Read Ateso Isabulin 19 Bible Online

Isabulin 19 - Ateso bible

Isabulin 19

¹Loka Ekapolokiton lueruos. Esabuli loka Daudi. Elimorit akuj aibuses naka Edeke; Itejenunit da apak aswam naka akaninike.

²Apaaran ineras kapaaran, Akuare ka akuare itodianakinos aijen.

³Emameete akiro karaida aŋajep; Mam iirario ekeceporoto.

⁴ Anataa eikorukec akwap kere, Akecekiro da kiton osaŋe loka akwap. Tomakec ebwaiki akoloŋ ewema.

⁵ Naesubit bala eteran loelomuni kotogoke, Kolakara kwape ediniriria ekagogoŋon eboloboloi.

⁶ Akelomun egeuni kosaŋe loka akuj, Akeirimor da kiton osaŋeke; Kwabo emamei ibore yenibwaio kamwanisike.

⁷Edolit ekisil loka EJAKAIT, inyakuni etau; Icasit aitejenunet naka EJAKAIT, itocouni ibaŋ.

⁸ Etenete aituutoonoreta nuka EJAKAIT, isiyalamikinete etau: Esegara aicorakinet naka EJAKAIT, itacauni akonye.

⁹Ayoŋit naka EJAKAIT erai nakalaunan, ejaenena ikar kere; Itubesia luka EJAKAIT eraas lukabeit, Luedolito cut.

¹⁰Ibusakinit eimiel aitelekarit esabu, Eebo, esabu loepol loililiauna: Ejijim aitelekarit esik ka akap naka ao.

¹¹ Ikwenyarete teni ŋun ekonibulesit: Toma aricit ŋun ŋes ejai eropit loepol.

¹²Iŋai bo yenepedori ajenun akepaar? Kolemarai eoŋ aibucanareta nuibwaa.

¹³Kitikok da ekonibulesit kotoma aisosolonut; Kinyek ayait eoŋ; kasodi kebecokin, K enyek adiakar akirot naepol.

¹⁴ Kocam akiro nuka aitukuka ka aomoom nakotauka kakonyenekon, Wu EJAKAIT, atiibaka, ekalakunanika da.