Read Ateso Anyoun 6 Bible Online

Anyoun 6 - Ateso bible

Anyoun 6

¹ Kotema EJAKAIT Musa atiar, “Kwana ianyuni nueswamakini Parao: naarai kakan nakagogoŋ isiikini kes alosit, kakan nakagogoŋ da ireŋei kes kakwapuke.”

² Kotema Edeke Musa atiar, “Eoŋ YAWE:

³ Abu ketaanyikin Aburaam, ka Isaak, ka Yakob, kwape Edeke Lokapedor kere, konye toma okirorika YAWE mam apotu kajenut eoŋ.

⁴ Etogogoŋ da akaitutuket kakes, ainakin kes akwap naka Kanaan, akwap naka alositekec, naalosenenoto.

⁵ Ido eira eidiny loka idwe luka Isirael, luitubulesenito Imisirian; eitu akaitutuket.

⁶ Ŋes ilimokinia idwe luka Isirael ebe, ‘Eoŋ Yawe, ketolomunete kabwokon naka Imisirian kalemarete kobulesenekec, kalakunete kakan naerioro, ka itubesia luepolok:

⁷ Ido kaseuni yes araun ateker mama ajai, eoŋ da araun Edeke kamakus: ijenunete yesi da ebe Eoŋ Yawe Ekusideke, loketolomuni yes kotoma abwokon naka Imisirian.

⁸ Ido ketolomarete toma akwap naabu kario akakan ainakin Aburaam, ka Isaak, ka Yakob; kainakinete yes airum: Eoŋ Yawe.’ ”

⁹Kolimok Musa idwe luka Isirael kwaŋin; konye mam apotu kiirasi Musa kanuka ican luka itauon, ido kanuka ebulesene loededeŋ.

¹⁰Kotema EJAKAIT Musa atiar,

¹¹“Koloma, kolimok Parao ekabaka loka Misiri kisiik idwe luka Isirael anyoun kakwapuke.”

¹² Kiner Musa kakonyen nuka EJAKAIT, kotema atiar, “Koany, mam idwe luka Isirael keirarito eoŋ; ikoni Parao keirari eoŋ ai, eoŋ lomam kakepitai aituk?”

¹³Kiner EJAKAIT ka Musa ka Aaron, kolimok akiro nuyaŋaara mama ejaas idwe luka Isirael, ido mama ejai Parao ekabaka loka Misiri, aitolomar idwe luka Isirael kakwap nako Misiri.

¹⁴ Lu kes lukapolok luka ikalia luka lukapapaakec: idwe luka Reuben ekiyai loka Isirael; Kanok, ka Palu, ka Kesuron, ka Karumi: ŋul kes ikekia luka Reuben.

¹⁵ Idwe luka Simeon: Yemuel, ka Yamin, ka Okad, ka Yakin, ka Sokar, ka Saul okoku loka aberu Akanaanit: ŋul kes ikekia luka Simeon.

¹⁶ Lu kes ikiroria luka idwe luka Lebi kwape ejaar aurikec; Gereson, ka Kokat, ka Merari; ikar da luka aijar naka Lebi emwaasi akwatat ka akaisauni ka lukanykaarei.

¹⁷Idwe luka Gereson; Libuni ka Simei, kwape ejaatar ikekiakec.

¹⁸ Idwe luka Kokat; Amuram, ka Isikar, ka Keburon, ka Usiel; ikar da luka aijar naka Kokat emwaasi akwatat ka akaisauni ka luuni.

¹⁹Idwe luka Merari; Mali, ka Musi: ŋul kes ikekia luka Ilebin kwape ejaar aurikec.

²⁰ Komany Amuram Yokebed kinac naka papake; kourik ŋes Aaron ka Musa; ikar luka aijar naka Amuram emwaasi ikar akwatat ka akaisauni ka lukanykaarei.

²¹ Idwe luka Isikar; Kora ka Nepeg, ka Sikiri.

²² Idwe luka Usiel; Misael, ka Elasapan, ka Sitiri.

²³ Komany Aaron Eliseba, akoku naka Aminadab, inac naka Nason; kowurik ŋes Nadab ka Abiku, ka Eleasar ka Itamar.

²⁴ Idwe luka Kora; Asir ka Elukana, ka Abiasap; ŋul kes ikekia luka Ikorakin.

²⁵ Komany Eleasar okoku loka Aaron adiopet kadwe nuka Putiel; kowurik ŋes Pinekas. Ŋul kes lukapolok luka ikalia luka lukapapaa luka Ilebin kwape ejaatar ikekiakec.

²⁶ Ŋupeŋul kes Aaron ka Musa, lualimokinit EJAKAIT ebe, “Kitolomasi idwe luka Isirael kakwap nako Misiri kwape ejaar ajorekec.”

²⁷ Ŋul kes lualimokinete Parao ekabaka loka Misiri, aitolomar idwe luka Isirael koMisiri: ŋul kes Musa ka Aaron.

²⁸Kosodi kapaaran naeneratar EJAKAIT ka Musa kakwap nako Misiri.

²⁹ Kotema EJAKAIT Musa atiar, “Eoŋ EJAKAIT: kolimok Parao ekabaka loka Misiri kere nukalimokini jo.”

³⁰ Kotema Musa kakonyen nuka EJAKAIT atiar, “Koany, arai eoŋ loka aituk namam ekepitai, keirari Parao eoŋ biai?”