Read Ateso Anyoun 7 Bible Online

Anyoun 7 - Ateso bible

Anyoun 7

¹ Kobala EJAKAIT Musa ebe, “Koany, ketuluo jo edeke mama ejai Parao; ido Aaron onacekon eraun ekoninabi.

²Ineri ijo kere nukecorakini: elimokini onacekon Aaron Parao, tetere isiikini idwe luka Isirael anyoun kakwapuke.

³ Etogogoŋi eoŋ da etau loka Parao, eyatakini aanyunetaka ka nukaumokinika kakwap nako Misiri.

⁴ Konye mam Parao kiirari jo, ebwaikini eoŋ akakan Misiri, aitolomar akajoresio, ikatuŋa idwe luka Isirael, kakwap nako Misiri, aitolomar idwe luka Isirael kamakec.

⁵ Ejenunete Imisirian ebe Eoŋ EJAKAIT, naarioria akakan Misiri, aitolomar idwe luka Isirael kamakec.”

⁶Kiswamata Musa ka Aaron kwaŋin; kwape kicorakinia kes EJAKAIT, kiswamata kwaŋin.

⁷ Korai Musa loka ikar akaisakanykauni, korai Aaron loka ikar akaisakanykauni ka luuni, inerasi kaParao.

⁸Kobala EJAKAIT Musa ka Aaron ebe,

⁹ “Kiilimok Parao yes ebe, ‘Kitodikinai nakaumokin’: ŋes konyet ilimokinia Aaron ebe, ‘Koyaŋa ebelakon, kocakak akonyen nuka Parao, tetere eraun emun.’ ”

¹⁰ Kolomasi Musa ka Aaron mama ejai Parao, kiswamata kwaŋin kwape kicorakinia EJAKAIT: kocakak Aaron ekebela akonyen nuka Parao, akonyen da nuka ikekejaanakinak, koluor emun.

¹¹ Kosodi Parao da anyaraun lukacoa ka ikacudak; kes imurwok luka Misiri, kiswamata kesi da kwaŋin kakececoa nakaiyeiyea.

¹²Naarai kocakak ŋinituŋanan ekebela koluonoros imunwo: konye kilikono ebela loka Aaron ibelaikec.

¹³ Kogogoŋior etau loka Parao, komam iirari kes; kwape abalar EJAKAIT.

¹⁴ Kobala EJAKAIT Musa ebe, “Eninik etau loka Parao, egirit aisiikin ituŋa alosit.

¹⁵ Kolot ijo mama ejai Parao tupuruc; koany, elomuni alosit ocor; ibwoi ijo da kariri naka ecor airiamakin kaŋes; kitiŋite kakanikon ebela loaluoro emun.

¹⁶ Ilimokini ŋes ebe, ‘EJAKAIT, Edeke loka Iburanian, ŋes keyakunit mama ijai, ebe, “Kisiik ikatuŋa alosit, tetere kejaanakinete eoŋ kamodiŋ: ido koany, aitodol lolo mam ipupunit.”

¹⁷ Ebala EJAKAIT kwanata ebe, “Na ŋes ijenunia ebe Eoŋ EJAKAIT: koany, enomi kebelaka loetiŋit kakanika akipi nuejaas ocor, eluoros aokot.

¹⁸ Etwakete lukecor luejaas ocor, ebosuuni ecor; egirete Imisirian aimat akipi ŋun.” ’ ”

¹⁹ Kobala EJAKAIT Musa ebe, “Kolimok Aaron ebe, ‘Koyaŋa ebelakon, korio akonikan akipi nuka Misiri, ocorinikec, ka alelesiakec, ka ataparinikec, ka abwalinikec kere nuka akipi, koluoros aokot; ejaunos aokot akwap kere nako Misiri, toma oborokec luka akito ka amotiikec nuka amor.’ ”

²⁰ Kiswamata Musa ka Aaron kwaŋin kwape kicorakinia EJAKAIT; kikeu ebela, kinom akipi nuka ecor, kakonyen nuka Parao, kakonyen da nuka ikekejaanakinak; akipi kere nuajaas ocor koluoros aokot.

²¹Kotwakata lukecor; kobosuut akip, komam Imisirian apedorete aimat akipi nuka ecor; kojaut aokot akwap kere nako Misiri.

²²Kiswamata kwaŋin imurwok luka Misiri kotoma acoakec nakaiyeiyea; kogogoŋior etau loka Parao komam iirari kes; kwape abalar EJAKAIT.

²³ Kibelokin Parao koloma togoke, komam ibwaikinit ŋun etau.

²⁴Kobokata Imisirian kere ariri naka ecor kanuka akipi numatan naarai mam apedorete aimat akipi nuka ecor.

²⁵Kotuboros apaarasia akanykaarei, kedau EJAKAIT ainom ecor.