Read Ateso Anyoun 40 Bible Online

Anyoun 40 - Ateso bible

Anyoun 40

¹Kotema EJAKAIT Musa atiar,

² “Isipokini ewema lokalaunan loka ewema loka airiamunun kapaaran nasodit naka elap losodit.

³ Ibwaikini tomake asaduku naka aitejenunet, igaliori da asaduku kaigalisit.

⁴ Itolomuni emesa, inapakini da iboro kujuke; itolomuni da epir loka atala, isipokini da atalaike.

⁵ Isipokini da etem loka esabu loka lukisupurununo kiŋaren kasaduku naka aitejenunet, ikajakini aigalisit naka ekek loka ewema lokalaunan.

⁶Isipokini da etem loka ainakineta nuicweio kiŋaren kekek loka ewema lokalaunan loka ewema loka airiamunun.

⁷ Isipokini akalaya kidiŋ kewema loka airiamunun ka etem, ibukokini da akipi tomake.

⁸Isipokini luka alaro kolukunite, ikajakini aigalisit naka erute loka alaro.

⁹ Iyaŋaari akinyet nakinyonyoanakina, inyonyoanakini da ewema lokalaunan, ka iboro kere luejaas toma, italauni da ŋes, ka iboroke kere: eraun lokalaunan.

¹⁰ Inyonyoanakini etem loka ainakineta nuicweio, ka iboroke kere, italauni etem: eraun etem lokalaunan cut.

¹¹Inyonyoanakini akalaya ka aigaŋeteke, italauni ŋes.

¹² Iyanauni Aaron ka odweke okek loka ewema loka airiamunun, iloŋi kes kakip.

¹³ Itanapi Aaron inapen lukalaunak; inyonyoikini ŋes, italauni ŋes, tetere kejaanakini eoŋ kosasedotene.

¹⁴ Iyanauni odweke, itanapi kes ikootin:

¹⁵ Inyonyoanakini kes, kwape inyonyoikinia papakec, tetere kejaanakinete eoŋ kosasedotene: eraun ainyonyoanakiniokec esasedotene lomam enaŋi kamakec anatar aturiokec.”

¹⁶Kiswama Musa kwaŋin: kwape ajaatar kere nuecorakinit EJAKAIT ŋes, kiswama kwaŋin.

¹⁷ Kosodi kolap losodit, kokaru lokiareit, kapaaran nasodit naka elap, kosipokinai ewema lokalaunan.

¹⁸Kosipok Musa ewema lokalaunan, kibwaik aigaŋetake, kosipok abaoike, kirionok ariinoke, kosipok ipirinoke.

¹⁹Koterak ewema owema lokalaunan, kopesik eimukoret loka ewema kujuke, kwape ecorakinitor EJAKAIT Musa.

²⁰ Koyaŋa aitejenunet kibwaik toma asaduku, kirupanak adaketa asaduku, kidokok eicoloŋ-lokaitim asaduku:

²¹ Kitolom asaduku owema lokalaunan, kikajak egoe loka aigalisit, kigalio asaduku naka aitejenunet; kwape ecorakinitor EJAKAIT Musa.

²² Kibwaik emesa toma owema loka airiamunun, kowai loka ewema kari naka agolitomei, kiŋa kaigalisit.

²³Kinapanak imugatin nen kakonyen nuka EJAKAIT: kwape ecorakinitor EJAKAIT Musa.

²⁴ Kibwaik epir loka atala toma owema loka airiamunun, asesena kemesa, kowai loka ewema lokalaunan kari naka eŋalakimak.

²⁵ Kosipok atalai akonyen nuka EJAKAIT: kwape ecorakinitor EJAKAIT Musa.

²⁶ Kosipok etem loka esabu toma owema loka airiamunun kiŋaren kaigalisit:

²⁷ Kisupur lukisupurununo lueuru maa; kwape ecorakinitor EJAKAIT Musa.

²⁸ Kikajak aigalisit naka ekek loka ewema lokalaunan.

²⁹ Kosipok etem loka ainakineta nuicweio okek loka ewema lokalaunan loka ewema loka airiamunun, koinak ainakinet naicweio ka ainakinet naka akiria; kwape ecorakinitor EJAKAIT Musa.

³⁰ Kibwaik akalaya kidiŋ kewema loka airiamunun ka etem, kobukok akipi toma nukilonet.

³¹Kilota Musa ka Aaron ka odweke akaninikec ka akejekec kanen;

³² Nakelomanariata owema loka airiamunun, nakikunyanakiniata otem, elosenenete: kwape ecorakinitor EJAKAIT Musa.

³³ Kosipok luka alaro kolukunito ewema lokalaunan ka etem, kikajak aigalisit naka erute loka alaro. Kwaŋin kodau Musa aswam.

³⁴ Kosodi edou arapiar ewema loka airiamunun, kilelebun da aibuses naka EJAKAIT owema lokalaunan.

³⁵ Mam Musa abu kopedo alomar owema loka airiamunun, naarai eboie edou kanen, kileleba da aibuses naka EJAKAIT owema lokalaunan.

³⁶ Kosodi kelemar edou kokuju kewema lokalaunan, kobwota idwe luka Isirael, kobeenenete alositokec kere.

³⁷ Konye arai mam edou elemaritai, mam alosete aitodol apaaran naelemarere.

³⁸ Naarai ajai edou loka EJAKAIT kuju owema lokalaunan paaran, ajai da akim nen kuare, kakonyen nuka ekek kere loka Isirael, kalositokec kere.