Read Ateso Yob 19 Bible Online

Yob 19 - Ateso bible

Yob 19

¹Kosodi koboŋok Yob kotema atiar:

² “Itodolete ai aisiyaloŋoŋ aijaraka, ka abilibil eoŋ kakiro?

³Kimoromoroto eoŋ irwan nu atomon: mam kileicikinito alaŋirikinit eoŋ.

⁴ Arai abeit apaarit eoŋ apaarika ejai keoŋ elopet.

⁵ Arai abeit kitopolooros aluikin eoŋ, kosodete apega keoŋ kanuka amorositika,

⁶ kojenutu na ebe ŋes Edeke loketagwauni, kabwau keboike.

⁷Koany, elalai ebe, ‘Akaje,’ konye mam kapupunio: amony aiŋarakinio, konye komamei etube.

⁸ Anwok ŋesi ekarot komam apedori aitor, ido ebwaik amuton korotinika.

⁹Kalaca da akaibuses, ido alema aboko kakouka.

¹⁰Kabilibil eoŋ iwaitin kere, aeka eoŋ da: aruto akamun kwape kekitoi.

¹¹ Enepu da akenyunyura neajai, kemarak eoŋ araut lokasurupike.

¹² Epote irioŋetake nepepe, itutuete ekecerot mamaka, idukurete airigaun ewemaka.

¹³ “Etwalan ikainacan kama ajai, ka ŋul da luajeni araunos bala lumam ajeni.

¹⁴Esokosi lukatekerika, kapalut da ikapapero.

¹⁵Ŋul da lukiboienenete kotogoka, ka akejaanakinakaka, kanyaritos do eoŋ eloŋwau: arau emoit kakonyenekec.

¹⁶Anyarauni ekakejaanakinan, mam kaboŋokini eoŋ, karaida keŋaiŋa kakaituk.

¹⁷Mam akaberu ejeni eiyenaneka, kasacitos idwe luka totoka.

¹⁸Kamwaŋata idwe ludidik; arai anyouni, kalimonokinete nukaronok.

¹⁹Kalaitos ipadicaka kere: ŋul da luamina kaluikis.

²⁰Akoŋororata akakojo, akuit kamuny naka ikelaka.

²¹Kitimoi, kitimoi, wu yes ipadicaka; naarai katiro akan naka Edeke.

²²Kanukinyo kireitotor kwape ka Edeke, kanukiyo mam yes kiupitor akakuan?

²³“Okwe arai kiwadikatete akakiro! Okwe arai kigirigirai oitabo!

²⁴Arai kigirigirai atiida kakwara nakasuat ka asasit ikar kere!

²⁵Konye ajeni ebe ejari Ekalakunanika, ido kawasia ebwoi kakwap:

²⁶kedau amunyoka amudiario kwaŋin, konye kotoma akuanaka aanyuni Edeke.

²⁷Eoŋ ŋes aanyuni ŋes elopet, akakonye da kes esesenete, kwabo mere nuka ece. Epirisiar aijaraka kotomaka.

²⁸Arai ibalas yesi ebe, ‘Kireu ca ma ŋes! Naarai adumun aliasit naka akirot kotomakeŋ’;

²⁹Koyoŋata ekileŋ: naarai anyunyura eyaŋauni aiticanio kekileŋ, kosodete kojenutu ebe ejai etube.”