Read Ateso Yob 8 Bible Online

Yob 8 - Ateso bible

Yob 8

¹Kosodi koboŋok Bilidad Esukit kotema atiar:

²“Itodoli ai einer ŋun? Itodolete da ai akiro nuka aitukukon asubit bala ekwam lokagogoŋ?

³ Ibelokini kereka Edeke etube? Arai bo ibelokini Lokapedor kere abeit?

⁴Arai apotu idwekon kodiakasi kama ejai, ŋes da kokoraki kes akan naka aibucaretekec:

⁵arai ikoto ijo akukurikin amoot Edeke ka aiŋaiŋa da Lokapedor kere;

⁶arai kosegara ijo ido kitenara da; abeit tikekwenyu kanukon, tikitekeriana aibois naka adolitekon.

⁷Karaida kedit ageunetekon, tikiyatakini noi esaŋekon.

⁸ “Naarai, keŋaiŋait, kiŋitu aturio nuatuboros, kibwaik etau ŋun nuapotu lukapapaakec koŋicut;

⁹ naarai kirai oni luka bian, mam nukijeni, naarai apaarasia nukidauni kakwap eraas kwape etoribe.

¹⁰Mam kereka kes kisisianakinete jo, ka alimonokin jo da, kinerasi akiro nuelomunete kotoma otauonokec?

¹¹“Epedori kereka aladot apoloor komamei erit? Epedori da esege abwaŋun komameete akipi?

¹² Eriŋa itosokok, komam etubub, erinyori do ageikin ikui ice kere.

¹³ Ikote nen irotin luka ŋul kere luimurwokinete Edeke; eolionori amun naka ituŋanan yenimam eyoŋit Edeke.

¹⁴Ebila amunonutuke, Yeniyuunit ŋes esubit bala elago loka asimokok.

¹⁵ Egoŋakina ŋesi etogoke, konye mam ebwoenenei: Iketanakini, konye mam egogoŋoor.

¹⁶Itosokok kaneejai akoloŋ, akekui da eliaiete airiamar emanikorike.

¹⁷Ienienete aliasike atukot nakamor, eseseni aibois naka amor.

¹⁸ Arai emudiario kotoma aiboisike, kosodi eneri ŋesi ebe, ‘Mam kaanyununei jo.’

¹⁹ Koany, ŋin ŋes alakara naka erotoke, ebwaŋunete ice kotoma alup.

²⁰ “Koany, mam Edeke ireŋeari ituŋanan yenedolit, kwabo mam igaŋenenei ŋul luiswamaete nueroko.

²¹Kiton neisilelebia akoniituk akiena, aŋajepekon da eibwoŋ.

²²Ileicikinete ŋul lukilaito jo; mam ejaununei bobo ewema loka ikaronok.”