Read Ateso Isabulin 119 Bible Online

Isabulin 119 - Ateso bible

Isabulin 119

¹ Isirereŋitoi ŋul luedolito cut korot, Luelosete kokisil loka EJAKAIT.

² Isirereniroi ŋul luericito aitejenunetake, Luemoete ŋes kekecetau kere.

³ Eebo, mam ŋul iswamaete numam adolit, Elosenenete korotinike.

⁴Ibu kicorak sio aituutooretakon, Tetere kidunyakini airic kes.

⁵ Okwe karai kicasito ikarotin: Tiaricenenei ikonikisila!

⁶ Ŋes do mam kerumiata ileic Naacamunia akoniicorakineta kere.

⁷Kemalaenenei jo ketau loitenara, Naesisiaunia itubesiakon luedolito.

⁸Aricenenei ikonikisila: Okwe sirikiijal cut!

⁹ Ikonakini ai ekatumunan italauni ekerot? Kocoite kwape ejaar akonikirot.

¹⁰ Kamo eoŋ jo kekatau kere: Okwe, kenyek apaar kaicorakinetakon.

¹¹ Eŋadak eoŋ akonikirot otauka, Kenye adiakar kamakon.

¹²Kituritete jo, wu EJAKAIT: Kisisianakinai eoŋ ikonikisila.

¹³Alimonok eoŋ kakaŋajep Itubesia kere luka aitukukon.

¹⁴Alelakinit eoŋ erot loka aitejenunetakon, Kwape alelakinitor abar kere.

¹⁵ Aomoomoenenei aituutooretakon, Ido acamunit ikonirotin.

¹⁶Esiyalamikinit ikonikisila: Mam kemurwokini akonikirot.

¹⁷Kikonak ekonibulesit nukajokak, tetere ajari; Kasodi karic akonikirot.

¹⁸Kitikweny akakonye, Kaany nukaumokin kokisilakon.

¹⁹ Arai eoŋ ekeboiororon kakwap: Sirikibwa akoniicorakineta kamakaŋ.

²⁰Emwokolikin ekatau kanuka eimiel noi Itubesiakon apakio kere.

²¹Ibu kitoron luiturokina: Kikenoi luepaarete kaicorakinetakon.

²²Kolema amoromoro ka amwaŋio kamakaŋ, Naarai aric eoŋ aitejenunetakon.

²³Apotu ikapolok da kiboikinos kinerasi aluikin eoŋ: Konye abu ekonibulesit koomoomoi ikisilakon.

²⁴Esiyalamikinit eoŋ aitejenunetakon, Eraas da iinerunetaka.

²⁵ Eminaikin ekatau apua: Kitajarunai kwape ejaar akonikirot.

²⁶ Alimo ikarotin, ijo da ibu Koboŋok: Kisisianakinai ikisilakon.

²⁷Kitejenunai erot loka aituutooretakon: Kasodi konyet aomoom aswamisiokon nukaumokin.

²⁸Epirisiar ekatau kanuka alaŋir: Kitogogoŋoi kwape ejaar akonikirot.

²⁹ Kolema erot loka aiŋal kamakaŋ, Ido koinakinai ikonikisila kasianut.

³⁰Aseu eoŋ erot loka amunonut: Ebwaik itubesiakon akonyeneka.

³¹Eminaikin eoŋ aitejenunetakon: Wu EJAKAIT, sirikiisurum ileic.

³² Akerianari orot loka aicorakinetakon, Naitalalaaria ekatau.

³³ Wu EJAKAIT, kisisianakinai erot loka ikisilakon: Kasodi aricit aitodol awasia.

³⁴ Ae acoa, kasodi aidar ekonikisil: Eebo, arici eoŋ kekatau kere.

³⁵Kitotoroi eoŋ osokot loka aicorakinetakon; Naarai esiyalamikinit eoŋ kes.

³⁶ Kogoŋak ekatau aitejenunetakon, Konye mere airaŋanut.

³⁷ Kibelok akakonye kaite aamameak, Kitajarai da korotinikon.

³⁸ Kitogogoŋik ekonibulesit akonikirot, Naerai naka ayoŋite jo.

