Read Ateso Yob 3 Bible Online

Yob 3 - Ateso bible

Yob 3

¹ Kokau kaŋun, kooŋo Yob akeituk, kiken akepaaran.

²Koboŋok Yob kotema atiar:

³ “Koolio do apaaran nakolo kauriere eoŋ, ka akuare da nakinera atiar, ‘Epotio ikoku yenisapat.’

⁴Koraun apaaran ŋin amuton! Kinyek Edeke aite ŋes ejai toma akuj, Aica da kinyek ailiyaikin ŋes.

⁵ Konyarata amuton ka etoribe loka atwanare nakec, Kiboikin edou tomake; kitukurianata luisirionete kere apaaran.

⁶Koŋat amuton naejesi cucucuc akuare ŋin! Kinyek aiyalama nepepe kapaarasia nuka ekaru; kinyek alomar otiai loka ilapio.

⁷Koany, korau akuare ŋin arakan; kinyek eporoto lokaiyalama adolokin.

⁸ Kikenoto ŋul luikenete apaaran, luetemokino agwaun Lebiatan. [1]

⁹Komutokoros aacer nuka aikamus: komo aica, konye komam edumuni; komam eseseni abukio nuka atupuruc;

¹⁰Naarai mam abu kogol ikekia luka akoik naka totoka, karaida aibwa ican kakonyeneka.

¹¹“Kanukinyo mam abu katwania ameun kakoik? Kanukinyo da mam abu kajalia aijar naalomunia kakoik?

¹²Kanukinyo da keyuuniata akuŋin? Kanukinyo da keyuuniata ikisin, tape anaki?

¹³Naarai kwana tikapere keliliŋ; tikajotoor; kasodi aibworar;

¹⁴nepepe ka ikabakan ka ikenerunak luka akwap, lukedukete ojeburun kanukec;

¹⁵arai nepepe kikapolok luajaas kesabu, luelelebito itogoikec epuesa.

¹⁶Arai kwape ikoku yenikijecuna yenikibwaitai timam kajaun; kwape imukerun lumam apotu koanyutu aica.

¹⁷Kaŋina ajoŋoosi ikaronok aitican; kaŋina da ŋes ibworariata luilolonyito.

¹⁸Kaŋina ijakakaete ienan; mam epupete eporoto loka eketwasaman.

¹⁹Ejaas ŋina ludidik ka lukapolok; eosikin ebulesit kaneejai ejakaitike.

²⁰ “Kanukinyo einakinia yenikican aanyun aica, ka yenerieba kotau aanyun aijar?

²¹ Luimielas atwanare, konye komam edolokin; luebokete adumun ŋes aitelekarit abar naibwaitai;

²²luibwoŋas cut noi, luiyalamasi, naepedoriata adumun ates.

²³ Kanukinyo kiinakinia aica etuŋanan loibwaitai ekerot, loabu Edeke kirigak eriga?

²⁴Naarai ebuni eidinyika eriŋa enyama, ebukunun agataka kwape akipi.

²⁵Naarai kabunoki eoŋ ibore yeneyaloŋoŋi, kadolok eoŋ ibore yenakurianar.

²⁶Mam eboie ejok, karaida aiyamakina, karaida aiyeŋun; konye kadolokis ican.”