Read Ateso Yob 36 Bible Online

Yob 36 - Ateso bible

Yob 36

¹Kosodi Eliku aiyatakin einer ebe:

²“Kobwou ber, ketejenu; naarai eriŋa ejaas nuakoto einer kanuka Edeke.

³Aomi aijeneka kama elwana, ainakini Ekasubanika adolit.

⁴Naarai abeit akiroka mam eraas nuka aiŋal: etuŋanan loedolit kotoma aijen ejai kajo.

⁵“Koany, Edeke ŋes Lokapedor, ido mam emenit ituŋanan kere; erai lokapedor kagogoŋ naka ajenun.

⁶Mam idari aijar naka lukaronok, konye einakini luiticanio nukec.

⁷ Mam elemari akekonyen kaneejaas ikadolitok, konye ibwaikini kes nepepe ka ikabakan koicoloŋo luka ajakanut ikar kere, kitopolooritete.

⁸ Ido arai keeni kirikoi, kikamun da kaunoi nuka aiticanio,

⁹ŋes konyet itodikinia aswamisiokec ka aibucarikec, ebe iswamatos nukeitur.

¹⁰Ido epukori akiikec apupun aisisianakinio, icorakini koboŋutu anyoun kotoma numam adolit.

¹¹ Arai kepuput kijaanakis ŋes, edaunete apaarasiakec kotoma akerianut, ikarukec da kotoma kanuisiyalamikinito.

¹²Konye arai mam epupete, emudianario kekileŋ, etwakete komamei aijen.

¹³“Konye ŋul lumam ejenete Edeke kotauon ibwaete anyunyura, mam iluluete tetere iŋarakinio arai keeni kes.

¹⁴Etwakete koriŋa edisiak, emudianari akeceijar kaneejaas lumam elaete.

¹⁵Eyuuni yeniticanio kanuka aiticanioke, epukori akiikec arai emwaŋitai.

¹⁶Eebo, tikijiodou kotoma ocan, kitolomik aibois naelal, komamei aridanakinio, ka ŋin yenibwaikinio omesakon tiileleba atarion.

¹⁷“Konye ileleba ijo etube loka ikaronok, kikamunete etube ka abeit.

¹⁸Kocoite kinyek anyunyura aijodoor jo toma asekel, kinyek etiai loepol loka alakunio aitapaar jo.

¹⁹Kidauni kereka jo akonibara, kinyek aanyun ican? arai bo apedor kere naka akonigogoŋ?

²⁰Siriŋobelei akuare, neemudianarotor atekerin kaiboisikec.

²¹ Kocoite kinyek aite numam adolit, naarai iseu ŋun aitelekarit aiticanio.

²² Koany, itopolooritai Edeke kotoma apedorike, iŋai bo ekesisianakinan loeputos kaŋes?

²³ Iŋai bo kolo kicorakini ŋes ekerot? Arai bo iŋai epedori einer ebe, ‘Iswama numam adolit’?

²⁴ “Kiitu aitopoloorit aswamisioke, nukeyoononoto ituŋa.

²⁵ Iteenenete ituŋa kere, iteluonorete ituŋa kama elwana.

²⁶ Koany, epol Edeke, ido mam oni kijeni ŋes; mam emoun etiai loka ikaruke.

²⁷Naarai iriari kuju aitanakineta nuka akipi, nuetepete akiru naebuni kolisinake:

²⁸naebukuni akuj, kiceki naepol otuŋa.

²⁹Eebo, ejai kereka yenepedori ajenun idouon naepesikinotor, airetun da nakowemake?

³⁰Koany, epesikini akeica airimor ŋes, ido erapakini ataro naka aŋolol.

³¹Naarai kanuka ŋun etubi akiro nuka atekerin; ekori inyamat luipu noi.

³²Erapakini akekanin toma oimilia, icorakini ainom yenitikinom.

³³Itatamete iporotoikec akekiro, ido elimonokinete ibaren ikwamin lueponito.”