Read Ateso Yob 42 Bible Online

Yob 42 - Ateso bible

Yob 42

¹Kosodi koboŋok Yob EJAKAIT ebe,

² “Ajeni ebe ipedori ijo kere, ido emamei akirot nainerunit naepedori aitikokinio.

³ Iŋai bo lo loimunoni ainerun komamei aijen? Ŋes alimunio ŋun numam ajenunit, akiro nukaumokin nukadeparito, numam ajeni.

⁴ Keŋaiŋait, kiira, kener eoŋ da: keŋit, koboŋok.

⁵ Abu kapupunite ijo kapupun naka akit; konye kwana kaany kakakoŋu.

⁶Ŋes kaupiata, ketoronikin kotoma apua ka ekurwon.”

⁷Kosodi nakedaunia EJAKAIT atemar Yob akiro ŋun, kotema EJAKAIT Elipas Etemanit atiar, “Enepu akanyunyura aluikin jo, ka ipaperokon luarei: naarai mam ineritos akirot naibecokino mamakaŋ, kwape enerar ekabulesit Yob.

⁸ Aso do, kolemutu imoŋin ikanykaarei ka imerekekin ikanykaarei, koloto neejai ekabulesit Yob, koinakis ainakineta nuicweio; kilipakini yes ekabulesit Yob; naarai ŋol ŋes acamunit, kenyek aiswamakin yes kwape ejaar akusibaŋaanut; naarai mam ineritos akirot naibecokino mamakaŋ, kwape enerar ekabulesit Yob.”

⁹Kosodi Elipas Etemanit, ka Bilidad Esukit, ka Sopar Enaamatit koloto, kiswamata kwape kicorakinia EJAKAIT: kosodi EJAKAIT acamun Yob.

¹⁰ Kibelok EJAKAIT aŋatario naka Yob, naelipakinia ipaperoke: koinak EJAKAIT Yob irwan aarei adepar ŋul luajaatar nasodit.

¹¹ Kosodete kopotu ikeinacan kere mama ejai, ka akeinacan kere, ka ŋul kere lukejenete ŋes sek lukenyamenenete atap kaŋes kotogoke: komonyata, kitalakasi ŋes kotoma aronis kere nakebu EJAKAIT koinu ŋes: ido koinak ŋinituŋanan ŋes atutubet naka epuesa, ka ŋinituŋanan egilut loka esabu.

¹² Kwaŋin kisirereŋ EJAKAIT awasia naka Yob adepar ageuneteke: kojaunos kamererekekin alukumin atomon kaoŋon, ka akaalai alukumin akanykape, ka ajookon alukumit nuka imoŋin iareiarei ka asigirian alukumit.

¹³Ido kojaas kidwe lutelepai ikanykaarei ka lupesur iuni.

¹⁴Nasodit komaik ekekiror Yemima; ekiror da loka nakiareit Kesia; ekiror da loka nakiwuniet, Keren-kapuk.

¹⁵Kotoma akwap kere amameete apesur nuajokuka aitelekar adwe nuka Yob: koinak papakec airumet kama kiinacanakec.

¹⁶ Kokau kaŋun kobut Yob ikar akwatat ka akaisaoŋon, koany odweke, ka odwe luka odweke, kiton aturio aoŋon.

¹⁷ Kotwana do Yob, emojoŋit cut, edaunit apaarasia nuipu.