Read Ateso Yob 30 Bible Online

Yob 30 - Ateso bible

Yob 30

¹“Konye kwana kakienatatar eoŋ luetelekarit kapolou, abu kamen lukapapakec komam ejaikini aupakin kaiŋokwo lukosipanika.

²Eebo, agogoŋ naka akecekanin tikaadumakis inyo? Ituŋa luadaun akuruŋanakec.

³Agonororata kanuka aibabanitoi ka ebeli, iboiboete aapoŋor nueokito, kaneemutono ka neesil.

⁴Edeete atilo kotoma amonieik, aliasia nuka erotem kes inyamatakec.

⁵Ireŋeario kokidiŋ otuŋa, ilulukinete kes kwape ilulukinere ekokolan.

⁶Ibusakinit kes aiboi toma akabaan nukotoma aditon, toma apanya nuka akwap ka iburin luka imor.

⁷Emonyete kotoma amonieik, etukonokinos kwap kikukwa.

⁸Eraas idwe luka ibaŋiok, eebo, idwe luka ituŋa luemameete ikiroria; Eleio kireŋearete kakwap.

⁹ “Kwana da araun eoŋ ekosiokec, eebo, araun emocis kamakec.

¹⁰Kalaata, abwata kaneajai, mam inyeinete aimuanakin aimul akonyeneka.

¹¹ Naarai alaca Edeke akeuno, karoiki, ido acakasi kesi aenet kakonyeneka.

¹² Enyounete lukelepa kakanika nakoteten, eremorete akakejen, ido itutuete irotinikec luka amudiar neajai.

¹³ Emunaunete ekarot, esiotikinete ekapola, ituŋa luemameete ekeŋarakinan.

¹⁴ Kwape ebelununotor kotoma arorwa naelal, kokidiŋ kaapoŋor ikokorununos neajai.

¹⁵Ibelokinos nuketasuro mamaka, irusito aibusesuka kwape kekwam, elicari akakerianut da kwape kedou.

¹⁶ “Kwana da ebukokinitai ekatau kotomakaŋ, kekamutu da apaarasia nuka aiticanitoi.

¹⁷ Kaŋorocete akakojo da kuare kotomaka, ariebo da nakeboiboi eoŋ mam iyeŋuni.

¹⁸ Amunaunos ikanapen kanuka agogoŋ naepol naka adekaka, keenieni cut kwape karoot naka ekootika.

¹⁹Kacakaki toma orit, araun kwape kapua ka ekurwon.

²⁰ Amonyi neijai, mam kiboŋokinit, abwoi, kiseseni.

²¹Ibelokin araun lokadedeŋan kama ajai, kanuka agogoŋ naka akonikanin kireu.

²²Kitonyou kaneejai ekwam, kisibwanen, kisiiliil kokwamin.

²³Naarai ajeni kitodoli toma atwanare, togo loiŋadakinitai lukajarak kere.

²⁴“Abeit mam kereka ituŋanan eriori akekan kotoma aapoŋor, karaida ejaun toma opolake mam emonyi aiŋarakinio?

²⁵ Mam kereka abu kamony akiyo mama ejai ŋin yenajai ocan? Mam kereka ekatau akadakin yenilwaritoi?

²⁶ Nakaomitor nuejok, kopote ca nueroko: nakedaritor aica, kodolun ca amuton.

²⁷Ekulaete aomisioka, komam iyeŋunete, kadolokis apaarasia nuka aiticanitoi.

²⁸ Alosi ebworo komamei akoloŋ, abwoi kotoma aurianet, eluluei keŋarakis.

²⁹ Arai eoŋ onace loka ikuei, epadic da loka ikuului.

³⁰Erioniar amunyoka, eregar, akakojo da amwakuut noi.

³¹Ŋes keraunor akadeudeu nakakuudian, akalamaru da koraun eporoto loka ŋul kaluemonyete akiyo.”