Read Ateso Isabulin 102 Bible Online

Isabulin 102 - Ateso bible

Isabulin 102

¹Ailip naka yeniticanitoi, eburunit, ebukokini adorianake mama ejai EJAKAIT. Wu EJAKAIT, kiira akailip, Akaimony da kodolu mama ijai.

²Sirikibwa akonyenekon kama ajai, Kapaaran naanyunitor ican: Kitoik akonikit mama ajai; Kapaaran naeworoo Koboŋok katipet.

³ Naarai edaunos apaarasiaka kwape kapuru, Akakojo da icweio kwape kakalas.

⁴Anomor ekatau bala inya, arinyo da; Naarai kemurwoki ainyam ikanyamat.

⁵Kanuka eporoto loka eidinyaka Eminaikinos akakojo amunyoka.

⁶ Asubit bala etolut loka amodiŋ, Aput bala etukuri loka ais.

⁷Akwenyi, ido asubit bala anyiporit, Naesilikinit bon koswi.

⁸ Kamoromoroete lukasurupoka apaaran kere; Luekerepikis mamaka ikenere.

⁹Naarai anyam eoŋ ekurwon bala atap, Enyalak numatanaka kakiyo.

¹⁰ Kanuka aisiopokon, ka akoninyunyura: Naarai kidak eoŋ kosodi acakar.

¹¹ Esubito apaarasiaka bala etoribe loeoliori; Arinyo eoŋ bala inya.

¹² Konye jo wu EJAKAIT, iboienenei ikar kere; Aiitunetekon da mama ejaas aturio kere.

¹³ Inyouni, itimi da Sion: Naarai adolu apak aitim ŋes, Eebo, adolu apale naaseikinitai.

¹⁴ Naarai isiyalamikinito ikonibulesin amoruke, Ido etimoto akepua.

¹⁵ Kwape kwaŋin eyoŋete atekerin kere ekiror loka EJAKAIT, Ikabakan da kere luka akwapin akoniibuses.

¹⁶Naarai aduk EJAKAIT Sion, Atakanu kotoma aibusesuke.

¹⁷ Asesen ailip naka lukibakor, Komam emenit ailipikec.

¹⁸ Iwadikakinio ŋun aturi naebunit: Ituŋa da luesubunio iturete EJAKAIT.

¹⁹ Naarai ete ŋesi kwap kojai kaiboisike nakalaunan naicelelei; Abu EJAKAIT kosesen akwap kojai kuju:

²⁰Akiirar eidiny loka eenat; Alacun ŋul luidaritere atwanare;

²¹Tetere elimorete ituŋa ekiror loka EJAKAIT koSion, Ka aituriteke da koYerusalem;

²² Naetukonokinotor ituŋa, Ka ajakanuto da, aijaanakin EJAKAIT.

²³Abu kiŋoŋa akagogoŋ korot, Kituurian da akapaarasia.

²⁴ Katema atiar, “Wu Ekadeke, sirikiiyaŋa eroko kedauna akapaarasia: Ikarukon eŋatarito aturio kere.”

²⁵ Ageun apeŋo ibu ijo kopet apetetait naka akwap; Aku; da erai aswam naka akaninikon.

²⁶ Edaunos ŋul, konye ibusenenei ijo: Eebo, ŋul kere emojoŋete kwape kanapito; Iloci kes kwape kanapito, ido iloconokinos:

²⁷ Konye ijo ŋopeŋol, Ikonikar da mam enaŋete.

²⁸Iboienenete idwe luka ibulesinikon Aurikec da iticasio kakonyenekon.