Read Ateso Isabulin 104 Bible Online

Isabulin 104 - Ateso bible

Isabulin 104

¹Wu EJAKAIT Ekadeke, ipolo ijo noi! Inapit aibuses ka apolou.

²Loimukori bon kaica bala anapito; Loapesikinit akuj bala aigalisit:

³ Loiriikini akito nuka agolaike kakipi; Loituluori idouon agalike; Loelosenenei kabebenoka nuka ekwam.

⁴ Loituluori ikwamin ikekiyakia; Ikekejaanakinak akim naesarani.

⁵Loapesi apeteta nuka akwap, Tetere mam ijaŋijaŋa ikar kere.

⁶Irapaa ŋes kataro kwape kegoe; Kibwaut akip kokuju kiroŋan.

⁷Apotu kokerata kaitoronokon; Kiwonyasi kanuka eporoto loka airetunikon.

⁸ Kodokas oroŋan, kijesaros aditon, Kiton aiboisio nuibu kosubakinite kes.

⁹ Ibu kibwaik eikor lomam kes etubete; Tetere mam bobo eboŋorete arapiar akwap.

¹⁰Ijukari akipi nuka atanin aditon; Eleleete koroŋan:

¹¹Itamasete ŋolitiaŋ loka ais; Eŋaleunete itukoi akecekure.

¹²Iboienenete akweny nuka akuj karirikec, Eruosi katenun.

¹³Itapapali iroŋan kakip nuka agolaike; Emonikin akwap araito nuka aswamisiokon.

¹⁴ Isibwaŋikini ibaren inya, Ijaikini ituŋa da ikui; Tetere elemunete inyamat kalup;

¹⁵ Ka ebino loisiyalamikinit etau loka etuŋanan, Ka akinyet naisimilimilio akekonyen, Ka atap da naeinakini etau loka ituŋanan agogoŋ.

¹⁶ Imonikinos ikito luka EJAKAIT; Iresia luka Lebanon, luabu kiraik;

¹⁷Mama edukonokinete akweny akecekais: Etolut da iberosin [5] kes eketogo.

¹⁸ Iroŋan lueojak eraas luka akinei nuka ais; Imor kes ameceta nuka ipooi.

¹⁹ Abu kibwaik elap abilia apakio; Ejeni akoloŋ akelomar.

²⁰ Isubi ijo amuton, koraun akuare; Naecedunotor itiaŋ kere luka amagoro.

²¹ Egatasi iŋatunyo ludidik adumun lumejauna, Emoete da ikecenyamat kama ejai Edeke.

²²Elomuni akoloŋ, eboŋorete, Eperete kabuaikec.

²³ Elosete ituŋa aswamukec, Aitaaritoikec aitodol eboŋ.

²⁴ Wu EJAKAIT, ipu ca ma ipitenyo luka aswamisiokon! Isubit kes kere kacoa: Ileleba akwap abarakon.

²⁵Ejai aŋolol ya, epol ido elal, Ejaas toma iboro lueliatos lumam emarunos, Itiaŋ ludidik ka lukapolok da.

²⁶ Elosete ameerin kanen; Ejai nen Lebiatan, [6] loibu kosubak abolia kanen.

²⁷ Ŋul kere kidarito jo, Tetere iinakini kes ikecenyamat kedol apak.

²⁸Etukonokinete luiinakini kes; Ilakari akonikan, imonikinos kesi lukajokak.

²⁹ Ibwai akonikonyen, iyaloŋoŋoete; Idemari eiyeŋanekec, etwakete, Eboŋorete da apuakec.

³⁰ Ijukuni ekonimoyo, esubunio kes; Ido iteteuni ijo alup.

³¹Kojaenena aibuses naka EJAKAIT ikar kere; Kolelak EJAKAIT aswamisioke:

³² Loeŋolekini akwap, kosodi akwap amaran; Etirori iroŋan, epurunete.

³³Ayeonokini eoŋ EJAKAIT apaarasia kere nuka aijaraka: Ayeonokini aiturit Ekadeke aroko ajari.

³⁴Kojokik ŋes akaomoom; Alelakini EJAKAIT.

³⁵ Komudiarai ikadiakanarak kakwap, Komameunos da ikaronok. Kiturite EJAKAIT, ijo etauka. Kituroto yesi EJAKAIT.