Read Ateso Isabulin 18 Bible Online

Isabulin 18 - Ateso bible

Isabulin 18

¹Loka Ekapolokiton lueruos. Esabuli loka Daudi ebulesit loka EJAKAIT, loketemari EJAKAIT akiro nuka ekosio kalo, kapaaran nakeyuunia EJAKAIT ŋes kakanin nuka lukasurupoke kere, kakan da naka Saul; kobala ebe: Kamina jo, wu EJAKAIT, akagogoŋ.

² EJAKAIT ŋes atiibaka, abwasika, ka ekayuunanika; Edekeka, atiibaka nakagogoŋ, amunonena ŋes; Ekabuku, amulwarat naka aitajarioka, abwasika naicelelei.

³ Ewonenenei EJAKAIT, loibusakinit aiturio; Ketajareneneo kwaŋin kama kalukasurupoka.

⁴ Kaena aunoi nuka atwanare, Ketukuriana ŋol akalele nuka numam ayoŋit Edeke.

⁵Kerimorito aunoi nuka Okatwak: Kepoka iica luka atwanare.

⁶Keworo EJAKAIT kotoma ocanika, Kamony mama ejai Ekadeke: Abu kiira ekaporoto koyekaluke, Kodolok aimonyoka akiike.

⁷ Kosodi kijaniiana akwap, komarani, Kilokilokos da apeteta nuka iroŋan, Kijaŋijaŋasi, naarai anyunyura ŋesi.

⁸Kisusumau apuru kokumesike, Kidonyo akim nakelomuni kaitukuke; Kisinep atotol.

⁹ Kitukukum akuj, kodok; Kojai amuton naejesi ŋaŋ kwap kakejeke.

¹⁰ Kibwanen ekerubi, koporo: Eebo, koporo kiiror kabebenoka nuka ekwam.

¹¹ Kituluo amuton akeŋopis, ekewema loiswaparit ŋes; Amuton naka akipi, idouon luitolimakinito luka akuj.

¹²Kikutasi ikedouon luitolimakinito kanuka amwekimwek naka akonyeneke, Akako ka atotol nuka akim.

¹³ Kiretu da EJAKAIT kotoma akuj, Kolimo Loejai kuju kakuj ekeporoto: Akako ka atotol nuka akim.

¹⁴ Koguma ikekoioi, kisiarisiar; Eebo, koguma aimiliaununeta nuipu, kisiyaloŋoŋ kes.

¹⁵Kotakanutu do alelesia nuka akipi, Kideleleut apeteta nuka akwapin, Kanuka airetakinikon, wu EJAKAIT, Kanuka akutun naka eiyeŋane loka ikumesikon.

¹⁶ Abu kijuk kokuju, kayaŋa; Kegalala kakipi nuipu.

¹⁷Abu kayu kama kalokasurupika lokagogoŋ, Kama kakesi da lukalaito, Naarai ketelekarito eoŋ kagogoŋ.

¹⁸Kabunokis kapaaran naka epolaka: Konye EJAKAIT ŋes ketogogoŋi.

¹⁹ Ido abu ketoloma aibois naelal; Abu kayu eoŋ naarai kesiyalamikinit.

²⁰ Karop EJAKAIT eoŋ kwape ejaar akadolit; Katacak kwape ejaar alaunite naka akaninika.

²¹Naarai abu karic irotin luka EJAKAIT, Ido mam abu kejerukana kama ejai Ekadeke.

²²Naarai ajaas itubesiake kere kakonyeneka, Ido mam abu kajal akeicorakineta.

²³Abu karai loadolit kamake, Abu kedara kenyek aswam numam adolit.

²⁴ Ŋes katacakinia EJAKAIT kwape ejaar akadolit, Kwape ejaar alaunite naka akaninika kakonyeneke.

²⁵ Mama ejai yeniketimon itodianakini aitim; Mama ejai yenikadoliton itodianakini adolit;

²⁶ Mama etai yenesegara itodianakini aseg; Ido mama ejai yenetumaana itodianakini airebokinet.

²⁷ Naarai itajari ituŋa luemwaŋitai; Konye itisili akonye nuka lueomiara

²⁸ Naarai itonokuni ijo akatala; Itacauni EJAKAIT Ekadeke akamuton.

²⁹Naarai kanukon arukitor ajore; Ido kanuka aiŋarakinio naka Edekeka elami abwas.

³⁰ Konye Edeke, edolit ekerot; Egimor akirot naka EJAKAIT; iŋol ŋes ebuku loka ŋul kere luemunos ŋes.

³¹ Naarai iŋai bo Edeke dimarai EJAKAIT? Iŋai bo da atiiba dimarai Edekewok?

³²Edeke loketanapikinit agogoŋ, Loitodolit da ekarot.

³³ Ituluori akakejen kwape nuka amiam: Ido kebwaikini eoŋ aiboisioka nukokuju.

³⁴Isisianakini akakanin ejie; Tetere ikesete akakanin akabwa naka aikomon.

³⁵Ido kiinak eoŋ ebuku loka akoniitajar: Kegagauni akonikan nakoteten, Ketopoloo eoŋ aiyapeperakon.

³⁶Kitalalik eoŋ neetorit, Mam ejurusiaros akatitiban.

³⁷Ebwapi lukasurupoka, kadolok: Bobo da mam aboŋuni aitodol neemudiarotor.

³⁸Ecumueumei cut komam epedorete anyoun: Ibirokinos kwap akejeka.

³⁹Naarai ibu kitanapik eoŋ agogoŋ najus: Itukukum ŋul lukanyoikinete.

⁴⁰Isibonik lukasurupoka ikecepuran neajai eoŋ, Tetere amudiari lukalaito.

⁴¹ Apotu kiworoto, konye komameun yenitajari: Kiworoto EJAKAIT, konye mam abu Koboŋok.

⁴²Kasodi kepudapud kes bala apua naekutari ekwam: Kacaka kes bala erit loka irotin.

⁴³Ibu koyu eoŋ kotoma aŋolopa naka ituŋa: Kituluo ekeŋarenon loka atekerin: Kejaanakinete eoŋ ituŋa lumam lem ajeni.

⁴⁴Atipet kepuput nukaŋ karimarete; Kanonokikinete imo.

⁴⁵ Eoliorete imo, Elomunete emaranete kaiboisiokec nuŋopis.

⁴⁶ Ejari EJAKAIT; kituritete atiibaka; Kitopolooritete Edeke loka akaitajario.

⁴⁷Ŋes Edeke lokenyanakini, Ketapatanikini eoŋ ituŋa.

⁴⁸ Kaiyanari eoŋ kama ejaas lukasurupoka: Eebo, kidaka eoŋ kuju kaŋul kalukanyoikinete: Kiyu eoŋ kama ejai ituŋanan yenikelepa.

⁴⁹ Ŋes kemalaenena jo kotoma atekerin, wu EJAKAIT. Ayeenenei aiturit ekonikiror.

⁵⁰ Einakini ekabakake aitajar naepol: Itodianakini da nukasianut-nakamin ekinyonyoikitonoke akinyet, Daudi ka akeur ikar kere.