³⁹Kibelok akamorosit naketukuriani; Naarai ejokuka itubesiakon.

⁴⁰Koany, emiela eoŋ aituutooretakon, Kitajarai kotoma adolitekon.

⁴¹Wu EJAKAIT, kadolokis eoŋ aitimesiakon, Aitajarakon kwape ejaar akonikirot.

⁴²Kwaŋin adumuni eoŋ aboŋokinet naaboŋokini yenikamoromoroi; Naarai amuno eoŋ akonikirot.

⁴³Sirikilema akirot naka abeit kaitukuka: Naarai amunokin itubesiakon.

⁴⁴Kasodi adunyakin airic ikonikisila, Ikar ka ikar.

⁴⁵ Kalakakin kalositeka; Naarai amoot aituutooretakon.

⁴⁶ Eneri da nuka aitejenunetakon kakonyen nuka ikabakan, Mam kerumete ileic.

⁴⁷Esiyalamikini eoŋ aicorakinetakon, Nuamina.

⁴⁸Ariori akakan mama ejaas aicorakinetakon, nuamina; Aomoomoi da nuka ikisilakon.

⁴⁹Kiitu akirot kama ejai ekonibulesit, Naarai ibu kisumun eoŋ.

⁵⁰ Na ŋes alakaraka kotoma aiticanioka., Naarai akonikirot ketajar eoŋ.

⁵¹ Kesekeloto eoŋ noi luisosoloko: Konye mam apaarit kokisilakon.

⁵²Eitu itubesiakon lukolo jo, wu EJAKAIT Alakara da.

⁵³ Kerum eoŋ anyunyura naepol, Kanuka ikaronok luejalete ikonikisila.

⁵⁴Araunos ikisilakon ikakososinei Kotojo loka ejobiraneka.

⁵⁵ Wu EJAKAIT, eitu ekonikiror kuare, Aric ikonikisila.

⁵⁶Ejai eoŋ ŋin Naarai aricit aituutooretakon.

⁵⁷ EJAKAIT ŋes akorakineteka: Abu kalimo ebe arici akonikiro.

⁵⁸Abu keŋaiŋa asianutukon kekatau kere: Kitimoi kwape ejaar akonikirot.

⁵⁹ Abu kaomoom irotinika, Kebeleu da akakeje mama ejaas aitejenunetakon.

⁶⁰Abu kesunyak, mam abu ketumor, Airic aicorakinetakon.

⁶¹Kekodikodata aunoi nuka ikaronok; Konye mam kemurwokinito ikonikisila.

⁶² Anyouni kidiŋebai aimal jo Kanuka itubesiakon luedolito.

⁶³Arai eoŋ epaup loka ŋul kere lukiyoŋito jo, Ka ŋul da luericito aituutooretakon.

⁶⁴ Wu EJAKAIT, ileleba akwap akoniitim: Kisisianakinai ikonikisila.

⁶⁵Ibu kikonak ekonibulesit ejok, Wu EJAKAIT, kwape ejaar akonikirot.

⁶⁶Kisisianakinai etube loejok ka aijen; Naarai eyuu akoniicorakineta.

⁶⁷ Eroko eoŋ kiticana abu kapaa; Konye kwana aricit akonikirot.

⁶⁸ Ijok ijo, ido iswamai nuejok; Kisisianakinai ikonikisila.

⁶⁹ Kenyonyoikis eoŋ luiturokina aiŋal: Arici aituutooretakon kekatau kere.

⁷⁰ Etariono ekecetau bala asiepai; Konye eoŋ esiyalamikinit ikonikisila.

⁷¹ Ejok keticani; Tetere esisiauni ikonikisila.

⁷²Ekisil loka aitukukon ejok kamakaŋ, Adepar ilukumin luka esabu ka epuesa da.

⁷³ Akonikanin kasubete eoŋ keticata da; Ae acoa tetere esisiauni aicorakinetakon.

⁷⁴ Kaanyunete eoŋ ŋul lukiyoŋito jo kosodete aiyalamikin; Naarai amunokin akonikirot.

⁷⁵ Wu EJAKAIT, ajeni ebe edolito itubesiakon, Ebe da kitican ijo eoŋ kotoma amunonut.

