Read Ateso Anyoun 31 Bible Online

Anyoun 31 - Ateso bible

Anyoun 31

¹Kotema EJAKAIT Musa atiar,

² “Koany, anyarau Besalel, okoku loka Uri, okoku loka Kur, loka ateker naka Yuda:

³ Elelebik ŋes emoyo loka Edeke, kotoma acoa, ka aijen, ka apirianut, ka iponesio kere luka aswam.

⁴Aswam aswamisio nuka apirianut, atata esabu, ka epuesa, ka aisinit.

⁵Aigir amor nuiminaikinere, ka aiger akito, aswam da iponesio kere luka aswam.

⁶ Koany, aseu eoŋ ŋes ka Okoliab, okoku loka Akisamak, loka ateker naka Dan: ido ebwaik eoŋ acoa toma otauon luka ŋul kaluecoak kotauon, tetere iswamaunete lukecorak jo kere:

⁷ Ewema loka airiamunun, ka asaduku naka aitejenunet, ka eicoloŋ-lokaitim loejai kujuke, ka iboro kere luka Ewema;

⁸Ka emesa ka iboroke, ka epir loesegara loka atala ka iboroke kere, ka etem loka lukisupurununo;

⁹Ka etem loka ainakinet naicweio ka iboroke kere, ka akalaya ka aigaŋeteke;

¹⁰Ka inapen luedonyitai, ka inapen lukalaunak luka Aaron esasedoti, inapen da nuka odweke, luka aijaanakinia kosasedotene;

¹¹Ka akinyet nakinyonyoanakina, ka lukisupurununo lueuru maa kanuka aibois nakalaunan: iswamaete kesi kwaŋin kwape ejaatar nukecorak jo kere.”

¹²Kotema EJAKAIT Musa atiar,

¹³ “Kolimok ijo idwe luka Isirael ebe, ‘Abeit idarenenete asabatonoka; naarai erai aanyunet kamakaŋ ka yes anatar aturiokus; tetere ijenunete ebe Arai eoŋ EJAKAIT loketalauni yes

¹⁴ Idarenenete do asabato, naarai erai nakalaunan kamakus: ŋinituŋanan yenitisili ŋes abeit eario: naarai ŋinituŋanan yeniswamai adioswam kere kapaaran kaŋin, egelario ituŋanan ŋin kotuŋake.

¹⁵ Iswamao aswam apaarasia akanykape: konye apaaran nakikanyetekaarei erai nakasabato naka aibworar, nakalaunan naka EJAKAIT: ŋinituŋanan yeniswamai adioswam kapaaran nakasabato, abeit eario.

¹⁶Kanuka ŋun idarete idwe luka Isirael asabato aricit asabato anatar aturiokec, araun aitutuket namam enaŋi.

¹⁷ Erai aanyunet kamakaŋ ka idwe luka Isirael ikar kere: naarai abu EJAKAIT kosub akuj ka akwap kotoma apaarasia akanykape, kibwora kapaaran nakikanyetekaarei, kikwar.’ ”

¹⁸ Kedau ŋesi einer kaMusa komoru Sinai kijaik ŋes amor aarei nuka aitejenunet, amor nuewadikatai kebokorit loka Edeke.