Read Ateso Anyoun 5 Bible Online

Anyoun 5 - Ateso bible

Anyoun 5

¹ Kosodi kokau kopotu Musa ka Aaron, kotemasi Parao atiar, “Inera EJAKAIT, Edeke loka Isirael kwanata ebe, ‘Kisiik ikatuŋa alosit, tetere kepoikinete eoŋ epucit kamodiŋ.’ ”

² Kiner Parao ebe, “Iŋai bo EJAKAIT? Tape eoŋ apupuni ekeporoto, kasodi aisiikin Isirael alosit? Mam eoŋ ajeni EJAKAIT, ido bobo mam esiikini Isirael alosit.”

³ Kotemasi ebe, “Abu Edeke loka Iburanian kiriamun kasio: kiŋaiŋait, kisiik sio kaloto alosit naka apaarasia auni toma amodiŋ, kainakisi asuban mama ejai EJAKAIT Ekosideke; kinyek aidany sio katular, arai kekileŋ.”

⁴ Kotema ekabaka loka Misiri kes atiar, “Ijo Musa, ka Aaron kanukinyo isinyeiniata ituŋa aswamisiokec? koloto neejai abwokonikus.”

⁵ Kiner Parao ebe, “Koany, epuata kwana ituŋa lukotoma akwap, yes da isiyenut kes kotoma abwokonikec.”

⁶ Kapaaran kaŋin abu Parao kicorak iketwasamak ituŋa ka ijakakec da ebe,

⁷“Mam bobo iinanakinete ituŋa anya nusubet amatapalin kwape lem sek; koloto kesi kotukonokis anya kanukec.

⁸Etiai da loka amatapalin, lopelem iswamaenenete kesi, ŋopeŋol ŋes itubokinete; sirikitidisiasi nepetai da: naarai elonwaaka; ŋes einakinit kes aimony ebe, ‘Kisiikinai kaloto kainakisi asuban mama ejai Ekosideke.’

⁹Kijaikisi do ituŋa aswam naetiono noi, kitaaritotor; kinyeis aipup akiro nuka aiŋal.”

¹⁰ Kolomasi iketwasamak ituŋa ka ijakakec da, kolimokis ituŋa ebe, “Inera Parao kwanata ebe, ‘Mam kainakini yes anya.

¹¹Kolototo yesi ikulepek kotukonokis anya kaneidumakinete kere: naarai mam itidisiario akusiswam.’ ”

¹²Kanuka ŋun kisiarakinos ituŋa toma akwap kere nako Misiri atukonokin akasirim aitaraun anya.

¹³Kisinyikokis luketwasamakakec ebe, “Kitodoloto aswamisiokus, ipelueik luka ŋinipaaran, kwape lem iswamaenenaata ejaas anya.”

¹⁴ Koleata iketwasamak luka Parao ijaka luka idwe luka Isiraelluaseunito kesi, kobalas ebe, “Kanukinyo mam yes itodolitotor akusiswam bian ka lolo da, kotoma aisub amatapalin kwape lem sek?”

¹⁵Kosodi kopotu ijaka luka idwe luka Isirael, emonyete mama ejai Parao ebe, “Kanukinyo ikonakinia ikonibulesin kwaŋin?

¹⁶Mam einanakinio ikonibulesin anya, konye kibalai sio ebe, ‘Kosubata amatapalin’: ido koany, eleio ikonibulesin; kwabo erai aibucaret naka ikonituŋa obe.”

¹⁷Konye kotema ebe, “Iloŋwaaka, iloŋwaaka yesi: ŋes ineratar yesi ebe, ‘Kisiikinai kaloto ainakin asuban mama ejai EJAKAIT.’

¹⁸Koloto do aswam; naarai mam kiinakinio anya, konye isubete etiai loka amatapalin lopelem.”

¹⁹Koanyut ijaka luka idwe luka Isirael ebe ejaas kesi ocan naalimunenere ebe, “Mam inonooretc amatapalinikus, karaida ipelueikikus luka ŋinipaaran.”

²⁰Kiriamunos kesi ka Musa ka Aaron, luabwoete korot, eboŋunete kesi kama ejai Parao.

²¹ Kolimokis kes ebe, “Kitei EJAKAIT yes, kotub da; naarai kisilaata yesi sio kakonyen nuka Parao, kakonyen da nuka ibulesinike, aibwaikin ekileŋ akaninikec aaria sio.”

²² Koboŋo Musa mama ejai EJAKAIT, kotema atiar, “EJAKAIT, kanukinyo ikonakinia ituŋa lu erono? Kanukinyo da kiyakuunia eoŋ?

²³ Naarai ageun naabunio eoŋ neejai Parao einer kokirorikon, ekonaki ŋesi ituŋa lu erono; kwabo mam ibu koyuu ikonituŋa nepetai da.”