⁷⁶Keŋaiŋait, ketalaka asianutukon-nakamin, Kwape ejaar akonikirot mama ejai ekonibulesit.

⁷⁷Kadolokis eoŋ akoniitimesia nukajokak, tetere ajari: Naarai kesiyalamikinito ikonikisila.

⁷⁸ Kisurumai luiturokina ileic; naarai kebirosi kasabanakin: Konye eoŋ aomoomoi nuka aituutooretakon.

⁷⁹Kibeleunos ŋul lukiyoŋito jo mama ajai, Ejenunete da aitejenunetakon.

⁸⁰ Korau ekatau loedolit kokisilakon: Tetere mam kerumete ileic.

⁸¹ Imwokolikin ekatau kanuka aitajarakon: Konye amunokin akonikirot.

⁸² Ewariwarete akakonye kanuka akonikirot, Nape atemaria ebe, “Wori bo kitalakaaria?”

⁸³ Naarai asub bala eriagi loka emukule kotoma apuru: Konye mam kemurwokinito ikonikisila.

⁸⁴ Imwaasi ai apaarasia nuka ekonibulesit? Wori bo itodolio ijo etube mama ejaas ŋul lukemanito eoŋ?

⁸⁵ Kabokanakis luiturokina apanya, Lumam etupito ikonikisila.

⁸⁶ Aicorakinetakon kere eraas numunon: Kemanito kasabanakin; kiŋarakinai eoŋ.

⁸⁷Nepetai kes amudiar eoŋ kakwap; Konye mam abu kajal aituutooretakon.

⁸⁸Kitajarai kwape ejaar asianutukon-nakamin; Kwaŋin arici aitejenunet naka aitukukon.

⁸⁹ Wu EJAKAIT, icasit akonikirot Kotoma akuj ikar kere.

⁹⁰Enatarit amunonutukon aturio kere: Iticat ijo akwap, ido iboie.

⁹¹ Iboiete lolo kwape ejaatar aicorakinetakon; Naarai iboro kere eraas ikonibulesin.

⁹² Kedim eoŋ aisiyalamikinit ikonikisila, Ti do eoŋ kaolio kotoma aiticanioka.

⁹³Mam cut kemurwokinete aituutooretakon; Naarai kes kitajaria ijo eoŋ.

⁹⁴ Arai eoŋ ekon, kitajarai; Naarai amoot eoŋ aituutooretakon.

⁹⁵Kedareut ikaronok amudiar eoŋ; Konye eoŋ aomoomoi nuka aitejenunetakon.

⁹⁶ Aany esaŋe loka adolit kere; Konye elal noi akoniicorakinet.

⁹⁷ Amina ca ma eoŋ ikonikisila! Aomoomoi eoŋ nukec apaaran kere.

⁹⁸ Ketocout eoŋ aicorakinetakon adepar lukasurupoka, Naarai ejaenenas keoŋ tiritir.

⁹⁹ Epol eoŋ aijen adepar ikakesisianakinak kere; Naarai aomoomoenenei nuka aitejenunetakon.

¹⁰⁰ Ajeni eoŋ nuipu adepar imakio, Naarai aricit eoŋ aituutooretakon.

¹⁰¹ Etikok akakeje aibe ŋolirot kere loerono, Tetere arici akonikirot.

¹⁰²Mam apaarit kotubesiakon; Naarai kisisianak ijo eoŋ.

¹⁰³ Ewinyak ca ma akirokon kaŋajepeka! Eebo, ewinyak adepar esik kaitukuka!

¹⁰⁴Aituutooretakon kes adumanakini eoŋ aijen: Kanuka ŋun alait ŋolirot loka aiŋal.

¹⁰⁵Akonikirot ŋes atala naka akejeka, Aica da nakosokotoka.

¹⁰⁶ Eyapo, ido etogogoŋ ŋun ebe, Arici itubesiakon luedolito.

¹⁰⁷Keticani noi: Wu EJAKAIT, kitajarai kwape ejaar akonikirot.

