Read Ateso Yob 22 Bible Online

Yob 22 - Ateso bible

Yob 22

¹Kosodi koboŋok Elipas Etemanit kotema atiar,

² “Epedori etuŋanan ajaut kajokis mama ejai Edeke? Abeit lokacoa itojoka bon.

³Isiyalamikinit kereka Lokapedor kere jo araun loidolit? Arai ca edumuni ŋesi ameda jo aitodolit ikonirotin?

⁴Kitoronit ca ŋesi jo kanuka ayoŋit ŋes, Tape kitubokini?

⁵Mam epol akonironis? Kwabo mam esaŋete numam adolitekon.

⁶Naarai idema ijo onacekon aititineta titai, kosodi ailac luemujalalas ikecenapen.

⁷ Komam itamasenenei ikapasiton akipi, ibu kimik yeniketeŋei inyamat.

⁸Konye abu lokagogoŋ koyoŋa akwap, loeminai da abu kiboikin toma.

⁹Ibu kipapel apuserun, kobilai da akanin nuka ikokiok.

¹⁰Ŋes kiinakini atacin kirimorete, kisiyaloŋoŋi akurian nakisirieŋuni.

¹¹Arai amuton komam ipedori aanyun, kiraparete akipi nukepwak.

¹² Mam kereka Edeke ejai neimukurur toma akuj? ido koany aacer nukokuju kwape isididiatar!

¹³Ka jo da inera ebe, ‘Inyo bo ejeni Edeke? Epedori kereka ŋesi aitub akiro ejai toma amuton nairiono cucucuc?

¹⁴ Eraparito ŋes idouon luitolimakinito, tetere mam eanyuni; elosenenei ŋesi kairim naka akuj.’

¹⁵ Ikoto aitup erot lomojoŋ lokicakacakaete ituŋa lukaronok?

¹⁶Luaponi kourupooroi koroko apakiokec kedolo, aleleas akip ageunetakec.

¹⁷Luapotu kobalas Edeke ebe, ‘Irwa’; Ebe da, ‘Epedori Lokapedor kere aiswamakin sio inyo?’

¹⁸ Kwabo abu ŋesi kilelebik ikecetogoi iboro luejok: konye ainerun naka lukaronok elwana kaneajai eoŋ.

¹⁹ Eanyunete luedolito ŋun, kiyalamikinos; ekienatatar luemamei akirot kes.

²⁰Kobalas ebe, ‘Abeit emudiario ŋul lukinyoikinete sio, anyama akim ŋul luedeuna.’

²¹ “Kecamanaros ka Edeke, kinapakin: kwaŋin idumununia ajokis.

²² Keŋaiŋait, kijau aituutoorio kaitukuke, kiŋadak da akiroke otaukon.

²³Arai iboŋori mama ejai Lokapedor kere, kiteteunio; arat kisukunya numam adolit kolwaka kowemaikon.

²⁴Arai kibwaik abarakon toma apua, ka esabu loka Opir toma alica nuka aguuruto;

²⁵Kosodi eraun Lokapedor kere abarakon, ka epuesa loka akais nuipu mamakon.

²⁶Naarai kwaŋin isiyalamanakinia Lokapedor kere, Itonyouni da akonyenekon mama ejai Edeke.

²⁷Kilipenenei ŋes, iiranari ŋesi jo; itacanakini akoniiyaposio.

²⁸ Arai ineruni akirot, itogogoŋio mamakon; ecaanakini aica ikonirotin.

²⁹Nakibiroriata jo, itemanari ebe, ‘Ejai aitonyounio.’ Itajari ŋesi yenitasono.

³⁰Eyuuni da ŋin yenimam aitoronio; eebo, kiyuununio kanuka alaunit naka akaninikon.”