Read Ateso Anyoun 9 Bible Online

Anyoun 9 - Ateso bible

Anyoun 9

¹ Kotema EJAKAIT Musa atiar, “Koloma mama ejai Parao, kolimok ŋes ebe, ‘Inera EJAKAIT, Edeke loka Iburanian, kwanata ebe, “Kisiik ikatuŋa alosit, tetere kejaanakinete eoŋ.

² Naarai arai kiner aisiikin kes alosit, kigirunio kes bobo.

³ Koany, ejai akan naka EJAKAIT obarenekon luejaas orony, obalasin, ka asigirian, ka akaalai, osipanin da luka aituk ka luka amerekekin: ejaun emelekede loepol noi.

⁴ Etiakari EJAKAIT ibaren luka Isirael kobaren luka Misiri: emamei yenetwani koboro kere lueraas luka idwe luka Isirael.” ’ ”

⁵Koseu EJAKAIT apak kobala ebe, “Iswamai moi EJAKAIT akirot ŋin kakwap.”

⁶ Kiswama EJAKAIT akirot ŋin tupuruc, kotwaka ibaren kere luko Misiri: konye emamei yenabu kotwana kobaren luka idwe luka Isirael.

⁷ Abu Parao kijuka, ido koany, komamei idioda yenatwanit kobaren luka Isiraelin. Konye koninikiar etau loka Parao, mam abu kisiik ituŋa alosit.

⁸Kotema EJAKAIT Musa ka Aaron atiar, “Komukutu ekurwon koupa aileleb akusikanin, kosodi Musa aiwelar kuju kakonyen nuka Parao.

⁹ Eraun apua kakwap kere nako Misiri, edekakinos ituŋa ka itiaŋ abusion nuebulonoros araun ajimii, anatar akwap kere nako Misiri.”

¹⁰ Komukut ekurwon koupa, kobwaata kakonyen nuka Parao; kiwela Musa ekurwon kuju; koraun adek naka abusion nuebulonoros araun ajimii kotuŋa ka itiaŋ da.

¹¹ Kokurwokis imurwok aibwo kakonyen nuka Musa kanuka abusion: naarai adekas imurwok da abusi on, ka Imisirian kere.

¹² Kitogogoŋ EJAKAIT etau loka Parao, mam abu kiira kes; kwape abalar EJAKAIT Musa.

¹³ Kotema EJAKAIT Musa atiar, “Kodil tupuruc sek kobwo kakonyen nuka Parao, kolimok ŋes ebe, ‘Inera EJAKAIT, Edeke loka Iburanian, kwanata ebe, “Kisiik ikatuŋa alosit, tetere kejaanakinete eoŋ.

¹⁴ Naarai irwan na ejukuni akatular kere otaukon, neejaas ikonikejaanakinak kotuŋakon da; tetere ijenuni ebe emamei yenikiputor eoŋ kakwap kere.

¹⁵ Naarai tiariorit akakan, aidany jo ka ikonituŋa katular, ti jo kimudiar kakwap:

¹⁶ Konye abeit kanuka akirot kana, ŋes ketajaria eoŋ jo, tetere ketodikini jo akapedor, kosodi ekakiror alimorio kakwap kere.

¹⁷Aitodol kwana da ituro kereka ijo kotuŋaka ebe, mam isiikini kes alosit?

¹⁸Koany, moi kapak kana, etetepi akako naededeŋ noi, namam apeŋo ejauna Misiri ageun kapaaran naasubunere aitodol lolo.

¹⁹Aso do kijuka, kisunya aitolomun ibarenekon ka lukon kere luijaas orony; naarai ŋinituŋanan ka ŋolitiaŋ loedumakinio orony, mam eyaunitai ore, elei kes akako, etwakete.” ’ ”

²⁰Ŋin yen abu koyoŋ akirot naka EJAKAIT kokejaanakinak luka Parao abu kitoloma ikekejaanakinak ka ibareneke otogoi.

²¹Konye yenimam abu kopodokin akirot naka EJAKAIT abu kinyeik ikekejaanakinak ka ibareneke korony.

²² Kotema EJAKAIT Musa atiar, “Korio akonikan akuj, tetere etepi akako akwap kere nako Misiri, ituŋa ka itiaŋ, ka ŋinikiot yenika emanikor, kakwap kere nako Misiri.”

²³ Kosodi Musa arior ekebela akuj: kijuk EJAKAIT eires ka akako, kijesun akim akwap; kitetep EJAKAIT akako akwap nako Misiri.

²⁴ Kojaun akako, kinyalakina akim kakako, kopol noi, namam apeŋo ejauna akwap nako Misiri kere ageun naaraunor ateker.

²⁵ Koŋata akaka akwap nako Misiri elei ŋinibore kere yenajai orony, ituŋa ka itiaŋ da; kole akaka ŋolikiot lokorony, kobilibil ŋolikiroi lokorony.

²⁶ Dimarai akwap nako Gosen bon, naajaas idwe luka Isirael, ŋes amamei akako.

²⁷ Abu Parao kiyakia anyaraun Musa ka Aaron, kotema kes atiar, “Adiaka con irwan na: edolit EJAKAIT, konye eoŋ ka ikatuŋa kiroko.

²⁸ Kilipa EJAKAIT: naarai apoloor eires ka akako, kesiikini eoŋ da yes alosit, mam bobo isalete.”

²⁹ Kotema Musa ŋes atiar, “Kadau eoŋ alomar kore, ariori akakanin atipet mama ejai EJAKAIT: enaŋi eires, emameun bobo akako, tetere ijenuni ebe EJAKAIT ŋes elopet akwap.

³⁰ Konye ijo ka ikonikejaanakinak, ajeni ebe mam iyonete EJAKAIT Edeke.”

³¹ Koleai abira ka esairi: [1] naarai asuri esairi epolimaete da abira.

³²Konye mam akima ka ekusemet [2] aponi koleai: naarai mam alomunito.

³³ Koloma Musa kaneajai Parao, kiŋa naka ere, korio akekanin mama ejai EJAKAIT: konaŋ eires ka akako, mam akiru abu kotep akwap.

³⁴Keanyu Parao ebe anaŋ akiru ka akaka ka eires, kodiaka bobo, kitininik eketau, ŋes ka ikekejaanakinako

³⁵Kogogoŋior etau loka Parao, mam abu kisiik idwe luka Isirael alosit: kwape abalar EJAKAIT Musa.