¹⁰⁸ Keŋaiŋait jo, kocam ainakineta nukakote nuka aitukuka, Wu EJAKAIT, kisisianakinai da ikonitubesia.

¹⁰⁹ Ejai ekatau ducuduc akanika; Konye mam kemurwokinito ikonikisila.

¹¹⁰Kalokata ikaronok keic; Konye mam abu kapaa kaituutooretakon.

¹¹¹ Etarau eoŋ aitejenunetakon bala airumet ikar kere; Naarai elelakinit ekatau kes.

¹¹²Agoŋak ekatau aitodol ikonikisila, Ikar kere, aitodol awasia.

¹¹³Alait eoŋ ŋul luka itauon iarei; Konye amina ikonikisila.

¹¹⁴ Ijo ŋes akaŋopis ekabuku da: Amunokin eoŋ akonikirot.

¹¹⁵ Konyout kamaka yesi luiswamaete aronis; Tetere arici eoŋ aicorakineta nuka Ekadeke.

¹¹⁶ Kigaŋai, kwape ejaar akonikirot, tetere ajari; Kenyeis ileic airum kotoma amunoka.

¹¹⁷ Kigaŋai, keyamakin, Kasodi acamun ikonikisila ducuduc.

¹¹⁸Iner ijo ŋul kere luepaarete kokisilakon; Naarai aiŋalakec erai aamameak.

¹¹⁹ Icaka ijo ikaronok kere luka akwap bala asusujo: Kanuka ŋun amina eoŋ aitejenunetakon.

¹²⁰ Emarani akakuan kanuka ayoŋit jo; Ido ayoŋit itubesiakon.

¹²¹Etodol eoŋ etube ka abeit: Sirikiijalak kama ejaas lukaroikinito eoŋ.

¹²² Kobwaa ekonibulesit, kanuka ajokis: Kinyeis luiturokina aroikin eoŋ.

¹²³Ewariwarete akakonye kanuka aitajarakon, Ido kanuka akirotokon naedolit.

¹²⁴Kikonak ekonibulesit kwape ejaar akoniitim, Kisisianakinai da ikonikisila.

¹²⁵Arai eoŋ ekonibulesit, ae acoa; Tetere ajenuni aitejenunetakon.

¹²⁶Adol apak EJAKAIT aswam, Naarai etapalaut kesi ikonikisila.

¹²⁷ Kanuka ŋun amiria aicorakinetakon, Adepar esabu, eebo, adepar esabu loejok.

¹²⁸Ŋes aderio aituutooretakon kere nuka akiro kere nuejok; Alait da ŋolirot loka aiŋal.

¹²⁹Eumokina aitejenunetakon: Ŋes ericia ekatau kes.

¹³⁰ Naenaarotor akonikiro itaeaikinete; Itejenikinete ijimat.

¹³¹Abu kaooŋ akaituk noi, abu keyenanakin; Naarai emiela aicorakinetakon.

¹³² Kibelokin mama ajai, kitimoi, Kwape itapitor aikonanakin ŋul lueminas ekonikiror.

¹³³ Kiteten ekalose kakirotokon, Kinyeis numam adolit kere ayait eoŋ.

¹³⁴ Kolakunai karoikinio naka ituŋanan: Kwaŋin ŋes aricia aituutooretakon.

¹³⁵ Kitacaik ekonibulesit akonikonyen; Kisisianakinai da ikonikisila.

¹³⁶ Eleleete icorin luka akipi kakonyeka, Naarai mam ituŋa ericito ikonikisila.

¹³⁷ Wu EJAKAIT, idolit ijo, Ikonitubesia da itenara.

¹³⁸Ibu kicorak aitejenunetakon kadolit, Ka amunonut naepol.

¹³⁹Kerum eoŋ ekokote Naarai emurwokis lukasurupoka akonikiro.

¹⁴⁰Ililiauna akonikirot noi; Kanuka ŋun ŋes eminaritor ekonibulesit.

¹⁴¹ Adite eoŋ kamenitai da: Konye mam kemurwokinito aituutooretakon.

¹⁴² Adolitekon ŋes adolit namam enaŋi, Ikonikisila da kes abeit.

