Read Ateso Yob 7 Bible Online

Yob 7 - Ateso bible

Yob 7

¹ “Mere ejai ituŋanan ejie toma akwap? Akepaarasia da mam eputos bala apaarasia nuka ŋol kaloeropio?

²Kwape ebulesit loiŋobelei noi etolim, kwape kaŋol loeropio komuno eropitike;

³ Kwape kwaŋin eoŋ da ketebeitai ilapio lueraas ikamameak, Aponi kakorakin akuaresia nuka aitapasitoi.

⁴Naaperenenoo eoŋ kener atiar, ‘Anyoun wori’? Konye eoja akuare; kebelonokini aisiwalar akwap.

⁵ Enapit akuanaka ikur ka aapoŋor nuka apua; erubanakini amunyoka kosodi kidedeununei bobo.

⁶Isunyito akapaarasia aitelekarit ibore yenitolomanari ekasonyan egoe, edaunos komamei adiomuno.

⁷ “Wu okwe kiitunite ebe akaijar erai ekwam; mam akakonye esesenete bobo ajokis.

⁸ Mam bobo akoŋu naka ŋol kalokaseseni eoŋ kaanyuni bobo: esesenete akonikonye eoŋ, konye kamamei.

⁹ Kwape edaunor edou kilicar, kwape kwaŋin ŋin yenijesari Okatwak mam bobo edokuni.

¹⁰Mam bobo eboŋuni togoke, akeibois da mam bobo ejenuni ŋes.

¹¹ “Ŋes mam apedoria aisililiŋ akaituk; eneri kotoma aburun nakomoyoka; erurumai kotoma adwaris nakotauka.

¹²Arai kereka eoŋ aŋolol, arai etiaŋ loeiliili lokaŋolol, tape ibwaikini ikedarak asesen eoŋ?

¹³Arai kener ebe, ‘Ketalakarit eoŋ ekaitada, etojoniari ekajam arieboka’;

¹⁴ŋes konyet kisiyaloŋoŋoo eoŋ kairujasia, kitukuriani kaitapoeta:

¹⁵Tape ekatau eseuni amiedio, ka atwanare aitelekarit akakojo nu.

¹⁶ Kapianiki akaijar; mam epuda aibut ikar kere: kinyeinai eoŋ; naarai akapaarasia eraas aamameak.

¹⁷ Inyo bo ituŋanan tape jo itopoloori ŋes, tape jo ibwaikinit ŋes etaukon,

¹⁸tape ianyanari ŋes ninirupuruc, aitem ŋes ŋinipak?

¹⁹Itodoli bo ai mam jo inyeini asesen eoŋ, karaida ajalakin aitodol neelikoria eoŋ aimulaka?

²⁰ Arai kadiakit, keswamak jo inyo, ijo loiseseni ituŋa? Kanukinyo kibwaikinia araut adeseikinetekon, tape kalaŋirikini eoŋ bon?

²¹Kanukinyo mam isionio aibucareteka, alemar da numam adoliteka? naarai kwana aperi kotoma apua; ikukurikini amoot eoŋ, konye kamamei.”