Read Ateso Isabulin 48 Bible Online

Isabulin 48 - Ateso bible

Isabulin 48

¹Ekosio. Esabuli loka odwe luka Kora. Epol EJAKAIT, ibusakinit aiturio noi, Kotoma ore loka Edekewok, koronatake lokalaunan.

² Ejokuna aiceleleke, ailel naka akwap kere, ŋes emoru Sion, kari naka agolitomei, Ere loka Ekabaka lokapolon.

³Etejenun Edeke kotogoike lukapolok Ebe Erai neekerianara.

⁴ Naarai koany, apotu ikabakan kotukonokinos, Kotuboros nepepe.

⁵Apotu koanyut, kosodete aumokin; Kiyaloŋoŋoto, kiwonyasi.

⁶Komaranata kanen; Koriebasi bala aberu naerieb aidoun.

⁷ Ekwam lokokide ŋes ibilibilia ameerin nuka Tarusis.

⁸ Kwape kipupunio, kianyu kwape kwaŋin Kore loka EJAKAIT loka ajoresio, Kore loka Edekewok: lticasi Edeke ŋes ikar kere. Sela.

⁹Wu Edeke, kiwoomoom isio akonisianut-nakamin, Kokidiŋ oyekalukon.

¹⁰ Wu Edeke, kwape ejaar ekonikiror, Ejai kwape kwaŋin akoniiturit aitodol osaŋe loka akwap: Ileleba akonikan nakoteten adolit.

¹¹Kolakar emoru Sion, Kolelata adwe nuka Yuda, Kanuka itubesiakon.

¹²Aso kirimosi Sion, kimanimanata, Kimarata itogoike lukaojak.

¹³Kirereoro arwatatinike, Koomoomata nuka itogoike lukapolok; Tetere itatamanakinete atur naetupakini.

¹⁴ Naarai Edeke ŋol erai Edekewok ikar lumam enaŋete: Erai ekeŋarenikinoniwok aitodol atwanare.