakoto.

²³Iswamauni da abaoi aarei nuka agoria nuejaas to kewema.

²⁴Koraas aareiarei kokwap, kwaŋin irotakina abaoi nepepe anyoun kokwap aitodol kuju ogilut ediopet: ejaunete kwaŋin kere aarei; eraas nuka agoria ŋun aarei.

²⁵Ejaunete abaoi akanykauni, ka aigaŋetakec nuka epuesa, aigaŋeta atomon ka nukanykape; aigaŋeta aarei kwap kabao adiopet, ka aigaŋeta aarei kwap kabao nace.

²⁶ “Iswamauni ariino nuka akito nuka sita; ariino akany nuka abaoi nukowai ediopet loka ewema.

²⁷Ka ariino akany nuka abaoi nukowai lokiareit loka ewema, ka ariino akany nuka abaoi nukoto kewema, ari nakoto.

²⁸Ka ariit nakokidiŋ naejai kidiŋ kabaoi iriikini anyoun kepuai kiton epuai.

²⁹Iladaari abaoi ŋun kesabu, iswamauni da igilunukec lukitolomanakina ariino kesabu: iladaari ariino kesabu.

³⁰ Isipokini ewema kaputoke naaponi kitcdikin jo komoru.

³¹ “Ido iswamauni aigalisit kegoe kalobululu, ka lomuge, ka lokareŋan, ka ebaputa loecipitai kiusio lueriim: icipakinio ikerubin ogoe aswam naka ekeswaman kaloepiriana:

³²Ikajakini opirin iwoŋon luka akito nuka sita luiladaaritai kesabu, eraunos igolunakec luka esabu, kotoma aigaŋeta aoŋon nuka epuesa.

³³ Ikajakini aigalisit kwap kogolun, itolomikin asaduku naka aitejenunet toma aigalisit: etiaki aigalisit kamakus aibois nakalaunan ka aibois nakalaunan noi.

³⁴ Ibwaikini eicoloŋ-lokaitim toma asaduku naka aitejenunet aibois nakalaunan noi.

³⁵ Ibwaikini emesa kiŋa kaigalisit, ka epir loka atala kiteos kemesa kowai loka ewema ari naka eŋalakimak: ibwaikini emesa ari naka agolitomei.

³⁶ “Ido iswamauni aigalisit naka ekek loka Ewema, lobululu, lomuge, ka lokareŋan ka ebaputa Loecipitai kiusio lueriim, aswam naka ekasonyan.

³⁷ “Ido iswamakini aigalisit ipirin ikany luka akito nuka sita, iladaari kes kesabu; eraunos igolunakec luka esabu: itataikini kes aigaŋeta akany nuka aisinit.