Read Ateso Anyoun 8 Bible Online

Anyoun 8 - Ateso bible

Anyoun 8

¹ Kobala EJAKAIT Musa ebe, “Koloma mama ejai Parao, kolimok ebe, ‘Ebala EJAKAIT kwanata ebe, “Kisiik ikatuŋa alosit, tetere kejaanakinete eoŋ.

² Arai kigir ijo aisiikin kes alosit, koany, enomi iikorunokon kere kaidodokai:

³ Ilweki ecor aidodokai, edokunete elomarete togokon, agolakon naiperi, aperitikon, otogoi da luka ikejaanakinakakon, otuŋakon, okialakon, amotiikon nukinyonis:

⁴Edokunete aidodokai mamakon, ido otuŋakon, kiton ikejaanakinakakon kere.”’ ”

⁵ Kotema EJAKAIT Musa atiar, “Kolimok Aaron ebe, ‘Korio akonikan ka ekonibela ocorin, ka alelesia, ka ataparin da, kitodok aidodokai akwap nako Misiri.’ ”

⁶ Korio Aaron akekan akipi nuko Misiri; kodokut aidodokai korapata akwap nako Misiri.

⁷ Kiswamata imurwok da kwaŋin kotoma acoakec nakaiyeiyea, kitodokut aidodokai akwap nako Misiri.

⁸ Kosodi Parao anyaraun Musa ka Aaron, kiner ebe, “Kilipa EJAKAIT kolema aidodokai kamakaŋ ka ikatuŋa; esiikini ituŋa alosit, koinakis asuban mama ejai EJAKAIT.”

⁹Kobala Musa Parao ebe, “Ituror ijo eoŋ: wori bo kelipakinia jo ka ikonikejaanakinak kosodete aidodokai amudiario kamakon kotogoikon da, kosalakis ocor bon?”

¹⁰ Kobala ebe, “Moi.” Kobala Musa ŋes ebe, “Kojau kwape ejaar akonikirot, tetere ijenuni ebe emamei yeneputosi ka EJAKAIT Edekekosi.

¹¹Enyounete aidodokai kamakon ka otogoikon, ka mama kaikonikejaanakinak ka ikonituŋa; esalakinete ocor bon.”

¹² Konyout Musa ka Aaron kama ka Parao: komony Musa mama ejai EJAKAIT kanuka aidodokai nuainunit Parao.

¹³Kosub EJAKAIT kwape ajaar akirot naka Musa; kotwakikis aidodokai otogoi, alaroi, ka amanat.

¹⁴Kotukonoroi atukon: kouru akwap.

¹⁵ Konye keanyu Parao ebe ejai apak nakibworaret, kitogogoŋ eketau, komam iirari kes; kwape abalar EJAKAIT.

¹⁶Kobala EJAKAIT Musa ebe, “Kolimok Aaron ebe, ‘Korio ekonibela kinom apua naka akwap, koluor ilac kakwap kere nako Misiri.’ ”

¹⁷ Kiswamata kwaŋin; korio Aaron akekan kekebela, kinom apua naka akwap, kojaut ilac otuŋa kotiaŋ da; apua kere naka akwap koluor ijae kakwap kere nako Misiri.

¹⁸ Kiswamata imurwok da kwaŋin kacoakec nakaiyeiyea tetere eyaunete ilac, konye mam apotu kopedosi; kojaut ilac otuŋanan kotiaŋ da.

¹⁹ Kosodi kolimokis imurwok Parao ebe, “Lo ŋes ebokorit loka Edeke.” Kitogogoŋ Parao eketau, komam iirari kes; kwape abalar EJAKAIT.

²⁰ Kotema EJAKAIT Musa atiar, “Konyou tupuruc sek kobwo kakonyen nuka Parao; koany, elomuni alosit akipi; kolimok ŋes ebe, ‘Ebala EJAKAIT kwanata ebe, “Kisiik ikatuŋa alosit, tetere kejaanakinete eoŋ.

²¹Konye arai mam isiikini ikatuŋa alosit, koany, ejukuni icuc luipu noi mamakon, ka neejaas ikonikejaanakinak, ka neejaas ikonituŋa, toma otogoikon da: ilelebunos icuc luipu noi otogoi luka Imisirian, akwap da naejaas.

²² Atiakuni da kapaaran kaŋin akwap nako Gosen, naiboioto ikatuŋa, kinyeis icuc luipu noi ajaut ŋina; tetere ijenuni ebe Eoŋ EJAKAIT loajai kidiŋ kakwap.

²³Ebwaikini atiaket kidiŋ otuŋaka ka ituŋakon: ejaun aanyunet na moi.” ’ ”

²⁴ Kiswama EJAKAIT kwaŋin; kopotu atukon nuka icuc luipu noi toma togo loka Parao, otogoi luka ikekejaanakinak da; kobosu akwap kere nako Misiri kanuka icuc luepu noi.

²⁵Kosodi Parao anyaraun Musa ka Aaron, kobala ebe, “Koloto yesi, koinakis Ekusideke asuban kotoma akwap.”

²⁶Kotema Musa atiar, “Mam ibusakinit aswam kwaŋin; naarai kijaikini luitaleete Imisirian mama ejai EJAKAIT Ekosideke: koany, kiinakini kereka luitaleete Imisirian kakonyenekec, komam kibiribirete sio kamor?

²⁷ Kilosi alosit naka apaarasia auni modiŋ, ainakin asuban mama ejai EJAKAIT Ekosideke, kwape kicorakinia ŋesi sio.”

²⁸ Kotema Parao ebe, “Kesiikini yes alosit, ainakin EJAKAIT Ekusideke asuban kamodiŋ; konye mam ilosete neelwana: kilipakinai eoŋ.”

²⁹Kotema Musa atiar, “Koany, alomari kaneijai, elipi EJAKAIT konyout icuc moi kaneejai Parao, ka ikejaanakinakake, ka iketuŋa: konye kinyek Parao aiŋal bobo aiŋer aisiikin ituŋa alosit ainakin EJAKAIT asuban.”

³⁰Konyou Musa kaneajai Parao, kilip EJAKAIT.

³¹ Kiswama EJAKAIT kwape ajaar akirot naka Musa; kolema atukon nuka icuc kaneejai Parao, ka ikekejaanakinak, ka iketuŋa da; mam abu kosal ediopet da.

³² Kitogogoŋ Parao eketau irwan ŋin da, mam abu kisiik ituŋa alosit.