Read Ateso Isabulin 118 Bible Online

Isabulin 118 - Ateso bible

Isabulin 118

¹ Okwe kimalata EJAKAIT, naarai ejok ŋesi: Naarai ejaenena akeitim ikar kere.

² Kotema do Isirael ebe, “Ejaenena akeitim ikar kere.”

³Kotema do ekal loka Aaron ebe, “Ejaenena akeitim ikar kere.”

⁴Kotemasi kesi da lueyoŋito EJAKAIT ebe, “Ejaenena akeitim ikar kere.”

⁵ Abu kewone EJAKAIT kationisika: Kaboŋok EJAKAIT, kebwaik da aibois naelal.

⁶ Ejai EJAKAIT owaika, mam akurianar: Inyo bo epedori ituŋanan aiswamakin eoŋ?

⁷ Ejai EJAKAIT owaika kama kaŋul kalukeŋarakinete eoŋ: Kanuka ŋun aanyuni eoŋ nuepuda kama kaŋul kalukalaito eoŋ.

⁸ Ejok amun EJAKAIT, Itia amunokina ituŋanan.

⁹ Ejok amun EJAKAIT, Itia amunokina ikapolok.

¹⁰Kalukut eoŋ atekerin, Kokiror loka EJAKAIT amudiari kes.

¹¹ Kalukut eoŋ, eebo, kalukut: Kokiror loka EJAKAIT amudiari kes.

¹² Kalukut eoŋ bala ao; Aduŋiosi kesi bala akim nakokukwa: Kokiror loka EJAKAIT amudiari kes.

¹³Ibu koremo eoŋ noi tetere ebiror: Konye abu EJAKAIT keŋarak.

¹⁴ EJAKAIT ŋes akagogoŋ, ekakosio da, Ido araun ŋesi akaitajar.

¹⁵Eporoto loka ailel ka aitajario ejai toma oweman luka ikadolitok: Iswamai akan nakoteten naka EJAKAIT nukatitiŋ.

¹⁶ Itopolooritai akan nakoteten naka EJAKAIT: Iswamai akan nakoteten naka EJAKAIT nukatitiŋ.

¹⁷ Mam atwani konye ajari, Kasodi alimor aswamisio nuka EJAKAIT.

¹⁸ Kaleco noi EJAKAIT eoŋ, Konye mam abu kainak atwanare.

¹⁹ Koŋaikinai eoŋ ikirigin luka adolit: Alomari tomakec, emalai EJAKAIT.

²⁰ Ŋol ŋes erute loka EJAKAIT; Elomarete ikadolitok tomake.

²¹Kemalaenenei jo, naarai kiboŋok eoŋ, Ido iraun akaitajar.

²² Amoru naaŋerete ikadukok Araun nakapolon naka agor.

²³ Ŋin ŋes aswam naka EJAKAIT; Eumokina noi kakonyenewok.

²⁴ Na ŋes apaaran naasubi EJAKAIT; Kileli keyalamasi da kotomake.

²⁵ Wu EJAKAIT, kitajarai kiŋaiŋait: Wu EJAKAIT, kiŋaiŋait, kijuk akerianut.

²⁶ Isirereŋitoi ŋol loebuni kokiror loka EJAKAIT: Kilipaki isio yes arereŋ kotogo loka EJAKAIT.

²⁷ EJAKAIT ŋes Edeke, kiinak oni aica: Koenikisi asubanit kaunoi amumwar nuka etem.

²⁸ Irai ijo Ekadeke, kemalaenenei jo, Irai ijo Ekadeke, ketopoloonori.

²⁹Okwe kimalata EJAKAIT; naarai ejok ŋesi; Naarai ejaenena akeitim ikar kere.