Read Ateso Isabulin 103 Bible Online

Isabulin 103 - Ateso bible

Isabulin 103

¹Esabuli loka Daudi. Kiturite EJAKAIT, ijo etauka; Ka iboro da kere luejaas tomakaŋ Kituroto ekekiror lokalaunan.

²Kiturite EJAKAIT, ijo etauka: Sirikiimurwokis akejokisio kere.

³ Loisionie numam adolitekon kere; Loitaŋaleuni adekesiakon kere.

⁴Loelakuni akoniijar kotoma amudiario; Loitanapit jo aboko naka asianut-nakamin ka aitimesia nukajokak.

⁵Loisimonikini jo luejok; Kosodi akonitumun aiteteun bala emorukaalet.

⁶Iswamai EJAKAIT nuedolito, Ka itubesia luka ituŋa kere luemwaŋitai.

⁷Abu ŋesi kitejen Musa ikerotin, Ka akeswamisio da mama ejaas idwe luka Isirael.

⁸ Ileleba EJAKAIT aisioni, esiana da, Iyapi anyunyurikin, epol da akeitim.

⁹ Mam itoroni apaarasia kere; Karaida anyunyuranakin ikar kere.

¹⁰ Mam kiswamakinit oni kwape ejaatar awokoronisio, Karaida airop oni kwape ejaatar numam adolitewok.

¹¹Naarai kwape ejaar akuj kuju noi akwap, Epol kwaŋin akeitim mama ejaas lueyoŋito ŋes.

¹² Kwape elwaniar kide anyoun koto, Esieka kwaŋin aibucanaretawok.

¹³ Kwape itimio papa ikedwe, Kwape kwaŋin itimi EJAKAIT lueyoŋito ŋes.

¹⁴Naarai ejeni asubunetewok; Iitunit ebe kirai oni apua.

¹⁵Etuŋanan, esubito akepaarasia bala inya; Bala aturot naka ekitui, epoloi kwaŋin.

¹⁶Naarai ekutakini ŋes ekwam, emameun; Akeibois da mam bobo ejenuni ŋes.

¹⁷ Konye aitim naka EJAKAIT ejai ameun apaarasia nuŋo kiton apaarasia kere Mama ejaas ŋul lueyoŋito ŋes, Akedolit da mama ejaas idwe luka idwe;

¹⁸ Mama ejaas luericito aitutuketeke, Ka luiitunito aicorakinetake aitodol kes.

¹⁹ Eticat EJAKAIT ekeicoloŋ kotoma akuj; Ido irumit akejakanut kere.

²⁰ Kituroto EJAKAIT, yes ikemalaikan; Yes lukapedor kotoma agogoŋ, luitodolete akekirot, Kopupete eporoto loka akekirot.

²¹ Kituroto EJAKAIT, yes akejoresio kere; Yes ikejaanakinakake, luiswamaete nuekoto ŋesi.

²²Kituroto EJAKAIT, yes akeswamisinei kere, Kaiboisio kere nuka airumiteke. Kiturite EJAKAIT, ijo etauka.