Read Ateso Yob 33 Bible Online

Yob 33 - Ateso bible

Yob 33

¹ “Konye jo Yob, keŋaiŋait kopup ekainer, kiira da akakiro kere.

²Koany, aooŋ akaituk, ener aŋajepeka kaitukuka.

³ Elimorete akiroka aitenara naka etauka; ineri akaituk nuejeni kabeit.

⁴ Naarai emoyo loka Edeke ŋes kasubi, eiyeŋane da loka Lokapedor kere ŋes kainakini aijar.

⁵Arai ipedori, koboŋokinoi, kinap akonikiro kakonyeneka, kobwo kokidiŋ.

⁶ Koany, ajai eoŋ neejai Edeke kwape ijaar ijo da, eoŋ da abu keluŋuluŋuun kalup.

⁷ Koany, mam etasuroka kitukuriani jo, kwabo mam akaridanakin kilaŋironokini.

⁸“Abeit iner ijo kapupi eoŋ, eira da eporoto loka akonikiro ebe,

⁹ ‘Arai loasegara, komamei aibucar; arai lomam aronis, ido emameete numam edolit kotomakaŋ.

¹⁰ Koany, emoi ŋesi nukabenyanut kamakaŋ: kanyarit lokasurupike;

¹¹ eeni akakejen oloit, erosi ŋesi ikarotin kere.’

¹² “Koany, kaboŋokini jo, mam jo idolit kakirot kaŋin, naarai itelekarit Edeke ituŋanan kapolou.

¹³ Kanukinyo itepegia ŋes? Naarai mam ŋes imari etiai loka akiroke kere.

¹⁴Naarai inera Edeke irwan atipet, Eebo, irwan aarei, karaida mam ituŋa ibwaikinitos itauon.

¹⁵ Toma airujasit, kaitapoet naka akuare, arai kikamutu ajo nuipu ituŋa, kojotoete kaperisio.

¹⁶Ŋes konyet eŋaaria aki nuka ituŋa, kosodi aibwaikin aanyunet toma aisisianakiniokec,

¹⁷tetere elemuni ituŋanan kotoma ainerunike, kosodi aibwa aiwoŋonut kotuŋanan;

¹⁸itikokini etauke kinyek adoere aipany, ka akeijar da kinyek atwanare kekileŋ.

¹⁹ “Eleconorio da kariebo kaperisike, kauta namam enaŋi kakojoke:

²⁰tetere akeijar esaci atap, ka eketau da inyamat lueminakinitos.

²¹ Edauni akekiriŋ komam bobo etakanuni; ideleleunete akekojo numam lem etakanete.

²²Eebo, ikunyakini etauke aipany, ka aijarake da neejaas luemudiarete.

²³ Arai ejai emalaika kaŋes, ekejulan, ediopet kotoma olukumit, aitodikin ituŋa nuibusakinito;

²⁴ esiana mama ejai, etemari atiar, ‘Koyu ŋes kalomar toma aipany, adum nalakunet;

²⁵iteteuni akuanake aitelekarit naka ikoku; eboŋokini toma apaarasia nuka atumunike.’

²⁶ Ilipi Edeke, ido einakini asianut, tetere eseseni akekonyen kaiyalama, ido inyakakini ituŋanan adoliteke.

²⁷Eyei kakonyen nuka ituŋa kobala ebe, ‘Adiaka eoŋ, kebelok nuedolito, komam nukenarakinete.

²⁸Alaku ekatau kinye alomar toma aipany, akaijar da esesenenei aica.’

²⁹Koany, iswamai Edeke akiro ŋun kere, irwan aarei, eebo, irwan auni, neejai ituŋanan,

³⁰ ainyakun eketau kotoma aipany, tetere ecaikini aica naka lukajarak.

³¹Kojenu ijo Yob, kopupunoi: kililiŋ, kener eoŋ.

³² Arai ejaas nuinera, koboŋokinoi, kiner, naarai akoto aitojok jo.

³³ Arai mam, kopupunoi, kililiŋ, eoŋ da kesisianakini jo acoa.”