Read Ateso Isabulin 106 Bible Online

Isabulin 106 - Ateso bible

Isabulin 106

¹ Kituroto yesi EJAKAIT! Kituroto yesi EJAKAIT! Kimalata ma EJAKAIT; naarai ejok ŋesi: Naarai ejaenena akeitim ikar kere.

² Iŋai bo gwai epedori alimor aswamisinei nukos nuka EJAKAIT, Arai aitodiar akeiturit kere?

³ Isirereŋitoi ŋul luericete etube, Ŋin da yeniswamai nuedolito kapakio kere.

⁴Wu EJAKAIT, kiitunoi kasianut naitodianakini ikonituŋa; Koanyanarai kaitajarakon:

⁵Kasodi kaany akerianut naka luseunakon, Kalel kaiyalama naka atekerekon, Ketur nepepe kairumetekon.

⁶ Kipou kadiakasi kalukapapaakosi, Kiswama numam adolit, kisub nukaronok.

⁷ Mam lukapapaakosi apotu kojenut nukaumokinikon koMisiri; Mam apotu kiitut aipues naka aitimesiakon; Konye apotu kipaliikis kaŋolol, ŋes Aŋolol Nakareŋan.

⁸ Konye abu ŋesi kitajar kes kanuka ekekiror, Aitejenunia akepedor nakos.

⁹ Abu kiretak da Aŋolol Nakareŋan, koono: Kitotor kes ataro kosubite bala itorito amodiŋ.

¹⁰Kitajar kes kakan naka ŋol kaloalait kes, Kolaku da kes kakan naka lokasurup.

¹¹Korapias akip lukasurupokec; Amamei ediopet da loabu kideun.

¹² Kosodete kiyuut kesi akekiro: Koyooto aiturite ŋes.

¹³Kisunyasi kesi akekiro aimurwokin; Mam apotu kidareut ainerunike:

¹⁴ Konye kikibelikis noi kamodiŋ, Kokodut Edeke kamodiŋ.

¹⁵ Koinak kes nuelipito; Konye kiteseny ikecetauon.

¹⁶ Apotu kikokotekis Musa koidukurun, Ka Aaron da ekalaunan loka EJAKAIT.

¹⁷Koŋaar akwap kiliko Datan, Koburia atukot naka Abiram.

¹⁸Kinep akim katukotokec; Kicwe akim ikaronok.

¹⁹ Kiswamaut itaok koKoreb, Komaata aput nacaluna.

²⁰ Kwaŋin kisiecasi aibusesukec Kaput naka emoŋ loenyami inya.

²¹Kimurwokis Edeke eketajaranikec, Loabu kiswama nukapolok koMisiri:

²²Aswamisio nukaumokin kakwap naka Kam, Ka nusogim kariri naka Aŋolol Nakareŋan.

²³ Kanuka ŋun kobala ebe tikemudia kes, Kedim Musa loseunake aibwo kakonyeneke aidiek, Aibelokin akenyunyura, kinyek amudiar kes.

²⁴ Eebo, komwaŋata akwap naejok, Mam apotu kiyuut akekirot;

²⁵Konye kirurumata kowemanakec, Mam da apupete eporoto loka EJAKAIT.

²⁶Kanuka ŋun korio akekan mama ejaas, Aisibiroria kes kamodiŋ.

²⁷ Isiarisiari aurikec atekerin, Ikaikin kes toma akwapin.

²⁸ Kimorianakinos ka Baal-peor, Konyama asuban nuka lukatwak.

²⁹Kwaŋin kitunyunyurikis ŋes kakeceswamisio; Kodoik atular mamakec.

³⁰Kosodi Pinekas aibwo, kitodol etube: Kitanaŋai atular.

³¹Kimarakinai ŋes adolit ŋin, Anatar aturio kere ikar kere.

³² Kitunyunyurikis ŋes bobo kakipi nuka Meriba, Kodum Musa arereŋ naerono kanukec:

³³Naarai apotu kipaliikis ekemoyo, Kisud einer.

³⁴ Mam kes apotu komudias ituŋa Kwape ecorakinitor EJAKAIT;

³⁵ Konye kinyalinyalunos katekerin, Kisisiaut da akeceswamisio:

³⁶ Kijaanakis aputosiakec: Nuapotu koraunos iica kamakec.

³⁷ Eebo, apotu koinakis ikecedwe lusap ka lupesur araun asuban mama ejaas ajokin.

³⁸ Kobukosi aokot numam aronis, Kes aokot nuka ikecedwe lusap ka lupesur, Luainakinete kesi araun asuban mama ejaas aputosia nuka Kanaan; Komunaun akwap kaokot.

³⁹Kwaŋin komunaunos kanueswamaete, Koelos da kaswamisiokec.

⁴⁰ Kanuka ŋun kinep anyunyura naka EJAKAIT aluikin iketuŋa, Kola da airumeteke.

⁴¹ Koinak kes akanin nuka atekerin; Lualaito kes kirumata kes.

⁴²Koroikis kes lukasurupokec, Kitonokokai kamakec.

⁴³Abu koyu kes irwan nuipu; Konye kipaliikis kainerunikec, Kitisiloto numam adolitekec.

⁴⁴ Konye abu kosesen icanikec, Naapupunio aimonyokec:

⁴⁵Kiitu aitutuketeke kamakec, Kiitu da kwape ejaar aipues naka aitimesiake.

⁴⁶ Koinak kes aitimio Kama ejaas ŋul kere luaŋatarito kes.

⁴⁷ Kitajarai sio, wu EJAKAIT Ekosideke, Kotukonokinai sio katekerin, Aimalaenen ekonikiror lokalaunan, Kebwoŋananas kotoma aiturit jo.

⁴⁸Kituritete EJAKAIT, Edeke loka Isirael, Ameun ikar luŋo kiton ikar kere. Kotemasi ituŋa kere ebe, “Amen.” Kituroto yesi EJAKAIT!