Read Ateso Isabulin 107 Bible Online

Isabulin 107 - Ateso bible

Isabulin 107

¹ Kimalata ma EJAKAIT; naarai ejok ŋesi: Naarai ejaenena akeitim ikar kere.

²Kotemasi lulakuna luka EJAKAIT kwaŋin, Lualaku ŋesi kakan naka lokasurup;

³ Kotuk kes kakwapin, Anyoun kokide koto da, Anyoun kagolitomei ka eŋalakimak da.

⁴Kitoroto amodiŋ ipasitos; Mam apotu kodumut ere loiboikinos.

⁵Kiilor etaukec kotomakec Kanuka eteŋei ka akure.

⁶ Kosodete kesi aimony mama ejai EJAKAIT kotoma ocanikec, Koyu kes kationisikec.

⁷ Kiŋarenik kes korot loitenara, Tetere elosete ore loiboikinos.

⁸Okwe ti ca ituŋa kituroto EJAKAIT kanuka ajokisike, Kanuka aswamisioke da nukaumokin mama ejaas idwe luka ituŋa!

⁹ Naarai isimonikini etau loimiela, Etau da loeriebi eteŋei ilelebi nukajokak.

¹⁰ Ŋul lueboiete kamuton kotoribe da loka atwanare, Koenitete kaiticanit ka asuat;

¹¹ Naarai apotu kipaliikis akiro nuka Edeke, Komenata ainerunet naka Loejai kuju kakuj:

¹² Kanuka ŋun abu ŋesi kitisil ekecetau kaitaaritoi; Kibiroros, komamei yeniŋarakinit.

¹³Kosodete kesi aimony mama ejai EJAKAIT kotoma ocanikec, Kitajar kes kationisikec.

¹⁴ Kitolom kes kamuton kotoribe da loka atwanare, Kobilibil aenetakec.

¹⁵Okwe ti ca ituŋa kituroto EJAKAIT kanuka ajokisike, Kanuka aswamisloke da nukaumokin mama ejaas idwe luka ituŋa!

¹⁶ Naarai abil ikirigin luka aisinit, Atub da atiketa nuka asua.

¹⁷ Iticanio ibaŋiok kanuka epalikec, Kanuka numam adolitekec da.

¹⁸Egirit ekecetau inyamat luka ŋolipone kere; Ikunyakinete da orutei luka atwanare.

¹⁹Kosodete kesi aimony mama ejai EJAKAIT kotoma ocanikec, Kitajar kes kationisikec.

²⁰ Ijukari akekirot, itaŋaleuni kes, Eyuuni da kamudiariokec.

²¹Okwe ti ca ituŋa kituroto EJAKAIT kanuka ajokisike, Kanuka akeswamisio da nukaumokin mama ejaas idwe luka ituŋa!

²² Koinakisi asuban nuka aimal, Kolimosi da akeswamisio kayoore.

²³Ŋul luelosete aŋolol kotoma ameerin, Luiswamaete kotoma akar naepol;

²⁴Eanyunete ŋul aswamisio nuka EJAKAIT, Ka nukaumokinike kataro.

²⁵Naarai icorakini, itukusi da ekwam lokos, Loedakuni akailan.

²⁶ Edokarete kiton akuj, koboŋorete bobo ataro: Eburunete ikecetauon kanuka ican.

²⁷Iriaŋanaros lailo ka laije, kigetigetas bala ekameran, Kipirisiaros ikecetauon piris.

²⁸Kosodete kesi aimony mama ejai EJAKAIT kotoma ocanikec, Kitolom kes kationisikec.

²⁹ Kisinapikini ekwam, Tetere akailan epalarete.

³⁰Kosodete kesi aiyalamikin naarai apalasi; Kwaŋin eyaŋaari kes odoket loakotosi kesi adokaria.

³¹Okwe ti ca ituŋa kituroto EJAKAIT kanuka ajokisike, Kanuka akeswamisio da nukaumokin mama ejaas idwe luka ituŋa!

³²Kitopoloosi kesi da ŋes katukot naka ituŋa, Kituroto da ŋes kaibois naka imakio.

³³ Ituluori icorin amodiŋ, Ka atanin da akwap naeonit;

³⁴ Akwap nakamio ituluori amodiŋ naka abalaŋ, Kanuka aronis naka ŋul kaluiboiete kotoma.

³⁵ Ituluori amodiŋ abwal naka akipi, Ka akwap naeonit da atanin.

³⁶ Isiboikini ŋina lueriebi eteŋei, Tetere itemokinete ere loiboikinos;

³⁷Eyeete amanat, iraete da imusabibun, Edumunete amio naepol.

³⁸ Isirereŋi kes da, tetere euriaros noi; Mam ecamakini ikecebaren aiŋoŋar.

³⁹ Kosodi bobo naiŋoŋarere kes, naitukukumere Kanuka aroikinio, ka ican, ka aiturur.

⁴⁰Ebukokini ikapolok emenit, Isirimi da kes kamodiŋ naemamei erot.

⁴¹ Kwabo itonyouni luilwaritos alemun kaiticaniokec, Einakini ikalia luesubito bala esipan.

⁴² Eanyunete luitenara kotauon, kiyalamikinos; Numam adolit kere ebutarete.

⁴³ Ŋin yeneco kibwaik ŋun otau, Koomoomata aitimesia nuka EJAKAIT.