¹⁴³Kadoikis eoŋ ican ka ariebo; Konye kesiyalamikinito aicorakinetakon.

¹⁴⁴Edolite aitejenunetakon ikar kere; Ae acea, tetere ajari.

¹⁴⁵Abu kewone kekatau kere; koboŋokinoi, wu EJAKAIT: Aricenenei ikonikisila.

¹⁴⁶Abu kewone jo; kitajarai, Tetere arici aitejenunetakon.

¹⁴⁷Abu kanyou eroko etop kelomuna, kamony: Kamunokina akonikirot.

¹⁴⁸ Abu kakweny eroko akwenyuneta nuka akuare, Tetere aomoomoi akonikirot.

¹⁴⁹Kiira eporotoka kwape ejaar akonisianut-nakamin: Wu EJAKAIT, kitajarai kwape ejaatar itubesiakon.

¹⁵⁰Ikunyunete die luibwapito aronis; Elwaka kesi kokisilakon.

¹⁵¹ Wu EJAKAIT, ijai ijo die, Akoniicorakineta da kere eraas abeit.

¹⁵² Abu kajen apeŋo kaitejenunetakon ebe, Iticasit kes ikar kere.

¹⁵³ Koomoom aiticanitoika, ido koyu eoŋ; Naarai mam kemurwokinito ikonikisila.

¹⁵⁴ Kopurokinai akakirot, kolakunai: Kitajarai kwape ejaar akonikirot.

¹⁵⁵ Elwana aitajario kama ejaas ikaronok, Naarai mam kes emoete ikonikiaila.

¹⁵⁶Wu EJAKAIT, epolok noi aitimesiakon nuejok: Kitajarai kwape ejaatar itubesiakon.

¹⁵⁷Ipu lukemanito ka lukasurupoka da; Konye mam eoŋ apaarit kaitejenunetakon.

¹⁵⁸Abu kaany luemodomodoete, keturur; Naarai mam ericito akonikirot.

¹⁵⁹Koomoom kwape aminar eoŋ aituutooretakon: Kitajarai, wu EJAKAIT, kwape ejaar asianutukon-nakamin.

¹⁶⁰Etiai loka akirokon ŋes abeit; Itubesiakon luedolito kere ejaenenas ikar kere.

¹⁶¹ Kemanata eoŋ ikapolok komam akiror; Konye ebwoi ekatau koyoŋite akonikiro.

¹⁶²Alelakinit eoŋ akonikirot, Kwape ituŋanan yenedumuni iŋatan luipu.

¹⁶³Alait eoŋ asacit da aiŋalanut; Konye amina ikonikisila.

¹⁶⁴Keturenenei jo irwan akanykaarei apaaran; Kanuka itubesiakon luedolito.

¹⁶⁵ Lueminas ikonikisila ejaas ainapakin naepol; Emamei da adiokirot naisiguikini kes.

¹⁶⁶Wu EJAKAIT, amunokin aitajarakon, Eswama da aicorakinetakon.

¹⁶⁷Abu ekatau koric aitejenunetakon; Ido amina kes noi.

¹⁶⁸ Abu karic aituutooretakon ka aitejenunetakon; Naarai ejaas ikarotin kere akonyenekon.

¹⁶⁹Wu EJAKAIT, kikuny aimonyoka neijai: Ae acoa kwape ejaar akonikirot.

¹⁷⁰Kodol aiŋaiŋaka akonyenekon: Koyuunai kwape ejaar akonikirot.

¹⁷¹Kolim akaituk aiturit; Naarai kisisianakini ijo eoŋ ikonikisila.

¹⁷²Koye akaŋajep akonikirot; Naarai edolito aicorakinetakon kere.

¹⁷³ Kitemokino akonikan aiŋarakin eoŋ; Naarai aseu aituutooretakon.

¹⁷⁴Wu EJAKAIT, emiela aitajarakon; Esiyalamikinit ikonikisila.

¹⁷⁵Kojar ekatau, kosodi aiturit jo; Keŋarakis da eoŋ itubesiakon.

¹⁷⁶ Apaa eoŋ bala amerekek naeoliorit; komou ekonibulesit; Naarai mam kemurwokinito aicorakinetakon.