Read Ateso Yob 2 Bible Online

Yob 2 - Ateso bible

Yob 2

¹Kojai bobo apaaran kopotu odwe luka Edeke aitodiar kakonyen nuka EJAKAIT, kobu Satan da nepepe kakes aitodiar kakonyen nuka EJAKAIT.

²Kobala EJAKAIT Satan ebe, “Kibuni kai?” Koboŋok Satan EJAKAIT ebe, “Abuni kaboŋoboŋo keilat kakwap, kariariat lailo ka laije.”

³ Kobala EJAKAIT Satan ebe, “Iwomit ijo nuka ekakejaanakinan Yob? Naarai emamei loeputos kaŋes kakwap, etuŋanan lomam itoronitai, loeteni, loeyoŋit Edeke, esacit da aronis: ido eroko itogogoŋit abeiteke, karaida kiimaimait eoŋ ebe keliko ŋes komam akirot.”

⁴Koboŋok Satan EJAKAIT, kotema atiar, “Amuny itia amuny, eebo, einakini etuŋanan kere luejaatar itia aijarake.

⁵ Konye korio cani akonikan, kotiro akekojo ka akekuan, ido kiŋerokini ŋesi jo kakonyenekon.”

⁶Kobala EJAKAIT Satan ebe, “Koany, ejai akanikon; konye kocoite akeijar.”

⁷Konyou do Satan kama ejai EJAKAIT, kitedek Yob abusion nuetioko anyoun kotau loka akejuke kiton osiadukuke.

⁸ Kolem atibolok akojo; kipwokakin okurwon.

⁹ Kotema aberuke ŋes atiar, “Iroko kereka itogogoŋit abeitekon? Koŋer Edeke, kotwana.”

¹⁰ Konye kobala ŋes ebe, “Inera ijo kwape ineratatar aŋor nubaŋiok, Wu okwe! Kidumununei kereka nuejok kakan naka Edeke, komam kidumuni nueroko?” Kotoma kaŋun kere mam abu Yob kodiaka kaŋajepeke.

¹¹ Kosodete kepuputu ipapero luuni luka Yob aronis na kere naadoikini ŋes, kopotu, konyounite ŋinituŋanan kaiboisike; Elipas Etemanit, ka Bilidad Esukit, ka Sopar Enaamatit: kitutukis adolokin amonyakin ka aitalakar ŋes.

¹² Kiteluosi kama elwana, mam apotu kojenut ŋes, kodelosi, komonyata; kocil ŋolituŋanan ekelou, kituanasi apua kuju kakwesikec.

¹³ Kiboioto kaŋes kokwap kodautu apaarasia akanykaarei ka akuaresia akanykaarei, komam loelimokini ŋes adiokirot: naarai apotu kireikis icanike ipu noi.